- కొత్త జిల్లా యూనిట్గా కేటాయింపు
- ఇయ్యాల కలెక్టర్ నేతృత్వంలో గుర్తింపు
హైదరాబాద్, వెలుగు: వైన్ షాపుల్లో ఎస్సీ, ఎస్టీ, గౌడ్లకు వైన్స్లో రిజర్వేషన్లను కల్పించేందుకు రాష్ట్ర ప్రభుత్వం గైడ్ లైన్స్ను విడుదల చేసింది. డ్రా ద్వారా షాపులకు రిజర్వేషన్లను కేటాయిస్తారు. ఆ ప్రక్రియ మొత్తాన్ని వీడియో తీస్తారు. ఈమేరకు ఆదివారం ఆబ్కారీ శాఖ ఆ గైడ్ లైన్స్ను జారీ చేసింది. కొత్త జిల్లాలు యూనిట్గా మద్యం షాపులను కేటాయించనున్నారు. కలెక్టర్ నేతృత్వంలోని నలుగురు సభ్యుల కమిటీ రిజర్వేషన్లను అలాట్చేస్తుంది. కమిటీలో జిల్లా ఎక్సైజ్ అధికారి, గిరిజన అభివృద్ధి అధికారి, బీసీ సంక్షేమ శాఖ అధికారి, ఎస్సీ అభివృద్ధి అధికారి సభ్యులుగా ఉంటారు. వైన్ షాపుల్లో గౌడ్స్కు 15 శాతం, ఎస్సీలకు 10, ఎస్టీలకు 5 శాతం చొప్పున రిజర్వేషన్లను కేటాయిస్తూ రాష్ట్ర సర్కారు గతంలో ఉత్తర్వులు ఇచ్చిన సంగతి తెలిసిందే.
రిజర్వేషన్ ఇట్ల గుర్తిస్తరు..
వైన్షాపుల రిజర్వేషన్లకు షెడ్యూల్డ్ ఏరియాల్లో ఎలాంటి డ్రా తీయరు. ఇక్కడ గౌడ్స్, ఎస్సీలకు అవకాశం ఉండదు. నాన్ షెడ్యూల్డ్ ఏరియాల్లో మాత్రం గౌడ్స్, ఎస్సీలతోపాటు ఎస్టీలకు డ్రా తీస్తారు. జిల్లాల వారీగా డ్రా తీస్తారు. ఒక జిల్లాలో ఉన్న మొత్తం మద్యం దుకాణాలు, వాటి ఏరియాల పేరుతో ఓ డబ్బాలో టోకెన్లు వేస్తారు. ఇందులో మొదటగా ఎస్టీ టోకెన్ డ్రా తీస్తారు. టోకెన్ ఏ ఏరియా షాపు పేరు ఉంటుందో దాన్ని ఎస్టీ రిజర్వ్డ్గా గుర్తిస్తారు. ఆ తర్వాత వరుసగా ఎస్సీ, గౌడ్స్ టోకెన్లను డ్రా తీస్తారు. ఇలా వరుసగా రిజర్వేషన్ సంఖ్య కంప్లీట్ అయ్యేదాకా టోకెన్లు తీస్తూనే ఉంటారు. ఈ ప్రాసెస్ ప్రకారమే సోమవారం ఎస్సీ, ఎస్టీ, గౌడ్స్ రిజర్వేషన్లు ఖరారు చేయనున్నారు. సోమవారం సాయంత్రానికి ఏ ఏరియాలో వైన్షాపు రిజర్వ్ అయ్యిందో క్లారిటీ వచ్చే చాన్స్ ఉంది.