నాగర్ కర్నూల్, వెలుగు: జిల్లాలోని జూనియర్ కాలేజీల్లో లెక్చరర్ల కొరతతో క్లాసులు జరగకపోవడంతో స్టూడెంట్స్ ఆందోళన చెందుతున్నారు. కాలేజీలు తెరిచి నెల దాటినా గెస్ట్ లెక్చరర్లను సర్కారు రెన్యువల్ చేయలేదు. వారికి గత ఏడాదికి సంబంధించిన 6 నెలల జీతం ఇవ్వలేదు. దీంతో వారిని రెన్యువల్ చేస్తారా? లేదా అనే అనుమానాలు వ్యక్తమవుతన్నాయి. ప్రతి రోజు కాలేజీకి వస్తున్న స్టూడెంట్స్ క్లాసులు జరగకపోవడంతో టైం పాస్ చేసి ఇండ్లకు తిరిగి వెళ్తున్నారు. ఇప్పటికే కాలేజీల్లో సైన్స్ల్యాబ్స్, ప్రాక్టికల్స్, లైబ్రరీలను మరిచిపోయే స్థితికి తెచ్చారు. ఎంపీసీ, బైపీసీ గ్రూపులు తీసుకున్న స్టూడెంట్స్ లెక్చరర్లు లేక, సిలబస్ జరగక టెన్షన్కు గురవుతున్నారు.
సగం పోస్టులు ఖాళీ..
జిల్లాలో 20 మండలాలుండగా, 15 మండల కేంద్రాల్లో గవర్నమెంట్ జూనియర్కాలేజీలున్నాయి. పెద్దకొత్తపల్లి, తెల్కపల్లి, ఉప్పునుంతల, పెంట్లవెల్లి, చారకొండ మండలాల్లో కాలేజీలు లేకపోవడంతో పక్క మండలాలకు వెళ్తున్నారు. జూనియర్ కాలేజీలో ప్రిన్సిపాల్తో కలుపుకొని కనీసం 12 మంది లెక్చరర్లు ఉండాలి. అయితే ఏ కాలేజీలోనూ 8 మందికి మించి లెక్చరర్లు లేరు. కొన్ని కాలేజీలు నలుగురైదుగురితోనే నడుస్తున్నాయి. జిల్లాలోని జూనియర్ కాలేజీలకు 196 లెక్చరర్ పోస్టులు మంజూరవగా, 95 పోస్టులు ఖాళీగా ఉన్నాయి. 97 మంది రెగ్యులర్, నలుగురు కాంట్రాక్ట్ లెక్చరర్లు పని చేస్తున్నారు. గత విద్యా సంవత్సరంలో 95 ఖాళీలు ఉండగా, 64 మంది గెస్ట్ లెక్చరర్లను నియమించి, 31 ఖాళీలను అలాగే వదిలేసింది. అడ్మిషన్ల సమయంలో ఊరూరా తిరిగి స్టూడెంట్లను కాలేజీల్లో చేర్చించిన తమను సర్కారు ఎప్పుడు రెన్యువల్ చేస్తుందోనని గెస్ట్ లెక్చరర్లు ఎదురు చూస్తున్నారు. ప్రభుత్వం గెస్ట్ లెక్చరర్లను రెన్యువల్ చేస్తే సిలబస్ స్టార్ట్ అవుతుందని స్టూడెంట్స్ ఎదురు చూస్తున్నారు. వెంటనే లెక్చరర్లను నియమించి క్లాసులు ప్రారంభించాలని స్టూడెంట్స్ కోరుతున్నారు.
నిలిచిన ప్రమోషన్లు, పోస్టింగ్లు..
సమైక్య రాష్ట్రంలో స్కూల్ అసిస్టెంట్లకు జేఎల్గా ప్రమోషన్ ఇచ్చేవారు. కాలేజ్ సర్వీస్ కమిషన్ ద్వారా జేఎల్ పోస్టులు భర్తీ చేసేవారు. రాష్ట్రం ఏర్పడిన తర్వాత ప్రమోషన్లు, రిక్రూట్మెంట్లు నిలిచిపోయాయి. దీంతో కాలేజీలను కాంట్రాక్ట్, గెస్ట్ లెకర్చర్లతో నడిపిస్తున్నారు. గత విద్యా సంవత్సరంలో రాష్ట్రంలో 1,658 గెస్ట్ లెక్చరర్లు పని చేశారు. ఇటీవల కాంట్రాక్ట్ లెక్చరర్ల సర్వీస్ను రెగ్యులరైజ్ చేసిన ప్రభుత్వం, మిగిలిన పోస్టులను క్లియర్ వేకెన్సీలుగా చూపిస్తోంది. 9 ఏండ్లుగా గెస్ట్ లెక్చరర్లుగా పని చేస్తున్న వారిని ఆటో రెన్యువల్ సిస్టంలో కొనసాగించకుండా, కాలేజీలు తెరిచిన రెండు నెలల తరువాత కంటిన్యూ చేస్తూ వస్తున్నారు. ఉద్యోగాలకు, జీవితాలకు భద్రత లేదని రెండేళ్లలో ఉమ్మడి పాలమూరు జిల్లాలో ముగ్గురు, మెదక్లో ఒక గెస్ట్ లెక్చరర్ సూసైడ్ చేసుకున్నారు.
