- ట్రేడ్ లైసెన్స్ల జారీపై ఫోకస్
- పన్నుల వసూళ్లపై నజర్
- ఆదాయ పెంపునకు కసరత్తులు
జనగామ, వెలుగు : మున్సిపాలిటీల పాలనను గాడిలోపెట్టేందుకు అధికార యంత్రాంగం కసరత్తులు పెంచింది. ప్రభుత్వ ఆదేశాలతో 100 రోజుల యాక్షన్ ప్లాన్ తో ముందుకు సాగుతోంది. పారిశుధ్య నిర్వహణతో పాటు పన్నుల వసూళ్లు, ట్రేడ్ లైసెన్స్ల జారీలు చేపట్టి ఆదాయ పెంపునకు చర్యలు చేపడుతున్నారు. రాష్ట్ర వ్యాప్తంగా జూన్ 2 నుంచి సెప్టెంబర్ 10 వరకు నిర్వహిస్తున్న మున్సిపల్ యాక్షన్ ప్లాన్ను ఉమ్మడి వరంగల్జిల్లాలో పటిష్టంగా అమలు చేసేందుకు అధికారులు చర్యలు ముమ్మరం చేశారు.
ఆదాయ పెంపు పై ఫోకస్..
మున్సిపల్ ఆదాయాన్ని పెంచుకునేందుకు అధికారులు ప్రత్యేక శ్రద్ధతో ముందుకు సాగుతున్నారు. ఇండ్లు, వ్యాపార, వాణిజ్య సముదాయాల అసెస్మెంట్ల పై దృష్టి సారించారు. గతంలో ఉన్న మేజర్మెంట్లను మళ్లీ వెరిఫై చేస్తూ సరిచేస్తున్నారు. విస్తీర్ణం ఎక్కువగా ఉన్నవాటికి అసెస్మెంట్లను పెంచుతున్నారు. జనగామ మున్సిపల్ పరిధిలో 2024-–25లో మొత్తంగా 1768 ట్రేడ్ లైసెన్స్లు ఉండగా, వాటి డిమాండ్ రూ 28.13 లక్షలుగా ఉంది. కాగా, సదరు వ్యాపార, వాణిజ్య దుకాణాలను మరోసారి రీ మేజర్మెంట్ జరిపి ట్రేడ్ లైసెన్స్లు ఇచ్చారు.
మున్సిపల్ సిబ్బంది హాస్పిటల్స్, హోటల్స్, షోరూం బిల్డింగ్లు, దుకాణాలు, వ్యాపార సముదాయాల వద్దకు చేరుకుని కొలతలు వేస్తున్నారు. గత మేజర్మెంట్కు ప్రస్తుత కొలతలకు తేడా ఉంటే అసెస్మెంట్లు పెంచేస్తున్నారు. అదేవిధంగా కొత్త దుకాణాలను తనిఖీ చేసి ట్రేడ్ లైసెన్స్లు జారీ చేస్తూ వస్తున్నారు. ఈ క్రమంలో 2025-–26కు ట్రేడ్ లైసెన్స్ల సంఖ్య 2125 కు పెరిగింది. 150 దుకాణాలకు రీ మెజర్మెంట్లు వేశారు. కొత్తగా 357 ట్రేడ్ లైసెన్స్ లు జారీ చేశారు.
ఇదిలాఉండగా జనగామ మున్సిపల్ పరిధిలో 15,574 అసెస్మెంట్లు ఉండగా, ఇందులో 12,841 నివాస గృహాలు, 1,088 నివాసేర గృహాలు, 1,645 మిక్స్డ్ గృహాలున్నాయి. వీటి నుంచి పన్నుల రూపంలో రూ 567.64 లక్షల ఆదాయం అంచనాలు ఉన్నాయి. కాగా, భువన్ సర్వేలో భాగంగా 2,730 ఇండ్లను రీ అసెస్మెంట్ చేయగా, రూ.44.89 లక్షల డిమాండ్ పెరిగినట్లు అధికారులు చెబుతున్నారు.
పారిశుధ్యంపై చర్యలు..
జనగామ పట్టణంలో జనాభా లక్ష దాటింది. 30 వార్డులు ఉండగా, 161 మంది పారిశుధ్య కార్మికులు విధులు చేపడుతున్నారు. ప్రతీ నెల సుమారు 20 లక్షలకు పైగా శానిటేషన్కు ఖర్చు చేస్తున్నారు. అయినా చెత్త సేకరణ మెరుగు పడడం లేదనే ఆరోపణలున్నాయి. మున్సిపల్పాలకవర్గం లేకపోవడంతో స్పెషల్ ఆఫీసర్గా లోకల్బాడీస్అడిషనల్కలెక్టర్ పింకేశ్కుమార్ బాధ్యతలు నిర్వహిస్తున్నారు. పలుమార్లు రివ్యూలు చేపట్టి మున్సిపల్ కమిషనర్తో పాటు సిబ్బందిని అలర్ట్ చేస్తూ వస్తున్నారు. ప్రస్తుత 100 రోజుల యాక్షన్ ప్లాన్తో పాలన గాడిలో పెట్టేందుకు ప్రత్యేక చర్యలు తీసుకుంటున్నారు. నిత్యం ఫీల్డ్ విజిట్లు చేస్తూ స్టాఫ్ను పరుగులు పెట్టిస్తున్నారు.
యాక్షన్ప్లాన్ను పటిష్టంగా అమలు చేస్తున్నం..
జనగామ మున్సిపల్ పరిధిలో 100 రోజుల యాక్షన్ ప్లాన్ను పటిష్టంగా అమలు చేస్తున్నం. వ్యాపార వాణిజ్య సముదాయాల కొలతలు వేసి అసెస్మెంట్లు వేస్తున్నం. ఆదాయ మార్గాలపై దృష్టి సారించాం. పారదర్శకంగా ట్రేడ్ లైసెన్స్ల జారీని చేపడుతున్నం. పారిశుధ్య నిర్వాహణపై ప్రత్యేక శ్రద్ధ పెట్టాం. మున్సిపల్ పనితీరును మెరుగు పర్చేందుకు చర్యలు తీసుకుంటున్నం. - పింకేశ్ కుమార్, అడిషనల్ కలెక్టర్, జనగామ
