- ఎల్వోసీలో భారీ డంప్ స్వాధీనం
న్యూఢిల్లీ: జమ్మూ కాశ్మీర్లో ఉన్న జైళ్లపై దాడులు చేయాలని టెర్రరిస్టులు ప్లాన్ చేస్తున్నట్లు ఇంటెలిజెన్స్ వర్గాలు హెచ్చరించాయి. శ్రీనగర్ లోని సెంట్రల్ జైల్, జమ్మూలోని కోట్ బల్వాల్ జైల్ను టార్గెట్ చేసినట్లు సమాచారం. హై ప్రొఫైల్ టెర్రరిస్టులు, స్లీపర్ సెల్ మెంబర్లు ఈ జైల్లోనే ఉన్నారు. వీరిని విడిపించుకునేందుకే టెర్రరిస్టులు దాడులకు ప్లాన్ చేస్తున్నట్లు తెలుస్తున్నది. ఈ నేపథ్యంలో జైళ్ల వద్ద భద్రత కట్టుదిట్టం చేశారు. సీఐఎస్ఎఫ్ బలగాలను మోహరించారు. పరిస్థితులను బట్టి జైళ్లల్లో ఉన్న టెర్రరిస్టులను విడిపించుకోవడం లేదంటే మట్టుబెట్టేందుకు ప్లాన్ చేస్తున్నట్లు సమాచారం. దాడుల్లో డైరెక్ట్గా వీరి పాత్ర లేకపోయినప్పటికీ.. టెర్రరిస్టులకు షెల్టర్, ఆయుధాలు సమకూర్చడంలో కీలక పాత్ర పోషిస్తున్నట్లు సమాచారం.
పహల్గాం టెర్రరిస్ట్లకు పాక్ ఆర్మీ శిక్షణ
పహల్గాంలో టూరిస్టులను చంపిన ఉగ్రవాదులు పాకిస్తాన్ ఆర్మీ వద్ద ట్రైనింగ్ తీసుకున్నట్లు తెలుస్తున్నది. పాకిస్తాన్ స్పెషల్ సర్వీసెస్ గ్రూప్ వీరికి శిక్షణ ఇచ్చినట్లు సమాచారం. జమ్మూ కాశ్మీర్లో ఎలా దాడులు చేయాలి? తక్కువ టైమ్లో ఎక్కువ మందిని ఎలా చంపాలి? బ్యాకప్ ప్లాన్ గురించి పాక్ ఆర్మీ టెర్రరిస్టులకు ట్రైనింగ్ ఇచ్చింది. ఇప్పటికే జైల్లో ఉన్న పలువురు టెర్రరిస్టులను ఎన్ఐఏ అధికారులు విచారించగా.. ఈ విషయం తెలిసింది. పహల్గాంలో దాడికి పాల్పడిన ముగ్గురు టెర్రరిస్టుల్లో ఒకడైన హషీం మూసా.. పాకిస్తాన్ స్పెషల్ సర్వీస్ గ్రూప్ పారా కమాండోగా పని చేశాడు. తర్వాత లష్కరే తాయిబా టెర్రరిస్ట్ ఆర్గనైజేషన్లో జాయిన్ అయి పలు ఉగ్రదాడులకు పాల్పడ్డాడు.
2023లోనే మూసా ఇండియాలో అడుగుపెట్టాడు. మరికొంత మంది టెర్రరిస్టులకు మూసానే.. యుద్ధ వ్యూహాలు, పర్వత ప్రాంతాల్లో దాడులు, క్లోజ్ క్వార్టర్స్ యుద్ధం, తప్పించుకోవడంపై ట్రైనింగ్ ఇచ్చాడు. మూసా ఇంకా సౌత్ కాశ్మీర్లోని అటవీ ప్రాంతంలోనే దాక్కున్నట్లు సెక్యూరిటీ ఏజెన్సీలు భావిస్తున్నాయి. అతడి కోసం అడవిని జల్లెడ పడ్తున్నాయి. మూసాను పట్టిస్తే రూ.20 లక్షలు ఇస్తామని జమ్మూ పోలీసులు కూడా ఇప్పటికే ప్రకటించారు.
ఎల్వోసీ వెంట భారీ డంప్ స్వాధీనం
ఎల్వోసీ వద్ద టెర్రరిస్టులు దాచిపెట్టిన ఆయుధాల డంప్ను భద్రతా బలగాలు స్వాధీనం చేసుకున్నాయి. పూంచ్ జిల్లా సూరన్కోట్ ఏరియాలోని లైన్ ఆఫ్ కంట్రోల్ వెంట పోలీసులు, ఆర్మీ జవాన్లు జాయింట్గా రొటీన్ పెట్రోలింగ్ చేపట్టారు. ఆదివారం సాయంత్రం టెర్రరిస్టులు దాచిన డంప్ను గుర్తించారు. 5 ఐఈడీలను స్వాధీనం చేసుకున్నారు. వీటిలో 2 ఐఈడీలు స్టీల్ బకెట్లలో, 3 ఐఈడీలు టిఫిన్ బాక్సుల్లో ఫిట్ చేసి ఉంచారు. 2 వైర్‌‌‌‌లెస్ రేడియో సెట్లు, ఒక బైనాక్యులర్, 3 టోపీలు, 3 బ్లాంకెట్లు, ఐదు యూరియా ప్యాకెట్లు, 5 కిలోల గ్యాస్ సిలిండర్, కొన్ని బట్టలు, వంట సామాగ్రి దొరికాయి. ఐడీలను నిర్వీర్యం చేశారు. భారీ దాడికి టెర్రరిస్టులు ప్లాన్ చేసినట్లు ఈ డంప్ ద్వారా తెలుస్తున్నది.
