హైదరాబాద్, వెలుగు: ప్రాణహిత చేవెళ్ల ప్రాజెక్టులో భాగంగా తుమ్మిడిహెట్టి వద్ద ప్రభుత్వం నిర్మించనున్న బ్యారేజీ డిటెయిల్డ్ ప్రాజెక్ట్రిపోర్ట్ (డీపీఆర్) తయారీకి ఒక్కటే టెండర్ వచ్చింది. రూ.9.94 కోట్లతో ఈ నెల 10న ఇరిగేషన్ డిపార్ట్ మెంట్ బెల్లంపల్లి సర్కిల్ ఎస్ఈ టెండర్నోటీసు జారీ చేశారు. మరిన్ని టెక్నికల్అంశాలను జోడిస్తూ 18న దానికి కొరిజెండంను చేర్చారు.
ఈ నెల 26 వరకు టెండర్ గడువును విధించగా.. కేవలం ఒక్క సంస్థనే ఇప్పటి వరకు టెండర్ను దాఖలు చేసినట్టు తెలిసింది. అయితే, ఆ ఒక్క సంస్థ ఏంటన్నది మాత్రం సోమవారం లేదా మంగళవారం తేలనుంది. ఆ సంస్థ అర్హతలను అధికారులు పరిశీలిస్తున్నారు.
అనంతరం ఫైనాన్షియల్ బిడ్లను పిలిచే అవకాశం ఉంది. టెండర్ నోటీసుల్లో జాయింట్వెంచర్సంస్థలకు అవకాశం ఇవ్వబోమని ఇరిగేషన్ శాఖ స్పష్టం చేసింది. ప్రభుత్వ రంగ సంస్థ లేదా ఐఐటీలతో ఎంవోయూ చేసుకున్న సంస్థలకు ప్రాధాన్యం ఇస్తామని పేర్కొంది. కాగా, ప్రస్తుతం ఈ డీపీఆర్ టెండర్పై గందరగోళ పరిస్థితులు నెలకొన్నాయి.
ప్రస్తుతం రాష్ట్రంలో స్థానిక సంస్థల ఎన్నికల కోడ్ అమల్లో ఉండడంతో.. ప్రైస్ బిడ్లు ఓపెన్ చేయాలా వద్దా అన్న ఆలోచనలో అధికారులు పడ్డారు. దీనిపై ప్రభుత్వానికి ఇరిగేషన్ శాఖ అధికారులు లేఖ రాయాలని భావిస్తున్నారు. ప్రభుత్వం నుంచి వచ్చే స్పందన ఆధారంగా అధికారులు ముందుకు వెళ్లాలనుకుంటున్నట్టు తెలిసింది.
