భద్రాద్రి కొత్తగూడెం, వెలుగు : భద్రాద్రి కొత్తగూడెం జిల్లా చుంచుపల్లి మండలంలోని త్రీ ఇంక్లైన్ లో నిర్మించిన డబుల్ బెడ్రూం ఇండ్లు ఖాళీగా ఉంటుండడంతో గిరిజనులు గురువారం ఆక్రమించుకున్నారు. పది డబుల్ బెడ్రూం ఇండ్లు ఐదారేండ్లుగా నిరూపయోగంగా ఉన్నాయని, ఎవరికీ ఇవ్వడం లేదని సామాన్లతో పాటు లోపలకు వెళ్లారు. విషయం తెలుసుకున్న స్థానికులు గిరిజనులను అడ్డుకున్నారు. స్థానికులమైన తమకు ఇవ్వకుండా సర్పంచ్ తండావాసులను ఉసిగొల్పి ఆక్రమించుకునేలా చేశారని ఆరోపించారు.
ఈ సందర్భంగా రెండు వర్గాల మధ్య వాగ్వాదం జరిగింది. తహసీల్దార్ ఆఫీస్కు ఫోన్ చేసి చెప్పడంతో రెవెన్యూ ఇన్స్పెక్టర్అక్కడకు చేరుకొని గిరిజనులతో చర్చలు జరిపారు. ఇన్నేండ్ల నుంచి ఇండ్లను ఖాళీగా పెట్టారని, తమలాంటి పేదలకు ఎందుకు ఇవ్వడం లేదని ప్రశ్నించారు. ఆర్ఐ ఇండ్లు ఖాళీ చేయకపోతే కేసులు పెడతామని హెచ్చరించడంతో సామాన్లు తీసుకుని వెళ్లిపోయారు.
