దెయ్యాలున్నాయని స్కూల్ కూల్చేసిండ్రు
ఒడిశాలో బహనగా స్కూల్ బిల్డింగ్ నేలమట్టం
రైలు ప్రమాద మృతదేహాలను ఉంచడమే కారణం
భయంతో బడికి రాలేమన్న టీచర్లు, విద్యార్థులు
బాలాసోర్ : ఒడిశా రైలు ప్రమాద ఘటనలో మృతదేహాలను ఉంచిన స్కూల్ను ఇవాళ అధికారులు కూల్చివేశారు. ఈ దుర్ఘటనను తలుచుకొని ఇప్పటికీ స్థానికులు భయాందోళనలకు గురవుతున్నారు. డెడ్బాడీలను బహానగా ప్రభుత్వ స్కూల్లో భద్రపరిచిన విషయం తెలిసిందే. మరో రెండు రోజుల్లో సెలవులు పూర్తవుతుండటంతో విద్యార్థులు, ఉపాధ్యాయులు స్కూలుకు వెళ్లాలంటే భయపడుతున్నారు. శవాలను ఉంచిన క్లాస్రూంలను చూసి వణికిపోతున్నారు.
దెయ్యాల భయంతో కొందరు.. శవాల కుప్పల దృశ్యాలను చూసి చెలించిన వారు మరికొందరు..! స్కూలుకు పిల్లల్ని పంపేందుకు నిరాకరిస్తున్నారు. ఈ విషయాన్ని ఆ స్కూల్ ప్రిన్సిపాల్ ఉన్నతాధికారులకు తెలియజేశారు. దీంతో విషయాన్ని అధికారుల దృష్టికి తీసుకువెళ్లారు. ఇవాళ కలెక్టర్ దత్తాత్రేయ శిండే ఆదేశాలతో ఆ బడి భవనాన్ని కూల్చివేశారు. స్కూల్ భవనం పాతదైపోవడం, దీనిని డెడ్బాడీల కోసం కేటాయించడం వంటి కారణాలు చూపుతూ.. కొత్త భవనం నిర్మించనున్నారు.
