- కమిషన్ చైర్మన్, ముగ్గురు మెంబర్ల
- రాజీనామా.. ఆమోదించని గవర్నర్
- రిజైన్ చేయబోమంటున్న ఇంకో ఇద్దరు మెంబర్లు
- కొత్త బోర్డు వస్తేనే రిక్రూట్మెంట్, రిజల్ట్స్పై ముందుకు
హైదరాబాద్, వెలుగు: తెలంగాణ స్టేట్ పబ్లిక్ సర్వీస్ కమిషన్ (టీఎస్పీఎస్సీ) ఎగ్జామ్స్పై క్లారిటీ రావడం లేదు. గ్రూప్ 2 పరీక్షల తేదీలను అసెంబ్లీ ఎన్నికల టైమ్లో కమిషన్ ప్రకటించినప్పటికీ.. ఇప్పుడు వాటిని ఆ తేదీల్లో నిర్వహిస్తారా లేదా అన్నదీ డౌటే. కాంగ్రెస్ ప్రభుత్వం రాగానే కమిషన్ చైర్మన్ తో పాటు మరో ముగ్గురు సభ్యులు రాజీనామా చేశారు. ఆ రాజీనామాలపై ఇప్పటికీ గవర్నర్ ఎలాంటి నిర్ణయం తీసుకోలేదు. మరోపక్క ఇంకో ఇద్దరు సభ్యులు మాత్రం ఎప్పటిలాగే విధుల్లో కొనసాగుతున్నారు. రాజీనామాలను గవర్నర్ ఆమోదించి కొత్త బోర్డు వస్తేనే.. కమిషన్ కార్యాచరణ, ఎగ్జామ్స్ నిర్వహణపై స్పష్టత రానుంది.
ఏడాది రెండేండ్లుగా టీఎస్పీఎస్సీ తీరు వివాదాస్పదంగా మారింది. పలు పరీక్షలు లీకేజీతో రద్దు కావడంతో పాటు కొన్ని ఎగ్జామ్స్ వాయిదా పడ్డాయి. టీఎస్పీఎస్సీ అధికారుల తీరును, గత బీఆర్ఎస్ ప్రభుత్వ వైఖరిని నిరుద్యోగులు తీవ్రంగా తప్పుబట్టారు. కమిషన్ బోర్డును రద్దు చేయాలని పెద్ద ఎత్తున ఆందోళనలు నిర్వహించారు. అప్పటి సర్కార్ కేవలం సిట్ వేసి చేతులు దులుపుకుంది. ఈ క్రమంలో తాము అధికారంలోకి వస్తే టీఎస్పీఎస్సీని ప్రక్షాళన చేస్తామని కాంగ్రెస్ తన ఎన్నికల మేనిఫెస్టోలో ప్రకటించింది. ఈ నెల 7న కాంగ్రెస్ సర్కారు కొలువుదీరింది. ఈ నెల11న సెక్రటేరియెట్లో సీఎం రేవంత్ రెడ్డిని టీఎస్పీఎస్సీ చైర్మన్ జనార్దన్ రెడ్డి కలిసి.. అనంతరం రాజ్ భవన్లో తన రాజీనామా లేఖను ఇచ్చారు. తర్వాతి రెండ్రోజులకే కమిషన్ మెంబర్లు కూడా సీఎంను కలిశారు. గవర్నర్ తమిళిసై అపాయింట్ మెంట్ దొరక్కపోవడంతో సభ్యులు ఆర్. సత్యనారాయణ, కారం రవీందర్ రెడ్డి, లింగారెడ్డి తమ పదవులకు రాజీనామా చేస్తున్నట్టు రాజ్ భవన్కు లేఖలు పంపించారు.
రాజ్ భవన్ నుంచి నో రెస్పాన్స్
కమిషన్ చైర్మన్ జనార్దన్ రెడ్డి, కమిషన్మెంబర్లు కారం రవీందర్ రెడ్డి, సత్యనారాయణ, బండి లింగారెడ్డి తాము రాజీనామా చేసి రాజ్ భవన్లో లేఖలు ఇచ్చినట్టు చెప్పారు. కానీ,దీనిపై ఇప్పటికీ ఎలాంటి అధికారిక ప్రకటన రాజ్ భవన్ నుంచి రాలేదు. రాజీనామాలపైగవర్నర్ నిర్ణయాన్ని బట్టే కొత్త బోర్డును ఏర్పాటు చేసే అవకాశం ఉంది. కొత్త బోర్డు వస్తే గానీ..పరీక్షల నిర్వహణపై క్లారిటీ రాదు.
ఆ ఇద్దరు రాజీనామాకు నో
కమిషన్ లో మొత్తం ఐదుగురు సభ్యుల్లో ముగ్గురు రాజీనామా చేయగా.. ఇంకో ఇద్దరు సభ్యులు సుమిత్రానంద్ తనోబా, అరుణ కుమారి మాత్రం రాజీనామా చేయలేదు. రెగ్యులర్గా వారిద్దరూ కమిషన్ ఆఫీస్కు వచ్చి వెళ్తున్నారు. లీకేజీల్లో తమ తప్పేమీ లేదని, అలాంటప్పుడు ఎందుకు రాజీనామా చేయాలన్న ఆలోచనలో వాళ్లు ఉన్నట్లు తెలుస్తున్నది. కొత్త గవర్నమెంట్ రాగానే రాజీనామాలు చేస్తే.. తాము తప్పుచేశామనే భావన ఉంటుందని ఓ మెంబర్ అన్నారు. కొత్త గవర్నమెంట్ సిట్టింగ్ జడ్జితో విచారణ జరిపిస్తామని చెప్పిందని, అలా జరిపిస్తే ఎక్కడ తప్పు జరిగిందో తెలుస్తుందని పేర్కొన్నారు. తమ సర్వీస్ ను వదులుకొని సేవ చేయాలనే కమిషన్లోకి వచ్చామని, గవర్నమెంట్ మారినంత మాత్రాన రాజీనామా చేయాలనడం సరికాదని అన్నారు.
గ్రూప్ 2 పరీక్షల తేదీలు ప్రకటించినా..జరిగేది డౌటే!
గ్రూప్ 2 ఎగ్జామ్స్ జనవరి 6, 7 తేదీల్లో నిర్వహిస్తామని ఎన్నికల సమయంలో టీఎస్పీఎస్సీ ప్రకటించింది. రాష్ట్రంలో 783 గ్రూప్ 2 పోస్టుల భర్తీకి ఏడాది కింద నోటిఫికేషన్ ఇవ్వగా.. ఇప్పటికే రెండుసార్లు ఈ పరీక్షలు వాయిదాపడ్డాయి. కమిషన్ చైర్మన్, మరో ముగ్గురు సభ్యులు రాజీనామా చేయడం, కమిషన్ ప్రక్షాళన ఇష్యూ నేపథ్యంలో మరోసారి గ్రూప్ 2 ఎగ్జామ్స్ వాయిదా పడే అవకాశం ఉంది. అయితే.. వాయిదా అంశాన్ని మాత్రం అధికారికంగా ఎవరూ ప్రకటించలేదు. కమిషన్లో చైర్మన్ లేదా మినిమం ముగ్గురు సభ్యులు ఉంటేనే పరీక్షల నిర్వహణ గురించైనా, వాయిదా గురించైనా ప్రకటించే చాన్స్ ఉందని అధికారులు అంటున్నారు. ఇక.. గ్రూప్ 1, గ్రూప్ 3 తదితర పరీక్షల నిర్వహణ అంశం కూడా పెండింగ్లో పడింది. 9,210 పోస్టుల భర్తీకోసం నిర్వహించిన గ్రూప్ 4 ఫలితాలు విడుదల కాలేదు. వీటికోసం లక్షలాది మంది ఎదురుచూస్తున్నారు. పలు పోస్టులకు సంబంధించిన ఫలితాలు కూడా రావాల్సి ఉంది.
