హైదరాబాద్, వెలుగు: సీఎం కేసీఆర్ పాలనలో స్టూడెంట్స్ డ్రాపౌట్స్ పెరిగాయని ఎన్ఎస్యూఐ స్టేట్ ప్రెసిడెంట్ బల్మూరి వెంకట్ అన్నారు. ప్రభుత్వ స్కూళ్లు, కాలేజీలు, యూనివర్సిటీల్లో మౌలిక సదుపాయాలు కరువయ్యాయన్నారు. మంగళవారం ఆయన గాంధీభవన్లో మీడియాతో మాట్లాడారు. కేజీ టు పీజీ అని సీఎం కేసీఆర్ మోసం చేశారన్నారు. ఫీజు రీయింబర్స్ మెంట్ లేక, ఫీజులు కట్టలేక చాలా మంది స్టూడెంట్స్ చదువుకు దూరం అవుతున్నారని తెలిపారు. గిరిజన, స్పోర్ట్స్ యూనివర్సిటీలను ఏర్పాటు చేస్తామని చెప్పి మోసం చేశారని మండిపడ్డారు. ప్రైవేట్ యూనివర్సిటీలకు మాత్రం అనుమతులు ఇస్తున్నారని ఆరోపించారు.
ఏ రాష్ట్రంలోనైనా బడ్జెట్లో 15 శాతం విద్యా వ్యవస్థకు కేటాయిస్తారని, ఇక్కడ మాత్రం అలాంటి పరిస్థితి లేదని విమర్శించారు. కేసీఆర్ పాలనలో విద్యార్థులు రోడ్డెక్కాల్సిన పరిస్థితి ఏర్పడిందన్నారు. టీఎస్పీఎస్సీపై పోరాటం చేసింది ఎన్ఎస్యూఐ, యూత్ కాంగ్రెస్ మాత్రమే అని స్పష్టం చేశారు. టీఎస్పీఎస్సీ తప్పులను సవరిస్తామని ఓ వైపు సర్కారు చెప్తూనే.. గ్రూప్ 1 రద్దును సుప్రీం కోర్టులో ఎత్తేయించేందుకు ప్రయత్నం చేస్తున్నదన్నారు. నిరుద్యోగుల పక్షాన ఎన్ఎస్యూఐ పోరాటం మాత్రమే చేసిందని, నిరుద్యోగులే కోర్టులో పిటిషన్లు వేశారని స్పష్టం చేశారు.
