- ప్రతిపాదనల్లోనే గజ్వేల్ స్పోర్ట్స్హబ్
- భూమి కేటాయించి ఏడాది పూర్తి
- ఫండ్స్రిలీజ్ కోసం ఎదురుచూపులు
- రూ.40కోట్లతో నిర్మించనున్న స్పోర్ట్స్హబ్
సిద్దిపేట, వెలుగు: అంతర్జాతీయ ప్రమాణాలతో సిద్దిపేట జిల్లా గజ్వేల్లో నిర్మించాలనుకున్న స్పోర్ట్స్హబ్ప్రతిపాదనలకే పరిమితమైంది. ఏడాది క్రితం దాదాపు రూ.40 కోట్లతో స్పోర్ట్స్హబ్ నిర్మించాలని నిర్ణయించారు. ఇందుకు స్థలం కూడా కేటాయించారు. ఫండ్స్ మంజూరు కాకపోవడంతో పనులు ప్రారంభం కాలేదు. సీఎం కేసీఆర్ ప్రాతినిధ్యం వహిస్తున్న నియోజకవర్గం కావడంతో నిర్మాణం త్వరగా పూర్తవుతుందని క్రీడాకారులు, గజ్వేల్వాసులు భావించినా నేటికీ పనులు ప్రారంభం కాకపోవడం గమనార్హం.
అన్ని క్రీడలకు వేదికగా..
అన్ని క్రీడలు ఆడేలా అంతర్జాతీయ ప్రమాణాలతో గజ్వేల్ స్పోర్ట్స్హబ్ నిర్మించాలని నిర్ణయించారు. ఈ స్పోర్ట్స్హబ్లో అథ్లెటిక్ ట్రాక్, ఇండోర్ స్టేడియం, స్విమ్మింగ్ పూల్, క్రికెట్, ఫుట్ బాల్ గ్రౌండ్ లు ఏర్పాటుచేయాలని ప్రతిపాదించారు. దీనికి సంబంధించి స్పోర్ట్స్అండ్ యూత్అఫైర్స్ డిపార్ట్మెంట్ కొన్ని నెలల క్రితం రూ.40 కోట్లతో డీటెయిల్ ప్రాజెక్టు రిపోర్టును తయారు చేసి గజ్వేల్ ఏరియా డెవలప్మెంట్ అథారిటీ(గడా) కు సమర్పించింది. హబ్నిర్మాణానికి 28 ఎకరాలు అవసరమవుతాయని రిపోర్ట్లో ప్రతిపాదించగా సర్కారు 20 ఎకరాలను కేటాయించింది. కానీ ఫండ్స్ మాత్రం రిలీజ్చేయలేదు.
రూ.70 కోట్లతో గడా ప్రతిపాదనలు
స్పోర్ట్స్హబ్నిర్మాణానికి గడా ఏడాది క్రితం సర్కారుకు ప్రతిపాదనలు పంపినా, ఇంకా పరిశీలనలోనే ఉన్నాయి. గడా పంపినా ప్రతిపాదనల్లో గజ్వేల్లో మినీ స్టేడియం ఆవరణలో స్పోర్ట్స్హబ్ కోసం రూ.40 కోట్లు, తూఫ్రాన్ , ములుగుల్లో మినీ స్టేడియాల నిర్మాణం కోసం మరో రూ.30 కోట్లు కేటాయించాలని ప్రభుత్వాన్ని కి కోరింది. ఇంత వరకు ఒక్క రూపాయి మంజూరు కాలేదు. ఇటీవల ఫుట్ బాల్ పోటీల కోసం ఇక్కడే రూ.30 లక్షలతో గ్రౌండ్ నిర్మించగా, ఈ ప్లేస్లోనే ఫుట్ బాల్ గ్రౌండ్ ను నిర్మించాలని భావిస్తున్నారు.
ప్రభుత్వానికి ప్రతిపాదనలు పంపాం..
గజ్వేల్ స్పోర్ట్హబ్ నిర్మించాలని గడా తీర్మానం మేరకు ప్రభుత్వానికి రూ.70 కోట్లతో ప్రతిపాదనలు పంపించాం. సర్కారు ఆమోదముద్ర వేసి ఫండ్స్రిలీజ్చేయగానే పనులు ప్రారంభిస్తాం.
- ముత్యంరెడ్డి, గడా స్పెషల్ ఆఫీసర్
