- ‘విజన్ 2047’లో భాగంగా సరికొత్త స్కిల్లింగ్ ఎకో సిస్టమ్‌
- యంగ్ ఇండియా స్కిల్స్ వర్సిటీకి అనుబంధంగా 100 స్కిల్ హబ్స్
- మెట్రో, హౌసింగ్ ప్రాజెక్టులే ఇకపై ‘లైవ్’ ట్రైనింగ్ సెంటర్లు
- పల్లెల్లో 100 శాతం డిజిటల్ లిటరసీ.. మహిళలకు ప్రత్యేక ప్రాధాన్యం
హైదరాబాద్, వెలుగు: రాబోయే 20 ఏండ్లలో రాష్ట్రంలో సుమారు 1.41 కోట్ల ఉద్యోగాలను సృష్టించడమే లక్ష్యంగా ప్రభుత్వం ముందుకెళ్తున్నది. ‘తెలంగాణ రైజింగ్ విజన్ 2047’లో భాగంగా ‘టాలెంట్ హైపర్‌‌లూప్ 2047’ పేరుతో సరికొత్త స్కిల్లింగ్ ఎకో సిస్టమ్‌‌ను ఆవిష్కరించింది.
డిగ్రీలు ఉన్నా స్కిల్స్ లేక ఇబ్బంది పడుతున్న యువతకు ఈ పాలసీ ఒక వరంగా మారుతుందని భావిస్తున్నది. సంప్రదాయ విద్యా విధానానికి భిన్నంగా, పరిశ్రమల అవసరాలే సిలబస్‌‌గా ‘యంగ్ ఇండియా స్కిల్స్ యూనివర్సిటీ’ని ఏర్పాటు చేస్తున్నది. దీని ఆధ్వర్యంలో రాష్ట్రవ్యాప్తంగా 100 ‘స్కిల్- అప్ హబ్స్’, 6 నుంచి 8 ‘సెంటర్స్ ఆఫ్ ఎక్సలెన్స్’ లను నెలకొల్పనున్నారు.
ఇవి కేవలం 4 గోడల మధ్య పాఠాలు చెప్పే కేంద్రాలుగా కాకుండా, మేకర్ స్పేసెస్, రిపేర్ కేఫ్‌‌లు, సర్వీస్ ల్యాబ్‌‌లతో కూడి ఉంటాయి. నీటి సరఫరా, విద్యుత్ నిర్వహణ, సాలిడ్ వేస్ట్ మేనేజ్‌‌మెంట్‌ లాంటి అంశాల్లో యువతకు ప్రాక్టికల్ నాలెడ్జ్ అందించనున్నారు.
పని నేర్చుకుంటూనే.
తరగతి గదిలో పాఠం వేరు.. ఫీల్డ్‌‌లో పని వేరు. ఈ గ్యాప్‌‌ను చెరిపేసేందుకు విజన్ –2047లో వినూత్న పద్ధతిని ప్రతిపాదించారు. రాష్ట్రంలో జరిగే భారీ పబ్లిక్ వర్క్స్ ప్రాజెక్టులైన మెట్రో రైలు నిర్మాణం, బీఆర్టీఎస్ కారిడార్లు, డబుల్ బెడ్రూం ఇండ్లు, వాటర్ గ్రిడ్ పనులనే ఇకపై ‘ఆన్-సైట్ ట్రైనింగ్ గ్రౌండ్స్’గా మారుస్తారు. అంటే పనులు జరుగుతుండగానే యువత అక్కడ ప్రత్యక్షంగా పాల్గొని, మిషీన్లను ఆపరేట్ చేయడం, టెక్నాలజీని నేర్చుకుంటారు.
దీనివల్ల ప్రాజెక్టు పూర్తయ్యే సరికి వేలాది మంది నిపుణులు తయారవుతారు. ఇక ఏ జిల్లాలో ఏ పరిశ్రమ ఉంటే.. అక్కడ ఆ రంగానికి సంబంధించిన నిపుణులను తయారు చేయడమే ఈ హైపర్‌‌లూప్ ప్రత్యేకత. భారత్ ఫ్యూచర్ సిటీ, ఫార్మా సిటీ, నిమ్జ్‌‌లాంటి ప్రాంతాల్లో ఆయా రంగాలకు (సీఎన్‌‌సీ, ఈవీ, ఫుడ్ ప్రాసెసింగ్, లాజిస్టిక్స్) సంబంధించిన సెక్టార్- స్పెసిఫిక్ వర్క్‌‌షాప్‌‌లను ఏర్పాటు చేస్తారు.
మిషన్ 1.41 కోట్లు.. ఇన్‌‌క్లూజివ్ గ్రోత్
రాష్ట్రంలో క్లస్టర్లవారీగా పరిశ్రమల అవసరాలను గుర్తించి, ప్రస్తుతం ఉన్న స్కిల్లింగ్ కెపాసిటీని 2 నుంచి 3 రెట్లు పెంచాలని ప్రభుత్వం నిర్ణయించింది. ‘హ్యూమన్ క్యాపిటల్ అండ్ ఇన్‌‌క్లూజన్ మిషన్’ కింద 2047 నాటికి ఏకంగా 1.41 కోట్ల ఉద్యోగాల కల్పనే టార్గెట్‌‌గా పెట్టుకున్నది.
ఇందులో మహిళలు, యువతతో పాటు వృద్ధులకు (సీనియర్ సిటిజన్లు) కూడా వారి అనుభవానికి తగిన ఉపాధి అవకాశాలు కల్పించేలా డిజైన్లను రూపొందిస్తున్నారు. ఏ వర్గాన్ని విడిచిపెట్టకుండా అందరికీ ఆర్థిక భరోసా కల్పించడమే ఈ మిషన్ ఉద్దేశం. గ్రామీణ ప్రాంతాల డెవలప్‌‌మెంట్‌‌కోసం ‘రూరల్ డిజిటల్ లిటరసీ అండ్ స్కిల్స్- టు -జాబ్స్ మిషన్’ను నివేదికలో చేర్చారు.
పల్లెల్లోని ప్రతి ఇంటికీ డిజిటల్ పరిజ్ఞానాన్ని అందిస్తూ, 100 శాతం డిజిటల్ లిటరసీ సాధించడమే లక్ష్యంగా పెట్టుకున్నారు. స్థానిక వ్యవసాయం, హస్తకళలకు ఆధునిక సాంకేతికతను జోడించి గ్రామీణ స్కిల్లింగ్ ఎకో సిస్టమ్‌‌ను నిర్మిస్తారు. ‘హబ్ -అండ్-స్పోక్ ’ విధానంలో శిక్షణా కేంద్రాలను ఏర్పాటు చేసి, ఇక్కడ శిక్షణ పొందిన యువతకు రాష్ట్ర, జాతీయ, అంతర్జాతీయస్థాయిలో ఉద్యోగాలు లభించేలా ఒక ప్రత్యేకమైన ‘ప్లేస్‌‌మెంట్ పైప్‌‌లైన్’ను ఏర్పాటు చేయనున్నారు.
