హైదరాబాద్, వెలుగు: రాష్ట్రంలో ప్రజల సగటు ఆదాయం ఏ స్థాయిలో పెరుగుతున్నదో.. అదే స్థాయిలో మత్తు పదార్థాలపై ఖర్చు కూడా పెరగడం ఆందోళన కలిగిస్తున్నది. మత్తు పదార్థాల వినియోగం తెలంగాణ దేశంలోనే టాప్ ప్లేస్లో ఉన్నది. ముఖ్యంగా పల్లెల్లో లిక్కర్, సిగరేట్ వాడకం చాలా ఎక్కువగా ఉంది. ఇండియన్ మేడ్ ఫారిన్ లిక్కర్ (విదేశీ మద్యం), బీరు తాగడంలో రూరల్ తెలంగాణ దేశంలోనే మొదటి స్థానంలో ఉన్నాయి. సిగరెట్లు తాగే విషయంలో ఐదో స్థానంలో ఉంది. నేషనల్ ఇన్‌‌స్టిట్యూట్ ఆఫ్ పబ్లిక్ ఫైనాన్స్ అండ్ పాలసీ అనే సంస్థ చేసిన స్టడీలో ఈ విషయాలు వెల్లడయ్యాయి. ఈ స్టడీ ప్రకారం, గ్రామీణ ప్రాంతాల్లో ప్రజలు దేశీయ మద్యం, కల్లు కూడా ఎక్కువగా తాగుతున్నారు. పొగాకు వాడకంలో కూడా తెలంగాణ ముందువరుసలో ఉంది.
బీడీలు తాగేవారి సంఖ్య తగ్గుతున్నప్పటికీ, సిగరెట్లు, నమిలే పొగాకు, గుట్కా వాడకం పెరుగుతున్నది. పట్టణాల్లో ఉన్న ధనవంతులు సిగరెట్లు, బీరు ఎక్కువగా తాగుతుండగా, పల్లెటూర్లలో తక్కువ, మధ్య ఆదాయం ఉన్నవారు నమిలే పొగాకు, సిగరెట్లను ఎక్కువగా వాడుతున్నారు. ఇక తెలంగాణలో మద్యం, పొగాకు కోసం చేసే ఖర్చు దేశంలోని చాలా రాష్ట్రాల కంటే ఎక్కువగా ఉంది. ఇది ప్రజల ఆరోగ్యానికి, రాష్ట్ర ఆర్థిక వ్యవస్థకు మంచిది కాదని నిపుణులు హెచ్చరిస్తున్నారు. మత్తు పదార్థాలపై పన్నులు పెంచడం ద్వారా వాటిని తగ్గించవచ్చని నివేదికలో పేర్కొన్నారు.
బీడీలు, గుట్కా వాడకం తక్కువ
తెలంగాణ గ్రామీణ ప్రాంతాల్లో ఒక వ్యక్తి సగటున ఏడాదికి విదేశీ మద్యం, బీరు కోసం రూ.3,061 ఖర్చు చేస్తున్నాడు. ఇది దేశంలోనే అత్యధికం. జాతీయ సగటు రూ. 486 మాత్రమే. పట్టణ ప్రాంతాల్లో కూడా ఈ ఖర్చు రూ. 2,926గా ఉంది. ఇది దేశంలో మూడో స్థానం. అంటే పల్లెల్లో, పట్టణాల్లో మందు అలవాటు పెరుగుతున్నదని తెలుస్తున్నది. స్థానిక మద్యం, కల్లు కోసం గ్రామీణ ప్రాంతాల్లో ఒక్కొక్కరు రూ.518 ఖర్చు చేస్తుండగా, పట్టణాల్లో రూ.87 మాత్రమే ఖర్చు చేస్తున్నారు. అంటే పల్లెల్లో స్థానిక మద్యం ఎక్కువగా వాడగా, పట్టణాల్లో మంచి బ్రాండ్లను కోరుకుంటున్నారు. పొగాకు విషయానికి వస్తే, గ్రామీణ ప్రాంతాల్లో సిగరెట్ల కోసం రూ.415 ఖర్చు చేస్తున్నారు. పట్టణాల్లో సిగరెట్ల కోసం రూ.624 ఖర్చు చేస్తున్నారు. అయితే బీడీలు, గుట్కా వాడకం మాత్రం దేశంలోని చాలా రాష్ట్రాల కంటే తక్కువగానే ఉంది.
తెలంగాణలో వార్షిక వ్యక్తిగత వినియోగ ఖర్చు గ్రామీణ ప్రాంతాల్లో రూ.57,627 (13వ ర్యాంకు), జాతీయ సగటు రూ. 45,277 కంటే ఎక్కువ. పట్టణంలో రూ.97,901 (5వ ర్యాంకు), జాతీయ సగటు రూ.77,504 కంటే ఎక్కువ. సిక్కిం (గ్రామీణ రూ.92,771, పట్టణ రూ.1,45,261), గోవా (గ్రామీణ రూ.88,399)లు అగ్రస్థానంలో ఉన్నారు. ఇది రాష్ట్రంలో ఆర్థిక వృద్ధి, అధిక ఆదాయాలను సూచిస్తుంది, కానీ మత్తు పదార్థాలపై ఖర్చు పెరగడం పేదరికం, ఆరోగ్య సమస్యలను పెంచుతుందని నివేదిక హెచ్చరిస్తుంది.
తెలంగాణ గ్రామీణ ప్రాంతాల్లో సిగరెట్లపై ఖర్చు రూ.415 (5వ ర్యాంకు), జాతీయ సగటు రూ. 113 కంటే మూడు రెట్లు ఎక్కువ. మిజోరం (రూ.1,313, 1వ ర్యాంకు), సిక్కిం (రూ.1,225, 2వ ర్యాంకు) తర్వాత తెలంగాణే ఉంది. పట్టణ ప్రాంతాల్లో సిగరెట్ల ఖర్చు రూ.624 (6వ ర్యాంకు), జాతీయ సగటు రూ.272 కంటే రెండు రెట్లు ఎక్కువ. ఇది బీడీల నుంచి సిగరెట్లకు మారుతున్న ధోరణిని సూచిస్తుంది.
బీడీలపై గ్రామీణ తెలంగాణలో ఖర్చు రూ.105 (17వ ర్యాంకు), జాతీయ సగటు రూ.138 కంటే తక్కువ. పట్టణంలో రూ.15 మాత్రమే (23వ ర్యాంకు), జాతీయ సగటు రూ.67 కంటే చాలా తక్కువ. రాజస్థాన్ (రూ. 438, 1వ ర్యాంకు), హర్యానా (రూ. 402, 2వ ర్యాంకు)లతో పోలిస్తే తెలంగాణలో బీడీ వినియోగం తక్కువగా ఉంది.
గుట్కా, నమిలే పొగాకుపై గ్రామీణ ఖర్చు రూ.124 (20వ ర్యాంకు), జాతీయ సగటు రూ.327 కంటే తక్కువ. పట్టణంలో రూ.114 (20వ ర్యాంకు), జాతీయ సగటు రూ.241 కంటే తక్కువ. మధ్యప్రదేశ్ (రూ.792, 1వ ర్యాంకు), అరుణాచల్ ప్రదేశ్ (రూ.533, 2వ ర్యాంకు)లతో పోలిస్తే తెలంగాణలో నమిలే పొగాకు వినియోగం తక్కువ.
