మధ్యప్రదేశ్ సీఎం, స్పీకర్లకు సుప్రీం నోటీసులు
ఈరోజే జవాబివ్వాలని ఆదేశం
చౌహాన్ పిటిషన్పై నేడు విచారణ
రెబల్ ఎమ్మెల్యేల ఇంప్లీడ్కు ఓకే
సింధియా వెంటే మేము: రెబల్ ఎమ్మెల్యేలు
న్యూఢిల్లీ, భోపాల్, బెంగళూరు: అసెంబ్లీలో వెంటనే ఫ్లోర్టెస్ట్ నిర్వహించాలన్న డిమాండ్పై ప్రభుత్వ స్పందనేంటని సుప్రీంకోర్టు మధ్యప్రదేశ్ సీఎం కమల్నాథ్ను ప్రశ్నించింది. బీజేపీ సీనియర్ లీడర్ శివరాజ్సింగ్ చౌహాన్ పిటిషన్ను మంగళవారం జస్టిస్ డీవై చంద్రచూడ్, జస్టిస్ హేమంత్ గుప్తా ఆధ్వర్యంలోని బెంచ్పరిశీలించింది. ఈ విషయంలో సర్కారు స్పందన తెలుసుకోవాలని సీఎం కమల్నాథ్, స్పీకర్ ఎన్.ప్రజాపతి, అసెంబ్లీలో ప్రిన్సిపల్ సెక్రటరీలకు బెంచ్ నోటీసులు జారీ చేసింది. ప్రభుత్వ స్పందనను బుధవారంలోగా కోర్టుకు తెలియజేయాలని ఆదేశిస్తూ చౌహాన్ పిటిషన్ను కూడా అప్పుడే విచారిస్తామని బెంచ్ పేర్కొంది. కోర్టు నోటీసులతో పాటు ఈ మెయిల్ ద్వారా రాష్ట్ర ప్రభుత్వానికి, సీఎం తదితరులకు నోటీసులు ఇచ్చేందుకు చౌహాన్కు కోర్టు అనుమతిచ్చింది.
చౌహాన్ పిటిషన్ విచారణలో ఇంప్లీడ్ అయ్యేందుకు అనుమతించాలన్న రెబల్ ఎమ్మెల్యేల విజ్ఞప్తిని ఆమోదించింది. అంతకుముందు కాంగ్రెస్ ఎమ్మెల్యేల రాజీనామాలతో కమల్నాథ్ సర్కారు మెజారిటీ కోల్పోయిందని, అసెంబ్లీలో ఫ్లోర్ టెస్ట్ నిర్వహించాలని చౌహాన్ ఆధ్వర్యంలో బీజేపీ నేతలు గవర్నర్కు శనివారం విజ్ఞప్తి చేశారు. సోమవారం అసెంబ్లీ బడ్జెట్ సమావేశాల్లో బలపరీక్ష నిర్వహించాలని గవర్నర్ లాల్జీ టాండన్స్పీకర్కు సూచించారు. అయితే, కరోనా వైరస్ వ్యాప్తి నేపథ్యంలో బడ్జెట్ సమావేశాలను స్పీకర్ ఈ నెల 26 కు వాయిదా వేశారు. దీనిపై చౌహాన్ సుప్రీంకోర్టును ఆశ్రయించారు. అసెంబ్లీలో వెంటనే ఫ్లోర్ టెస్ట్ నిర్వహించేలా ఆదేశించాలని కోరారు. మరోవైపు, మధ్యప్రదేశ్ వుమెన్స్ కమిషన్ చైర్పర్సన్గా కాంగ్రెస్ లీడర్ షోబా ఓఝా మంగళవారం పదవీ బాధ్యతల్ని తీసుకున్నారు. ఈ నియామకంపై సీరియస్ అయిన బీజేపీ నేతలు గవర్నర్ టాండన్ను కలిశారు. కాన్స్టిట్యూషనల్ పోస్టుల నియామకాలను అడ్డుకోవాలని మెమోరాండం అందజేశారు.
చౌహాన్ పిటిషన్లో ఏముందంటే..
మధ్యప్రదేశ్లో 22 మంది ఎమ్మెల్యేల రాజీనామాలతో సర్కారు మెజారిటీ కోల్పోయింది. అసెంబ్లీలో బలాన్ని నిరూపించుకోవాలని మేం డిమాండ్ చేసినా, గవర్నర్ ఆదేశించినా స్పీకర్ పట్టించుకోలేదు. స్పీకర్ తో పాటు అసెంబ్లీ ప్రిన్సిపల్ సెక్రెటరీ ఉద్దేశపూర్వకంగా గవర్నర్ ఆదేశాలను ఎదిరించారు. రాజ్యాంగ విలువలను కాలరాశారు. అసెంబ్లీలో వెంటనే ఫ్లోర్ టెస్ట్ నిర్వహించి, బల నిరూపణ చేసుకోవాలన్న గవర్నర్ ఆదేశాలను అమలుచేసేలా చూడాలి. ‘కోర్టు ఆదేశాలు వెలువడ్డ 12 గంటల్లో ఫ్లోర్ టెస్ట్ నిర్వహించాలని స్పీకర్ను ఆదేశించండి’ అంటూ శివరాజ్సింగ్ చౌహాన్ సుప్రీంకోర్టుకు విజ్ఞప్తి చేశారు. ఈ పిటిషన్లో చౌహాన్తోపాటు గోపాల్ భార్గవ, నరోత్తం మిశ్రా సహా 9 మంది బీజేపీ ఎమ్మెల్యేలు సంతకాలు చేశారు.
