అన్న మృతి.. తమ్ముడికి సీరియస్
పాపన్నపేట, వెలుగు: అర్ధరాత్రి పడుకుని ఉన్న అన్నదమ్ములను పాము కాటేసిన ఘటనలో అన్న మృతిచెందగా తమ్ముడి పరిస్థితి సీరియస్గా ఉంది. మెదక్ జిల్లా పాపన్నపేట మండలం దౌలాపూర్ కు చెందిన జింక కేశమ్మ, నారాయణ దంపతులకు ఒక కూతురు, ఇద్దరు కొడుకులు ఉన్నారు. రోజులాగే గురువారం రాత్రి అందరూ భోజనంచేసి ఇంట్లో నిద్రపోయారు. అర్ధరాత్రి పెద్ద కొడుకు రామ్చరణ్(11) వాంతులు చేసుకున్నాడు. కొద్దిసేపటికి చిన్నకొడుకు నర్సింలు(6)కు కడుపునొప్పి రావడంతో తల్లిదండ్రులు అనుమానించి ఇంట్లో వెతకగా టీవీ దగ్గర పాము కనిపించింది. వెంటనే పామును చంపేశారు. రాంచరణ్ తీవ్ర అస్వస్థతకు గురికావడంతో పాము కరిచిందని మెదక్ ఆసుపత్రికి తీసుకెళ్లారు. పరిస్థితి విషమించడంతో హైదరాబాద్కు తరలిస్తుండగా శుక్రవారం తెల్లవారుజామున మృతిచెందాడు. గ్రామంలో మధ్యాహ్నం రామ్ చరణ్ అంత్యక్రియలు నిర్వహిస్తుండగా నర్సింలు తీవ్ర అస్వస్థతకు గురయ్యాడు. వెంటనే గ్రామస్థులు అతన్ని మెదక్ దవాఖానకు తరలించారు. పరిస్థితి విషమంగా ఉండడంతో అక్కడి నుంచి హైదరాబాద్లోని ఓ ప్రైవేటు దవాఖానకు తీసుకెళ్లారు. పాముకాటుతో ఓ కొడుకు మృతిచెందడం, మరో కొడుకు పరిస్థితి సీరియస్గా ఉండడంతో టెన్షన్తో కేశమ్మ, నారాయణ దంపతులు అనారోగ్యానికి గురయ్యారు. దాంతో వారిద్దరిని మెదక్ ప్రభుత్వ ఆసుపత్రికి తరలించారు. ఒకే రోజు ఒకే కుటుంబంలో ఒక బాలుడు చనిపోవడం, మరో ముగ్గురు ఆస్వస్థతకు గురికావడంతో గ్రామంలో విషాదచాయలు
అలుముకున్నాయి.
