ఆ దిశగానే పుతిన్ అడుగులు..
రిఫరెండం పెట్టి స్వతంత్ర రిపబ్లిక్లుగా ప్రకటన
గుర్తించబోమన్న అమెరికా
జపోరిజియా: ఉక్రెయిన్లోని తూర్పు ప్రాంతంలో స్వాధీనం చేసుకున్న ప్రాంతాలను రష్యాలో విలీనం చేసేందుకు ప్రయత్నాలు జరుగుతున్నాయని అమెరికా అనుమానిస్తోంది. ఈ దిశగా రష్యా ప్రెసిడెంట్ వ్లాదిమిర్ పుతిన్ అడుగులు వేస్తున్నారని ఆరోపిస్తోంది. అలాగే మరియుపోల్లోని స్టీల్ప్లాంట్ నుంచి సామాన్య పౌరుల తరలింపు ప్రక్రియ ప్రారంభమైన ఒకరోజు తర్వాత ప్లాంట్పై కొత్తగా దాడులను మొదలుపెట్టింది రష్యా. మరియుపోల్సిటీలో ఇంకా ఉక్రెయిన్ బలగాల ఆధిపత్యం ఉన్నది మాత్రం స్టీల్ప్లాంట్ పరిసరాల్లోనే. అందువల్లే ప్లాంట్ను ఎలాగైనా చేజిక్కించుకోవాలని
ప్రయత్నాలు చేస్తోంది.
మేం గుర్తించబోం : అమెరికా
ఉక్రెయిన్ తూర్పు ప్రాంతంలో స్వాధీనం చేసుకున్న ఖేర్సన్ సిటీని స్వతంత్ర రిపబ్లిక్గా గుర్తించేందుకు రష్యా ప్రయత్నాలు చేస్తోందని యూరోప్లో సెక్యూరిటీ, కోఆపరేషన్ ఆర్గనైజేషన్లో అమెరికా రాయబారి మైఖెల్ కార్పెంటర్ చెప్పారు. ఇలాంటి చర్యలను అమెరికా కానీ, దాని మిత్రపక్షాలు గానీ గుర్తించేది లేదని స్పష్టం చేశారు. తాను స్వాధీనం చేసుకున్న డొనెట్స్క్, లుహాన్స్క్ ల్లో రెఫరెండం నిర్వహించి.. ప్రజాస్వామ్య పద్ధతిలో వాటిని గుర్తించినట్టుగా ప్రకటించి.. ఆ తర్వాత తమ దేశంలో విలీనం చేసుకునేందుకు రష్యా ప్రయత్నిస్తోందని ఆయన ఆరోపించారు. ఖేర్సన్లో కూడా ఇలాంటిదే స్వతంత్ర ఓటింగ్ నిర్వహించే ప్రయత్నం చేస్తోందన్నారు. ఈ ప్రాంతాల్లోని మేయర్లు, స్థానిక ప్రజాప్రతినిధులను కిడ్నాప్ చేస్తున్నారని, ఇంటర్నెట్, సెల్ఫోన్ సర్వీసులను కంట్రోల్ చేస్తున్నారని చెప్పారు. అలాగే త్వరలోనే ఇక్కడ రష్యన్ స్కూల్ కరిక్యులమ్ను అమలు చేసేందుకు ప్రయత్నిస్తోందని అన్నారు.
పుతిన్కు సర్జరీ?
రష్యా ప్రెసిడెంట్ పుతిన్ కేన్సర్కు సర్జరీ చేయించుకోనున్నారని, తాత్కాలికంగా అధికార బాధ్యతలను సెక్యూరిటీ కౌన్సిల్ సెక్రటరీ నికోలాయ్ పత్రుషెవ్కు అప్పగిస్తారని న్యూయార్క్ పోస్ట్ ప్రత్యేక కథనం ప్రచురించింది. కొద్ది వారాలుగా పుతిన్ ఆరోగ్య పరిస్థితిపై సందేహాలు వ్యక్తమవుతున్నాయి. కిందటి నెలలో రష్యా రక్షణ మంత్రి సెర్గీ షోయిగుతో మీటింగ్ సందర్భంగా పుతిన్ పూర్తిగా డెస్క్కే పరిమితం కావడం వీటికి బలం చేకూర్చింది. కేన్సర్తో బాధపడుతున్న పుతిన్ తప్పనిసరిగా సర్జరీ చేయించుకోవాలని డాక్టర్లు సూచించారని న్యూయార్క్ పోస్ట్ పేర్కొంది. ఈ విషయాన్ని రష్యన్ ఫారిన్ ఇంటెలిజెన్స్ సర్వీసెస్ మాజీ లెఫ్టినెంట్ జనరల్ నడుపుతున్న టెలిగ్రామ్ చానల్లో వెల్లడించారని తెలిపింది. అయితే ఈ సర్జరీ ఎందుకు చేస్తున్నారు, రికవరీ కావడానికి ఎంత టైం పడుతుంది అనే వివరాలు వెల్లడించలేదు. కొద్దికాలం పుతిన్ పదవికి దూరంగా ఉంటారని పేర్కొంది. అయితే, ఈ కథనాలను పూర్తిగా నమ్మలేమని పెంటగాన్ వర్గాలు చెప్పాయి.