శివ్వంపేట, వెలుగు : రీజినల్ రింగ్ రోడ్డు మాదిరిగానే దాని పక్కనుంచి రింగ్ రైల్వే లైన్ నిర్మించేందుకు ప్రభుత్వం ప్రణాళికలు సిద్ధం చేస్తోంది. ఈ మేరకు సర్వే ప్రారంభమైంది. శివ్వంపేట మండలంలోని కొంతన్ పల్లి, పోతులగూడ గ్రామాల్లో ట్రిపుల్ఆర్ పక్క నుంచి మార్కింగ్ ఇస్తూ సర్వే నిర్వహిస్తున్నారు.
ఇప్పటికే ట్రిపుల్ ఆర్ లో భూములు కోల్పోయి నష్టపోయామని, మళ్లీ రైల్వే లైను కోసం ఎంత భూమి పోతుందో అని రైతులు ఆందోళన చెందుతున్నారు. ఈ విషయమై రెవెన్యూ ఆఫీసర్లను సంప్రదిస్తే రింగ్ రైల్వే లైన్ కు సంబంధించి తమకు ఎలాంటి సమాచారం లేదన్నారు. ప్రైవేట్ ఏజెన్సీల ద్వారా రైల్వే లైన్ కోసం సర్వే నిర్వహిస్తున్నట్టు సమాచారం.
