హైదరాబాద్, వెలుగు: సర్కారు దవాఖాన్లలో ఆర్థోపెడిక్ ఆపరేషన్లకు సౌలతులు లేక రోగులు ఇబ్బందులు పడుతున్నారు. డాక్టర్లున్నా, ఆపరేషన్లకు అవసరమైన పరికరాలు, యంత్రాలు లేకపోవడంతో, ప్రైవేటు హాస్పిటళ్లకు వెళుతున్నారు. రోడ్డు యాక్సిడెంట్లలో తీవ్రంగా గాయపడిన వాళ్లే ఎక్కువగా ఇబ్బందులు పడుతున్నారు. బొక్కల ఆపరేషన్ల కోసం కమ్యూనిటీ హెల్త్ సెంటర్లు, ఏరియా హాస్పిటళ్లకు వచ్చే రోగులను డాక్టర్లు పెద్దాస్పత్రులకు రిఫర్ చేస్తున్నారు. అందులో కొంత మంది ప్రైవేటు హాస్పిటళ్లకు వెళుతుండగా, మరికొందరు గాంధీ, ఉస్మానియా వంటి పెద్దాస్పత్రులకు పోతున్నారు. అయితే, గాంధీ, ఉస్మానియాల్లోనూ పేషెంట్లు ఎక్కువగా ఉండడం, పరికరాలు అరకొరగానే ఉంటుండడంతో, ఆపరేషన్ల కోసం వారం పది రోజులు వెయిట్ చేయాల్సి వస్తోంది. ఎమర్జెన్సీ కేసుల్లో ఒక్కోసారి వెంటనే ఆపరేషన్లు చేయాల్సిన అవసరం ఉంటుంది. ఆలస్యమైతే రోగి పరిస్థితి విషమించే ప్రమాదముంటుంది. కానీ, తీవ్రగాయాలతో వందల కిలోమీటర్ల దూరం నుంచి వచ్చి ఆస్పత్రిలో చేరినా వెంటనే ఆపరేషన్ చేసే పరిస్థితి హాస్పిటళ్లలో ఉండట్లేదు. పేషెంట్లు ఎక్కువగా వస్తుండడంతో ఇటు డాక్టర్లపైనా ఒత్తిడి పెరుగుతోంది.
ఏడాదవుతున్నా కదలని ఫైలు
ఆ సమస్యలను తీర్చేందుకు 35 ఏరియా హాస్పిటళ్లు, 6 జిల్లా హాస్పిటళ్లలో ఆర్థో ఆపరేషన్ థియేటర్లను అందుబాటులోకి తీసుకురావాలని ఏడాది కిందటే నిర్ణయించారు. మంత్రిగా బాధ్యతలు తీసుకున్నాక ఈటల రాజేందర్ తొలి సంతకం చేసిందీ ఆ ఫైలుపైనే. అయితే, ఏడాది అవుతున్నా ఫైలు ముందుకు కదలట్లేదు. ఆపరేషన్లకు అవసరమయ్యే సీఆర్మ్ యంత్రాలు, ఆర్థో టేబుల్స్ వంటి పరికరాల కొనుగోలు ప్రక్రియ టెండర్ల దశలోనే ఆగిపోయింది. ఇప్పటికీ అది కొనసాగుతోంది. మరోవైపు అటు ప్రజలతో పాటు, ఇటు ప్రభుత్వం బొక్కల ఆపరేషన్ల కోసం కోట్ల రూపాయలు వెచ్చిస్తోంది. ఆరోగ్యశ్రీ కింద చేస్తున్న ఆర్థో ఆపరేషన్లలో 90% ప్రైవేటు హాస్పిటళ్లలోనే జరుగుతున్నాయి. అందుకు సర్కారు ఏటా సుమారు రూ.130 కోట్ల దాకా ఖర్చు చేస్తోంది. ఆ ఆపరేషన్లలో కనీసం 50% ఆపరేషన్లను సర్కారు దవాఖాన్లలో చేస్తే ప్రభుత్వ ఖజానాకు రూ.60 నుంచి 70 కోట్లు ఆదా అవుతుంది.
