తెలంగాణ రాష్ట్రంలో మళ్లీ పెరిగిన చలి

• రాష్ట్రమంతా టెంపరేచర్లు 14 డిగ్రీలలోపే నమోదు
• 19 జిల్లాల్లో 12 డిగ్రీలలోపే.. అత్యల్పంగా కుమ్రంభీం జిల్లాలో 7.8 డిగ్రీలు 
• దక్షిణ తెలంగాణపై దిత్వా తుఫాను ప్రభావం.. రేపు మోస్తరు వర్షాలు  

హైదరాబాద్, వెలుగు:  రాష్ట్రంలో చలి మళ్లీ పెరిగింది. గత రెండు రోజులుగా ఉష్ణోగ్రతలు గణనీయంగా తగ్గాయి. శుక్రవారం అన్ని జిల్లాల్లోనూ చలి తీవ్రత కనిపించింది. 15 డిగ్రీల్లోపే రాత్రి ఉష్ణోగ్రతలు నమోదయ్యాయి. 19 జిల్లాల్లో 12 డిగ్రీలలోపే ఉష్ణోగ్రతలు రికార్డయ్యాయి. అత్యల్పంగా సంగారెడ్డి జిల్లా కోహిర్​లో రాత్రి ఉష్ణోగ్రత 7.8 డిగ్రీలు రికార్డయింది. 

కుమ్రంభీం ఆసిఫాబాద్ జిల్లా సిర్పూర్​లో 8.3, ఆదిలాబాద్ జిల్లా భీంపూర్​లో 9.2, వికారాబాద్ జిల్లా మర్పల్లిలో 9.5, కామారెడ్డి జిల్లా బోమనదేవిపల్లిలో 9.7, నిజామాబాద్ జిల్లా మదనపల్లి, రంగారెడ్డి జిల్లా మంగళపల్లి, రాజన్న సిరిసిల్ల జిల్లా రుద్రాంగిలో 10 డిగ్రీల చొప్పున నైట్ టెంపరేచర్లు రికార్డయ్యాయి. 

సిద్దిపేట, మెదక్, జగిత్యాల జిల్లాల్లోనూ10 డిగ్రీల మేరనే రాత్రి ఉష్ణోగ్రతలు నమోదయ్యాయి. మిగతా జిల్లాల్లో 11 నుంచి 14 డిగ్రీల మధ్య రికార్డయ్యాయి. జీహెచ్ఎంసీ పరిధిలోనూ పలు చోట్ల ఉష్ణోగ్రతలు11 డిగ్రీలకు పడిపోయాయి. అత్యల్పంగా బీహెచ్ఈఎల్ ఫ్యాక్టరీ వద్ద11.7, యూనివర్సిటీ ఆఫ్​హైదరాబాద్ వద్ద 11.8 డిగ్రీల మేర నైట్ టెంపరేచర్స్ నమోదయ్యాయి.  

దిత్వా తుఫాన్ ఎఫెక్ట్.. ​

రాష్ట్రంపై దిత్వా తుఫాను ఎఫెక్ట్​ స్వల్పంగా ఉండనుంది. ప్రస్తుతం ఈ తుఫాను చెన్నైకి దక్షిణంగా, పుదుచ్చేరికి దక్షిణాగ్నేయ దిశలో కేంద్రీకృతమై ఉన్నది. ఆదివారం నాటికి అది దక్షిణ ఏపీ తీరానికి చేరుకునే అవకాశం ఉంది. సాయంత్రం నాటికి నైరుతి బంగాళాఖాతంలో కేంద్రీకృతం కానుంది. 

దాని ప్రభావంతో ప్రస్తుతం తెలంగాణలో వాతావరణం మబ్బు పట్టి ఉన్నది. దీంతో పగటిపూట కూడా ఉష్ణోగ్రతలు తక్కువగానే నమోదయ్యాయి. దిత్వా తుఫాను ప్రభావంతో దక్షిణ తెలంగాణలోని నాలుగైదు జిల్లాలకు ఆదివారం అర్ధరాత్రి నుంచి మోస్తరు వర్షాలు పడే అవకాశం ఉన్నది. ఖమ్మం, నల్గొండ, సూర్యాపేట, నాగర్​కర్నూల్ జిల్లాల్లో మోస్తరు వర్షాలు పడతాయని ఐఎండీ తెలిపింది.