- అన్ని శాఖల నుంచి అందిన వివరాలు
- 2023-24 బడ్జెట్ పై కసరత్తు షురూ
హైదరాబాద్, వెలుగు: రానున్న ఆర్థిక సంవత్సరం 2023–24కు సంబంధించిన బడ్జెట్ కసరత్తును ఫైనాన్స్ డిపార్ట్మెంట్ ప్రారంభించింది. ఇప్పటికే అన్ని డిపార్ట్మెంట్ల నుంచి ఆన్లైన్లో ప్రపోజల్స్ను స్వీకరించింది. ప్రస్తుత ఆర్థిక సంవత్సరంలో జరిపిన కేటాయింపులు.. వచ్చే ఏడాదికి సంబంధించిన అంచనాలపై అన్ని శాఖల సెక్రటరీలతో ఫైనాన్స్ స్పెషల్ సీఎస్ రామకృష్ణారావు చర్చించారు. కొత్త పథకాలు, ఏదైనా స్కీముకు పెంచాల్సిన బడ్జెట్ అంచనాలపై మంత్రి హరీశ్రావుతో ఎంసీహెచ్ఆర్డీలో గురువారం స్పెషల్ సీఎస్ భేటీ అయ్యారు. 2022–23లో రూ.2.56 లక్షల కోట్ల బడ్జెట్ పెట్టారు.
ఎన్నికల ఏడాది అయినప్పటికీ ఈసారి కూడా ఫుల్ బడ్జెట్ పెడుతున్నారు. డిసెంబర్ వరకు అవకాశం ఉండటం, అప్పటికి కేవలం 3 నెలలే మిగిలి ఉండటంతో పూర్తిస్థాయి బడ్జెట్ పెడుతున్నట్లు ఆఫీసర్లు చెప్తున్నారు. ప్రస్తుత ఆర్థిక సంవత్సరంలో ప్రభుత్వం అనుకున్న అప్పులను సమకూర్చుకోలేదు. ఇష్టారీతిన అప్పులు చేయడంతో కేంద్రం, ఆర్బీఐ కోత పెట్టాయి. దీంతో ఈ సారి ఆచితూచి ప్రపోజల్స్ పెట్టనున్నట్లు తెలిసింది. డిపార్ట్మెంట్ల నుంచి గతం కంటే దాదాపు 20% మేర బడ్జెట్ పెంపునకు ప్రపోజల్స్ రాగా, దానిని 5–10 శాతానికి పరిమితం చేయాలని ఆర్థిక శాఖ భావిస్తోంది.