- బలవంతంగా సేల్ డీడ్లపై సంతకాలు చేయించారు
- అనంతగిరి రిజర్వాయర్పై హైకోర్టు తీర్పు.. రూల్స్ తుంగలో తొక్కారని వ్యాఖ్య
- ఎస్సీ, ఎస్టీలను అర్ధరాత్రి ఇళ్లు ఖాళీ చేయిస్తారా అని మండిపాటు
- ఎస్సీ కమిషన్తో విచారణ చేయించాలని సీఎస్కు ఆదేశాలు
హైదరాబాద్, వెలుగు: మల్లన్నసాగర్ రిజర్వాయర్లో భాగమైన అనంతగిరి జలాశయం కోసం రైతులను భయపెట్టి భూసేకరణ చేశారని హైకోర్టు ఆగ్రహం వ్యక్తం చేసింది. భూసేకరణ రూల్స్ను అధికారులు తుంగలో తొక్కారని, రాజ్యాంగాన్ని ఉల్లంఘించారని మండిపడింది. అనంతగిరి రిజర్వాయర్ నిర్మాణం కోసం చేపట్టిన భూసేకరణలో ఆర్ఆర్ ప్యాకేజీని అమలు చేయలేదంటూ దాఖలైన 3 రిట్లను విచారించిన జస్టిస్ ఎంఎస్ రామచంద్రరావు, జస్టిస్ కె. లక్ష్మణ్తో కూడిన బెంచ్ శుక్రవారం తీర్పు చెప్పింది. హైకోర్టు ఆదేశాలను అమలు చేయని సిద్దిపేట జిల్లా కలెక్టర్ పి. వెంకట్రామిరెడ్డి, ఆర్డీవో, భూసేకరణ అధికారి అనంతరెడ్డి, పోలీస్ కమిషనర్ జోయల్ డేవిస్, చిన్నకొండూరు ఇప్పటి, అప్పటి ఎమ్మార్వోలు శ్రీనివాస్రావు, పరమేశ్వర్ల సర్వీస్ రికార్డుల్లో ఈ ‘రిమార్క్’ను నమోదు చేయాలని సీఎస్ సోమేశ్కుమార్ను బెంచ్ ఆదేశించింది.
3 నెలల్లో పరిహారం చెల్లించండి
‘‘2016లో హైకోర్టు ఇచ్చిన ఉత్తర్వులను కావాలనే ఉల్లంఘించారు. రైతులను భయపెట్టి బలవంతంగా ల్యాండ్ సేల్ అగ్రిమెంట్లపై సంతకాలు పెట్టించారు. భూములు లాక్కున్నారు. ఇలా చేయడం రాజ్యాంగంలోని ఆర్టికల్ 14ను ఉల్లంఘించడమే. 300ఎ, భూసేకరణ చట్టంలోని రూల్స్కు పట్టించుకోలేదు. భూములకు రేట్లను ఇష్టానుసారంగా ఖరారు చేశారు. పిటిషనర్ల నుంచి పోయినేడాది జనవరి 15న తీసుకున్న భూములకు వాటి విలువ ఆధారంగా పరిహారాన్ని ఖరారు చేయాలి. రైతులకు నోటీసులు ఇచ్చి వారి వాదనలు వినాలి. ఆ తర్వాత 3 నెలల్లో ప్రభుత్వం పరిహారం చెల్లించాలి. ఇప్పటికే చెల్లిస్తే ఆ మొత్తాన్ని రికవరీ చేయకుండా పరిహారంలో సర్దుబాటు చేయాలి. మూడు పిటిషన్లల్లోని 61 మందికి రూ.5 వేల చొప్పున ఇరిగేషన్ ముఖ్య కార్యదర్శి చెల్లించాలి. సాగు భూములకు 2016లో, ఇళ్లకు 2020లో విడివిడిగా నోటిఫికేషన్లు ఇచ్చినందున రెండింటికీ విడివిడిగా ఆర్ఆర్ ప్యాకేజీ అమలు చేయాలి. పునరావాసం, పునర్నిర్మాణం చట్టంలోని రూల్స్ ప్రకారం 18 ఏళ్లు నిండిన పెళ్లికాని వారిని ప్రత్యేక కుటుంబంగా లెక్కలోకి తీసుకుని పరిహారం ఇవ్వాలి. హైకోర్టు ఉత్తర్వుల్ని అమలు చేయని ఆ అధికారులందరి సర్వీస్ రికార్డుల్లో వారికి వ్యతిరేకంగా సీఎస్ రికార్డు చేయాలి. కోర్టుకు వచ్చిన పిటిషనర్లల్లో 11 మంది ఎస్సీలున్నారు. వీళ్లను అర్ధరాత్రి ఖాళీ చేయించడం ఎస్సీ, ఎస్టీ అత్యాచార నిరోధక చట్టాన్ని ఉల్లంఘించడమే అవుతుంది. కాబట్టి ఆ అధికారులపై నేషనల్ ఎస్సీ కమిషన్ విచారణ చేసి చట్ట ఉల్లంఘన చేశారని తేలితే చర్యలపై సర్కారుకు తగిన సిఫార్సులు చేయాలి’’ అని హైకోర్టు
తీర్పు చెప్పింది.
