టేకులపల్లి, వెలుగు: మహిళ అంతిమ యాత్రలో పటాకులు పేలి నలుగురు గాయపడిన ఘటన బుధవారం భద్రాద్రి కొత్తగూడెం జిల్లా టేకులపల్లి మండలం వెంకట్యతండాలో జరిగింది. వివరాల్లోకి వెళ్తే.. గ్రామంలోని ఓ మహిళ అంతిమ యాత్ర కోసం పటాకులను డీఏ ట్రాలీ క్యాబిన్లో ఉంచగా, ముందుగా కాల్చిన పటాకుల నిప్పురవ్వలు క్యాబిన్లో పడటంతో మంటలు చెలరేగాయి.
ఈ ఘటనలో భూక్య రాణా ప్రతాప్, ఆంగోతు ధ్రువంత్, ధరావత్ రవితేజ, నవీన్ గాయపడ్డారు. వీరిని టేకులపల్లి రిమ్స్ ఆస్పత్రికి తరలించగా, రాణాప్రతాప్, ధ్రువంత్ పరిస్థితి విషమంగా ఉండడంతో మెరుగైన వైద్యం కోసం ఖమ్మం ఆస్పత్రికి తరలించారు. ఎస్సై కె.తిరుపతి ఘటనాస్థలాన్ని పరిశీలించి కేసు నమోదు చేసి దర్యాప్తు చేస్తున్నారు.
