- ప్రమాదంలో ఇద్దరు, కాపాడుతుంటే ఇంకొకరు మృతి
- జార్ఖండ్లోని త్రికూట పర్వతాలపై ప్రమాదం
రాంచీ: అది జార్ఖండ్లోని త్రికూట పర్వతాలపై ఉన్న రోప్వే.. బాగా పేరున్న టూరిస్టు ప్లేస్ కావడంతో ఆదివారం జనం పోటెత్తారు. శ్రీరామ నవమి కూడా కావడంతో ఆ కొండల్లోని బాబా బైద్యనాథ్ గుడికి పెద్ద సంఖ్యలో భక్తులు వచ్చారు. కొండల మధ్య ఉన్న లోయను దాటడానికి కేబుల్ కార్లోకి ఎక్కారు. రోప్వేకు బిగించిన 25 కేబుల్ కార్లలో ఓ కార్ కంట్రోల్ తప్పి మరోదాన్ని ఢీ కొట్టింది. దీంతో ఇద్దరు టూరిస్టులు చనిపోగా చాలా మందికి దెబ్బలు తగిలినయ్. ఈ ప్రమాదం తర్వాత కేబుల్ కార్లన్నీ ఎక్కడ ఉన్నయి అక్కడ్నే ఆగిపోయినయ్. 12 కేబుల్ కార్లలో 48 మంది టూరిస్టులు చిక్కుకుపోయారు. సోమవారం సాయంత్రం దాకా 19 గంటల పాటు భయంభయంగా గడిపారు. వారిని కాపాడడానికి వచ్చిన ఎన్డీఆర్ఎఫ్ సిబ్బంది డ్రోన్లతో ఆహారాన్ని పంపించారు. చివరకు ఎయిర్ఫోర్స్ టీమ్ స్పెషల్ హెలికాప్టర్ ద్వారా బాధితులను బయటకు తీసుకొచ్చారు. ఈ క్రమంలో ఓ టూరిస్టు హెలికాప్టర్ నుంచి కిందపడి చనిపోయాడు. దీంతో చనిపోయిన వాళ్ల సంఖ్య మూడుకు పెరిగింది. ఈ ప్రమాదంపై జార్ఖండ్ సీఎం హేమంత్ సోరెన్ విచారం వ్యక్తంచేశారు. యాక్సిడెంట్ ఎలా జరిగిందని తేల్చేందుకు దర్యాప్తు చేయాలని అధికారులను ఆదేశించారు.
అసలేం జరిగింది..
శ్రీరామ నవమి కావడంతో ఆదివారం త్రికూట పర్వతాల్లోని బాబా బైద్యనాథ్గుడికి భక్తులు పోటెత్తారు. రాష్ట్రంలోని ప్రముఖ టూరిస్టు ప్లేస్ కావడంతో సరదాగా గడిపేందుకు మరికొందరు వచ్చారు. గుడికి వెళ్లాలంటే రెండు కొండల మధ్య ఉన్న రోప్ వే ఎక్కాల్సిందే. దాదాపు 25 కేబుల్ కార్లు అటూఇటూ తిరుగుతుంటాయి. ఆదివారం సాయంత్రం దాదాపు 5 గంటల ప్రాంతంలో కిందికి వెళుతున్న ఓ కేబుల్ కారు, పైకి వస్తున్న మరో కేబుల్ కారును వేగంగా ఢీ కొట్టింది. దీంతో ఆ కేబుల్ కార్లలోని ఇద్దరు టూరిస్టులు చనిపోయారు. ఈ ప్రమాదంతో కేబుల్ కార్లన్నీ ఎక్కడివక్కడే ఆగిపోయినయ్. రోప్ వే మధ్యలో 12 కేబుల్ కార్లు ఆగిపోగా.. అందులో పిల్లాపాపలతో కలిపి 48 మంది చిక్కుకుపోయారు. వాళ్లను కాపాడేందుకు ఎన్డీఆర్ఎఫ్, ఐటీబీపీ సిబ్బంది రంగంలోకి దిగారు. రోప్ వే మరమ్మతు చేయడానికి, కేబుల్కార్లలో చిక్కుకున్నోళ్లను బయటకు తీసుకొచ్చేందుకు ప్రయత్నించారు. చీకటి కారణంగా రెస్క్యూ పనులకు ఆటంకం కలిగింది. సోమవారం మధ్యాహ్నానికి ఎయిర్ఫోర్స్ రెస్క్యూ టీమ్ త్రికూట హిల్స్ కు చేరుకుంది. దాదాపు 19 గంటల తర్వాత హెలికాప్టర్తో బాధితులను క్షేమంగా తీసుకురావడం మొదలెట్టిన్రు. ఈ క్రమంలో ఓ టూరిస్టు హెలికాప్టర్లోకి ఎక్కుతుండగా చేయిజారి కింద లోయలో పడ్డాడు. మిగతా వారిని కాపాడినట్లు అధికారులు తెలిపారు.
రెస్క్యూ లో ట్రాజెడీ..
కేబుల్ కార్లలో చిక్కుకున్నోళ్లను కాపాడేందు కు చేపట్టిన రెస్క్యూ పనుల్లో విషాదం నెల కొంది. ఎయిర్ఫోర్స్ సిబ్బంది హెలికాప్టర్తో సహాయక చర్యలు చేపట్టారు. బాధితులను కేబుల్ కార్లలో నుంచి హెలికాప్టర్లోకి చేర్చి, తర్వాత కిందకు తెచ్చారు. రోప్వే పైన హెలికాప్టర్ను నిలిపి, ఓ తాడును కేబుల్ కార్లోకి వదిలారు. దీంతో ఒక్కొక్కరుగా పైకి వచ్చారు. ఈ క్రమంలో ఓ వ్యక్తి మాత్రం బాగా టెన్షన్ పడ్డడు. హెలికాప్టర్ లోపలికి వెళ్లే క్రమంలో చెయ్యి జారింది. దీంతో కింద లోయలో పడి చనిపోయాడు. కింద ఉన్న జనంలో కొంతమంది ఈ ప్రమాదాన్ని రికార్డు చేసి సోషల్ మీడియాలో పెట్టారు.