యాదాద్రి, వెలుగు : తన భూమి తనకు ఇప్పించాలని యాదాద్రి జిల్లా అడిషనల్ కలెక్టర్ శ్రీనివాసరెడ్డి కాళ్లు మొక్కాడో వృద్ధ రైతు. తహసీల్దార్ మోసం చేసి తన భూమిని తమ్ముడి పేరుపై మార్చి పాస్బుక్ ఇచ్చారని కంప్లయింట్ చేశాడు. జిల్లాలోని మోటకొండూరు మండలం ముత్తిరెడ్డి గూడానికి చెందిన ఏకు చిన్న లక్ష్మారెడ్డి కథనం ప్రకారం...లక్ష్మారెడ్డికి సర్వే నంబర్817లో 2.10 ఎకరాల వ్యవసాయ భూమి ఉంది. ఇందులో ఎకరం భూమిని లక్ష్మారెడ్డి తమ్ముడు సంజీవరెడ్డి ఆక్రమించుకొని రెవెన్యూ రికార్డుల్లో నమోదు చేయించుకున్నాడు. ఈ భూమి విషయంలో లక్ష్మారెడ్డి హైకోర్టుకు వెళ్లగా కేసు కొనసాగుతోంది. ఇదే క్రమంలో లక్ష్మారెడ్డి పేరుపై ఉన్న 1.10 ఎకరాల్లో ఎకరం భూమిని సంజీవరెడ్డి పేరుపై మోటకొండూరు తహసీల్దార్ 817 /15/ 2 గా నమోదు చేసి పట్టాదారు పాస్బుక్ఇచ్చాడు. ఈ విషయం ధరణి రికార్డుల ద్వారా తెలుసుకుని తహసీల్దార్కు కంప్లయింట్ చేశాడు. ఎన్నిసార్లు చెప్పినా ఆయన పట్టించుకోకపోవడంతో గురువారం అడిషనల్ కలెక్టర్ శ్రీనివాసరెడ్డిని కలిశాడు. ఫిర్యాదు కాపీని అడిషనల్ కలెక్టర్ చదువుతుండగా ఆయన కాళ్లు మొక్కాడు. దీంతో వారించిన అడిషనల్ కలెక్టర్ న్యాయం చేస్తానని హామీ ఇచ్చారు. ఈ వయస్సులో తిరగలేకపోతున్నానని, తొందరగా న్యాయం చేయాలని కోరాడు.
