న్యూఢిల్లీ: దేశ అత్యున్నత న్యాయస్థానం సుప్రీంకోర్టు కీలక నిర్ణయం తీసుకుంది. సుప్రీంకోర్టు ప్రాంగణంలోని హై సెక్యూరిటీ జోన్‌లో వీడియోగ్రఫీ, ఫొటోగ్రఫీపై పూర్తిగా నిషేధం విధించింది. ఈ మేరకు సుప్రీంకోర్టు పరిపాలనా విభాగం 2025, సెప్టెంబర్ 10వ తేదీన ఉత్తర్వులు జారీ చేసింది. సుప్రీంకోర్టు భద్రతను కట్టుదిట్టం చేయడంతో పాటు, న్యాయస్థానం ఆవరణలో ప్రతిరోజూ ఉండే ప్రజల భద్రతను దృష్టిలో ఉంచుకుని ఈ నిర్ణయం తీసుకున్నట్లు స్పష్టం చేసింది.
పరిపాలనా విభాగం కొత్త గైడ్స్ లైన్స్ ప్రకారం.. సుప్రీంకోర్టు హై-సెక్యూరిటీ జోన్‌లో ఏ వ్యక్తి కూడా ఫోన్లో ఫొటోలు తీయడానికి లేదా వీడియోలు రికార్డ్ చేయడానికి అనుమతి లేదు. హైసెక్యూరిటీ జోన్‌లో మొబైల్ ఫోన్లతో పాటు కెమెరాలు, ట్రైపాడ్‌లు, సెల్ఫీ స్టిక్‌లు ఉపయోగించడం కూడా నిషేధం. లో సెక్యూరిటీ జోన్‌లో మాత్రమే జర్నలిస్టులు ఇంటర్వ్యూలు, ప్రత్యక్ష ప్రసారాలు నిర్వహించడానికి అనుమతి ఉంటుందని ఉత్తర్వుల్లో స్పష్టం చేసింది సుప్రీంకోర్టు అడ్మినిస్ట్రేషన్ డిపార్ట్మెంట్.
►ALSO READ | డీజిల్‌లో ఇథనాల్‌కు బదులుగా ఐసోబుటనాల్ కలుపుతాం: నితిన్ గడ్కరీ
ఎవరైనా ఈ నిబంధనలను ఉల్లంఘించినట్లు తేలితే చట్టపరమైన చర్యలు ఎదుర్కొవాల్సి ఉంటుందని హెచ్చరించారు. ఒకవేళ మీడియా సిబ్బంది రూల్స్ బ్రేక్ చేస్తే ఒక నెల వరకు హై-సెక్యూరిటీ జోన్‌లోకి ప్రవేశించకుండా నిషేధం విధించబడుతుందని తెలిపింది. సుప్రీంకోర్టు రిజిస్ట్రీ సిబ్బంది, ఇతర విభాగ ఉద్యోగులు కూడా కఠినమైన నిఘాలో ఉంటారని.. వారు కూడా ఏదైనా నిబంధనలను ఉల్లంఘిస్తే శాఖాపరమైన చర్యలు తీసుకుంటామని హెచ్చరించారు.
