- విజృంభిస్తున్న గులాబీ, కాండం ముక్కు పురుగు
- ఆందోళన చెందుతున్న భద్రాద్రికొత్తగూడెం రైతులు
భద్రాద్రికొత్తగూడెం, వెలుగు :భద్రాద్రి జిల్లా రైతాంగాన్ని టొబాకో స్ట్రీక్ వైరస్ ఆందోళనకు గురిచేస్తోంది. ఖరీఫ్ ప్రారంభంలో వరదలు రావడం, ఆ తరువాత వర్షాలు రాకపోవడంతో టెన్షన్ పడిన రైతులు ఇటీవల వానలు పడడంతో ఊరట చెందారు. ఇప్పుడిప్పుడే పత్తి ఏపుగా పెరిగి పూతకు వచ్చిన దశలో వైరస్లు, పురుగులు, తెగుళ్లు సోకుతుండడంతో రైతులు ఆందోళన చెందుతున్నారు. పత్తిని టొబాకో స్ట్రీక్ వైరస్తో పాటు గులాబీ పురుగు, కాండం ముక్కు పురుగు ఆశించిందని, ఇది దిగుబడిపై ప్రభావం చూపుతుందని సైంటిస్టులు హెచ్చరించడంతో నష్టాలు తప్పవని రైతులు వాపోతున్నారు.
పత్తికి కష్ట కాలమే..
భద్రాద్రికొత్తగూడెం జిల్లాలో ఈ వానాకాలం సీజన్ 1.58 లక్షల ఎకరాల్లో పత్తి సాగు చేశారు. రాష్ట్ర వ్యాప్తంగా 45 లక్షల ఎకరాలకు పైగా పత్తి సాగు చేసినట్లు వ్యవసాయ శాఖ అధికారుల లెక్కలు చెబుతున్నాయి. ఈ ఏడాది రాష్ట్రంలోని మహబూబాబాద్, వరంగల్, కరీంనగర్, నిజామాబాద్,భద్రాద్రికొత్తగూడెం జిల్లాలో టొబాకో స్ట్రీక్ వైరస్ ఆశించినట్లు సైంటిస్టులు గుర్తించారు. ఇప్పటికే పలు జిల్లాల్లో గులాబీ పురుగు రైతులను ఆందోళనకు గురి చేస్తోంది. జిల్లాలో 60 వేల ఎకరాల్లో కాండం ముక్కు పురుగు పత్తిని ఆశించింది. జిల్లాలోని చండ్రుగొండ, గుండాల, టేకులపల్లి, చర్ల, పాల్వంచ తదితర మండలాల్లో ఈ తెగులు ఎక్కువగా ఆశించినట్లు శాస్త్రవేత్తలు గుర్తించారు. స్ట్రీక్ వైరస్ దాడి ఇప్పుడిప్పుడే మొదలవుతోందని వ్యవసాయ అధికారులు తెలిపారు. వైరస్, పురుగుల దాడితో పూత రాలిపోవడం, కాండం విరిగిపోవడంతో రైతులు ఆందోళన చెందుతున్నారు. తామర పురుగు ద్వారా టొబాకో స్ట్రీక్ వైరస్ వ్యాపిస్తున్నట్లుగా సైంటిస్టులు గుర్తించారు.
ఇష్టం వచ్చినట్లు మందులు కొట్టొద్దు..
టొబాకో స్ట్రీక్ వైరస్ సోకిన మొక్కల్లో కొమ్మల చివర లేత ఆకులు కొద్దిగా పసుపు వర్ణానికి మారి చిన్నవిగా ఉంటాయని భద్రాద్రికొత్తగూడెం కృషి విజ్ఞాన కేంద్రం కో ఆర్డినేటర్ లక్ష్మీనారాయణమ్మ తెలిపారు. వ్యాధి సోకిన కొమ్మల్లో ఎదుగుదల ఆగి గడసబారుతాయని, మొగ్గలు ఎండి రాలిపోతాయని చెప్పారు. ఆకుల్లో కొంత భాగం రాలిపోయి వంకర తిరిగినట్లు కుంచించుకుపోతాయని తెలిపారు. ఈ వైరస్ను అరికట్టేందుకు గట్ల వెంట పెరిగే వయ్యారి భామ, ఉత్తరేణి, గడ్డి చామంతి వంటి కలుపు మొక్కలను పూతకు రాకముందే పీకి కాల్చేయాలని సూచించారు. తామర పురుగు వ్యాప్తిని అరికడితే టొబాకో స్ట్రీక్ వైరస్ ఉధృతి కూడా తగ్గుతుందని తెలిపారు. వైరస్, తెగుళ్లను అరికట్టేందుకు రైతులు వ్యవసాయ అధికారులు, కృషి విజ్ఞాన కేంద్రం శాస్త్రవేత్తల సలహాలు తీసుకోవాలన్నారు. ఇష్టం వచ్చినట్టుగా మందులు కొట్టి నష్టపోవద్దని సూచించారు.
