తుషార్ కపూర్ లెటెస్ట్ మూవీ 'మారిచ్' (Maarrich) విడుదలకు డేట్ ఫిక్స్ చేశారు. డిసెంబర్ 9వ తేదీన థియేటర్లలో విడుదల చేయనున్నట్లు చిత్ర యూనిట్ అధికారికంగా ప్రకటించింది. NH స్టూడియోస్‌తో కలిసి తుషార్ ఎంటర్‌టైన్‌మెంట్ ఈ సినిమాను రూపొందించగా Dhruv Lather దర్శకత్వం వహించారు. కపూర్ తో పాటు నరేంద్ర హిరావత్, శ్రేయాన్స్ హిరావత్ లు నిర్మాతలుగా వ్యవహరిస్తున్నారు. ఈ మూవీలో కపూర్ పోలీస్ అధికారి పాత్రను పోషించారు. ఈ సినిమా తనకు ఎంతో నచ్చిందని కపూర్ వెల్లడించారు.
’లక్ష్మీ‘ అనంతరం నిర్మాతగా ‘మారిచ్’ తనకు రెండో సినిమా అని, చాలాకాలం తర్వాత నసీరుద్దీన్ షాతో నటించడం జరిగిందన్నారు. గతంలో నటించిన సినిమాలకంటే ఈ మూవీ డిఫరెంట్ గా ఉంటుందనే అభిప్రాయం వ్యక్తం చేశారు. ఇందులో తన పాత్రను ప్రేక్షకులు ఇష్టపడుతారన్నారు. డిసెంబర్ 9న ప్రేక్షకుల ముందుకు తీసుకొస్తుండడం చాలా సంతోషంగా ఉందన్నారు. 2011లో వచ్చిన ‘ది డర్టీ పిక్చర్’ సినిమాలో కపూర్, షాలు నటించారు. ఈ సినిమా విమర్శకుల ప్రశంసలు పొందింది. ఓ మర్డర్ మిస్టరీ నేపథ్యంలో ‘మారిచ్’ తెరకెక్కింది.
