హైదరాబాద్, వెలుగు: ఆర్టీసీ విలీన బిల్లును గవర్నర్ తమిళిసై వెంటనే ఆమోదించాలని ఆర్టీసీ టీఎంయూ జనరల్ సెక్రటరీ థామస్ రెడ్డి డిమాండ్ చేశారు. లేదంటే రాజ్ భవన్ ను మళ్లీ ముట్టడిస్తామని హెచ్చరించారు. బుధవారం సెక్రటేరియెట్ మీడియా పాయింట్లో ఆయన మాట్లాడారు. అసెంబ్లీ బిల్లు ఆమోదించి వారం దాటిందన్నారు. ఇంకా గవర్నర్ ఆమోదించలేదని చెప్పారు. ఏపీలో పర్యటించి అక్కడి కార్మికులు, అధికారులను కలిసి వివరాలు సేకరించామని, ఆ రిపోర్ట్ను ప్రభుత్వానికి అందజేశామని తెలిపారు. ఈ నెల నుంచే ఆర్టీసీ కార్మికులను ప్రభుత్వ ఉద్యోగులుగా గుర్తించాలని, న్యాయం చేయాలని డిమాండ్ చేశారు.
