- దశలవారీగా టెండర్ల ద్వారా సేకరణ
హైదరాబాద్, వెలుగు: గ్రీన్ ఎనర్జీ పాలసీలో భాగంగా రాష్ట్రంలో 3 వేల మెగావాట్ల సోలార్ పవర్ కొనుగోలు చేయాలని ప్రభుత్వం నిర్ణయం తీసుకున్నది. దశలవారీగా టెండర్ల ద్వారా సోలార్ పవర్ సేకరించాలని శనివారం ఉత్తర్వులు జారీ చేసింది.
సెప్టెంబర్ 9న జరిగిన రాష్ట్ర పవర్ ప్లానింగ్ కోఆర్డినేషన్ కమిటీ మీటింగ్లో టీజీ రెడ్కో వైస్ చైర్మన్, మేనేజింగ్ డైరెక్టర్ ఆర్సీవో లక్ష్యాలకు అనుగుణంగా 2030 నాటికి 12 వేల మెగావాట్ల సోలార్ విద్యుత్ అవసరం అని తెలిపారు. డిస్కమ్లను సమన్వయం చేస్తూ పోటీ బిడ్డింగ్ ద్వారా 5 వేల మెగావాట్ల సోలార్ విద్యుత్ సేకరణ ప్రక్రియ త్వరగా చేపట్టాలని ప్రతిపాదించారు.
ఎస్బీఐ క్యాపిటల్ మార్కెట్స్ లిమిటెడ్ సంస్థను కన్సల్టింగ్ ఏజెన్సీగా గుర్తించవచ్చని తెలిపారు. ఆర్ పీవో లక్ష్యాలకు అనుగుణంగా టీజీ డిస్కమ్లు దశలవారీగా 5 వేల మెగావాట్ల సోలార్ విద్యుత్ సేకరించడానికి, ఐఎస్టీఎస్ ద్వారా సౌర విద్యుత్ సేకరణ ప్రక్రియ ప్రారంభించడానికి తమకు అధికారం ఇవ్వాలని అభ్యర్థించారు.
స్పందించిన సర్కారు డిస్కామ్‌‌ల తరఫున ఇంటర్-స్టేట్ ట్రాన్స్‌‌మిషన్ సిస్టమ్, ఇంట్రా స్టేట్ ట్రాన్స్‌‌మిషన్ సిస్టమ్ ద్వారా 3 వేల మెగావాట్ల సోలార్ విద్యుత్ సేకరణ ప్రక్రియకు టీజీ రెడ్కో కు అనుమతి ఇస్తూ ఉత్తర్వులు జారీ చేసింది. దశలవారీగా 2026 జూన్ 26 నాటికి వెయ్యి, అదే ఏడాది డిసెంబర్ నాటికి మరో వెయ్యి, జూన్ 2027 నాటికి ఇంకో వెయ్యి చొప్పున సేకరించాల్సిందిగా ఆదేశాలు జారీ చేసింది.
