వర్క్ ఫ్రం హోమ్…. అంటే ఒకవైపు ఇంటి పని చేస్తూనే, మరోవైపు ఉద్యోగ బాధ్యతలు నెరవేర్చడం. అందుకే వర్క్ ఫ్రం హోమ్కు చాలామంది ఇంట్రెస్ట్ చూపుతారు. అయితే ఆఫీసుకి వెళ్లకుండా ఇంటి పనులు చూసుకుంటూ, జాబ్ చేయడం చాలా ఈజీ అనుకుంటారు. కానీ కష్టం కూడా. వర్క్ ఫ్రం హోం చేయాలంటే సరైన ప్లానింగ్, టైం మేనేజ్మెంట్ ఉండాలి.
ఆఫీస్లో ఉన్నట్టు ఇంట్లో ఉదయం నుంచి సాయంత్రం దాకా, కదలకుండా కూర్చొని పని చేయడం సాధ్యమయ్యే పని కాదు. ప్రశాంతమైన వాతావరణం క్రియేట్ చేసుకోవాలి. అందుకు చేయాల్సినవి, చేయకూడనివి ఉంటాయి. కొన్ని కండిషన్స్ ఉంటేనే ఇది సాధ్యం.
సోషల్ మీడియాకు దూరం
ఆఫీస్ వర్క్లో ఉన్నప్పుడు ఇంట్లోనే ఉన్నాం కదా అని ఫోన్లో మాట్లాడటం, సోషల్ మీడియా లో చాటింగ్ లాంటివి చేయడం వల్ల తెలియకుండానే టైం వేస్ట్ అవుతుంది. ల్యాప్టాప్, పుస్తకాలు, ఫైళ్లు తమ పరిధిలోనే ఉంచుకోవాలి. ఒకవేళ పిల్లల కంటపడితే విలువైన సమాచారం మాయమవుతుంది. అందుకని విడిగా స్పేస్ క్రియేట్ చేసుకోవాలి. ఇంట్లో పని ఏదైనా ఉంటే, అది పూర్తి కాకుండా కంప్యూటర్ ముందు కూర్చోవద్దు. అలా చేస్తే పనులు పెండింగ్ పడతాయి. పని వేళలను నచ్చినట్టుగా సెట్ చేసుకుంటే వర్క్ హాయిగా చేసుకోగలుగుతారు. పనితో పాటు నచ్చిన హాబీస్కు టైం ఇవ్వాలి. వీలుంటే ఫ్యామిలీ మెంబర్స్తో గడపాలి.
కచ్చితమైన టైంలో
డెడ్లైన్ దగ్గర పడుతున్నప్పుడు ఇంటి పనులపై ఫోకస్ తగ్గించాలి. ఆడవాళ్లు అయితే పిల్లలను చూసుకునే బాధ్యతను ఫ్యామిలీ మెంబర్స్, లేదా ఫ్రెండ్స్కు అప్పగించాలి. పిల్లలు నిద్ర పోయినప్పుడు, స్కూల్కి వెళ్లినప్పుడు ఆ టైం కచ్చితంగా ఉపయోగించుకోవాలి. సిస్టమ్ ముందు కూర్చున్నప్పుడు, అప్పుడప్పుడు రెస్ట్ తీసుకోవాలి. అటూఇటూ నడవడం, కొద్దిగా బయటికి వెళ్లి రావడం చేయాలి.
సెపరేట్ స్పేస్
మర్నాడు చేయాల్సిన పనిని ముందు రోజు రాత్రే ప్లాన్ చేసుకోవాలి. పర్సనల్ లైఫ్ నుంచి ఇంటి పని వరకు, అన్నింటికీ ప్లానింగ్ ఉండాలి. దేనికి ఎంత టైం ఇవ్వాలో రాసి పెట్టుకోవాలి. అలా అన్నీ ప్లాన్ ప్రకారం చేస్తేనే అనుకున్నది సాధిస్తారు. ఇంట్లో ఉండే ఆడవాళ్లు కొంతమంది అన్ని పనులు తామే చేయాలనుకుంటారు. పక్కవాళ్ల సాయం తీసుకోవాలనుకోరు. అది తప్పు. ఒంట్లో అలసటగా ఉన్నప్పుడు, పని ఒత్తిడి ఎక్కువైనప్పుడు పిల్లలకు తినిపించడం, స్కూల్కి రెడీ చేయడం, వంట చేయడం వంటి పనుల్లో కుటుంబ సభ్యుల సాయం తీసుకోవాలి. పని వేళలను ప్లాన్ చేసుకునేటప్పుడు కొన్ని జాగ్రత్తలు తీసుకోవాలి. ప్రశాంతమైన వాతావరణం ఉన్నప్పుడే పని మొదలుపెట్టాలి. అంటే ఎర్లీ మార్నింగ్ లేదా నైట్ టైంలో ప్లాన్ చేసుకుంటే వర్క్కు ఎలాంటి ఇబ్బందులు ఉండవు. అన్నింటికన్నా ముఖ్యమైన విషయం ఏంటంటే అన్ని పనులు ఒకేసారి చేస్తున్నప్పుడు ఒక్కోసారి విజయం రాకపోవచ్చు. ఆర్థికంగానూ ఇబ్బందులు ఎదురవ్వొచ్చు. అలాంటప్పుడు కుంగిపోకుండా మళ్లీ ప్రయత్నించాలి.
వర్క్ షెడ్యూల్
డెడ్లైన్ దగ్గర పడుతున్న కొద్దీ తెలియకుండానే ఒత్తిడి పడుతుంది. దాన్ని కచ్చితంగా అధిగమించేందుకు ప్రయత్నించాలి. వర్క్ షెడ్యూల్ని సరిగా ప్లాన్ చేసుకోలేక ఇబ్బంది పడతారు. ఇంకొందరు పనిలో ఉన్నప్పుడు ఇతర విషయాల్లో చొరవ తీసుకోవడం, టైం వేస్ట్ చేయడం లాంటివి చేస్తుంటారు. అలాకాకుండా కాన్ఫిడెంట్గా పని చేస్తే, వచ్చే డెడ్లైన్ టెన్షన్ ఉండదు. బలాలు పెంచుకుంటూ, బలహీనతలను కూడా తగ్గించుకుంటూ పోవాలి. అప్పుడే అనుకున్నది సాధించగలరు.
వీటిలో అవకాశాలు ఎక్కువ
- డాన్స్, మ్యూజిక్ స్కిల్ నేర్పించడం
- ఫ్రీలాన్స్ రైటింగ్, ఎడిటింగ్
- ఆన్లైన్ ట్యూటర్ (ఎడ్యుకేషన్, ఫిట్నెస్)
- క్యాటరింగ్, బేకింగ్, సాఫ్ట్ స్కిల్స్లో ట్రైనింగ్.
ఆఫీస్లో కన్నా ఇంటి దగ్గర పనిచేయడానికి చాలామంది ఇంట్రెస్ట్ చూపుతున్నారు. ట్రాఫిక్ ఇబ్బందులు తప్పించుకోవచ్చని, టైం సేవ్ అవుతుందని, జర్నీ ఖర్చులు కలిసొస్తాయని చాలామంది ఉద్యోగుల మాట. ఇంటి నుంచి పనిచేయడం వల్ల కంపెనీ ప్రొడక్టివిటీ బాగా పెరుగుతుందని కొన్ని సర్వేలు కూడా చెప్తున్నాయి. ఆఫీసులకు వెళ్లి ఒత్తిడితో ఇబ్బంది పడటం కన్నా ఇంట్లో పనిచేసుకోవడం మేలని యూత్ అంటున్నారు.