- బ్లాక్ చేసిన 13 జిల్లాల్లో ట్రాన్స్ఫర్లకు ఎక్కువ మంది టీచర్ల ప్రయత్నం
- 317 జీవోతో నష్టపోయిన టీచర్లకేనంటూ సర్కార్ షరతు
హైదరాబాద్, వెలుగు: టీచర్లు, ఉద్యోగుల మ్యూచువల్ ట్రాన్స్ఫర్లకు బేరసారాలు మొదలయ్యాయి. మ్యూచువల్ బదిలీలకు అప్లయ్ చేసుకునేందుకు సర్కారు ఈ నెల15 దాకా అవకాశమివ్వడంతో.. తమతో మ్యూచువల్కు వచ్చే తోటి ఉద్యోగుల కోసం వెతుక్కుంటున్నారు. అందుకు వాట్సాప్, ఇన్స్టాగ్రామ్లలో గ్రూపులను ఏర్పాటు చేస్తున్నారు. వీలైనంత వరకు ఊరికి దగ్గర్లో ఉన్నవాళ్లతోనే మ్యూచువల్ పెట్టుకునేందుకు టీచర్లు ఆసక్తి చూపిస్తున్నారు. జిల్లాను బట్టి రూ.లక్ష నుంచి రూ.10 లక్షల దాకా బేరసారాలు నడుస్తున్నట్టు టీచర్లు చెప్తున్నారు. అయితే, కొందరు టీచర్లు మాత్రం ఎలాంటి డబ్బులకు ఆశపడకుండానే మ్యూచువల్ ట్రాన్స్ఫర్లకు ఒప్పుకుంటున్నారని తెలుస్తోంది.
కండిషన్స్ అప్లై..
ఉమ్మడి రాష్ట్రంలో 2012లో చివరిసారిగా టీచర్ల మ్యూచువల్ బదిలీలు జరిగాయి. రెండేండ్ల సర్వీస్ పూర్తి చేసుకున్నోళ్లందరికీ అప్పట్లో అందుకు అవకాశం కల్పించారు. అయితే, తెలంగాణ వచ్చాక మ్యూచువల్ ట్రాన్స్ఫర్లకు అవకాశమిస్తామని సీఎం కేసీఆర్ ఎన్నోసార్లు చెప్పినా అది అమలుకు నోచుకోలేదు. తాజాగా కొత్త జిల్లాలు, జోన్ల ప్రాతిపదికన ఉద్యోగులు, టీచర్లను అలాట్చేసేందుకు రాష్ట్ర ప్రభుత్వం 317 జీవోను తీసుకొచ్చింది. అయితే, చాలా మంది టీచర్లకు సొంత జిల్లాలు కాకుండా వేరే జిల్లాల్లో పోస్టింగులు రావడంతో టీచర్లు ఆందోళనలు చేస్తున్నారు. దీంతో సర్కారు మ్యూచువల్ ట్రాన్స్ఫర్లకు అవకాశం కల్పించింది. అయితే, జీవో వల్ల నష్టపోతున్న టీచర్లు మాత్రమే అందుకు అర్హులని షరతు పెట్టింది. ఈ నెల ఫస్ట్ నుంచి అప్లికేషన్ల ప్రక్రియ మొదలైంది.
సిటీకి దగ్గర ఉండేలా
మ్యూచువల్ ట్రాన్స్ఫర్లకు ఉమ్మడిజిల్లా పరిధిలోనూ సర్వీస్ ప్రొటెక్షన్ ఉండబోదని సర్కారు గతంలో చెప్పింది. దీంతో చాలా మంది వెనకడుగు వేశారు. ఇప్పుడు ఆ రూల్ను సర్కారు ఎత్తివేయడంతో ఎక్కువమంది టీచర్లు మ్యూచువల్ ట్రాన్స్ఫర్లకు ప్రయత్నాలు చేస్తున్నారు. స్పౌజ్ బదిలీలను బ్లాక్ చేసిన 13 జిల్లాల్లో డిమాండ్ ఎక్కువగా ఉందని టీచర్లు చెప్తున్నారు. పిల్లల చదువులు, కుటుంబ అవసరాలను దృష్టిలో పెట్టుకుని చాలా మంది టీచర్లు హైదరాబాద్కు దగ్గర్లో ఉండేందుకు వీలుగా రంగారెడ్డి, మేడ్చల్ జిల్లాలకు ఎక్కువ ప్రాధాన్యం ఇస్తున్నారు. వాటితో పాటు హనుమకొండ, కరీంనగర్ తదితర జిల్లాల్లోనూ మ్యూచువల్ ట్రాన్స్ఫర్లకు
డిమాండ్ ఉందని అంటున్నారు.
ఇప్పటిదాకా 870 అప్లికేషన్లు
మ్యూచువల్ ట్రాన్స్ఫర్లకు ఇప్పటిదాకా 870 అప్లికేషన్లు వచ్చినట్టు సీఎస్ సోమేశ్ కుమార్ తెలిపారు. మీ–సేవ సెంటర్ల నుంచి ఆన్లైన్లో అప్లికేషన్లను తీసుకుంటున్నట్టు శనివారం విడుదల చేసిన ఒక ప్రకటనలో పేర్కొన్నారు. అయితే, మ్యూచువల్ ట్రాన్స్ఫర్లకు సేమ్ కేడర్, సేమ్ సబ్జెక్ట్ టీచర్లు దొరకడం కష్టమవుతుండడంతో వారికి డిమాండ్ పెరిగింది. త్వరలోనే కొందరు సీనియర్ స్కూల్ అసిస్టెంట్లు హెడ్మాస్టర్లుగా ప్రమోట్ అయ్యే అవకాశం ఉండటంతో.. వాళ్లు ముందుకు వస్తున్నట్టు తెలుస్తోంది. ఎక్కడున్నా ప్రమోషన్ వస్తే మళ్లీ ట్రాన్స్ఫర్ అవుతుందన్న భావనతోనే వాళ్లు మ్యూచువల్కు ఒప్పుకుంటున్నట్టు చెప్తున్నారు.
