న్యూఢిల్లీ : హైదరాబాద్‌ క్రికెట్ అసోసియేషన్‌ (హెచ్సీఏ) ఎన్నికలకు కీలక ముందడుగు పడింది. హెచ్సీఏ పర్యవేక్షణ, ఆఫీస్‌ బేరర్ల ఎన్నికల నిర్వహణకు తామునియమించిన మాజీ జడ్జి, జస్టిస్ లావు నాగేశ్వర రావు ఏకసభ్య కమిటీ తీసుకునే నిర్ణయాల్లో జోక్యం చేసుకోవద్దని తెలంగాణ హైకోర్టు, జిల్లా కోర్టులను సుప్రీంకోర్టు శుక్రవారం ఆదేశించింది.
ఈ విషయంలో ఆయా కోర్టులు ఇచ్చే ఆదేశాలు చెల్లబోవని స్పష్టం చేసింది. హెచ్‌‌‌‌సీఏను గాడిలో పెట్టి సంఘానికి ఎన్నికలు నిర్వహించేందుకు ఏకసభ్య కమిటీ పలు కీలక నిర్ణయాలు తీసుకుంది. కొన్ని బహుళ క్లబ్‌‌‌‌లపై వేటు వేసి, ఓటు హక్కు తొలగించింది. ఈ నిర్ణయాలపై పలు క్లబ్‌‌‌‌లు జిల్లా కోర్టులను, హైకోర్టును ఆశ్రయించాయి. దీంతో హెచ్సీఏ ఎన్నికల ప్రక్రియ ముందుకు వెళ్లడం లేదు.
ALSO READ: మంత్రాలు చేస్తున్నారని చెట్టుకు కట్టేసిన్రు
ఇదే విషయాన్ని ప్రస్తావిస్తూ జస్టిస్ నాగేశ్వర రావు దాఖలు చేసిన పిటిషన్‌‌‌‌ను జస్టిస్ సంజయ్ కిషన్ కౌల్, జస్టిస్ సుధాన్షు ధులియలతో కూడిన సుప్రీంకోర్ట్‌ బెంచ్‌ విచారించింది. ఈ విషయంలో దిగువ న్యాయస్థానాలు కల్పించుకోవద్దని స్పష్టం చేసిన బెంచ్‌ ఏదైనా ఫిర్యాదు ఉంటే సుప్రీంకోర్టు దృష్టికే తీసుకురావాలని స్పష్టం చేసింది. తదుపరి విచారణను అక్టోబర్‌ 31వ తేదీకి వాయిదా వేసింది.
