ఖార్కివ్: ఉక్రెయిన్తో యుద్ధంలో రష్యాకు ఎదురుదెబ్బలు కొనసాగుతున్నాయి. రష్యన్ మిలిటరీకి చెందిన 52 యుద్ధ ట్యాంకులను ఉక్రెయిన్ఒకే దాడితో ధ్వంసం చేసింది. సివర్స్కి డోనెట్స్ నదీ తీరంలో కీలకమైన ఓ రూట్ను దాటుతుండగా ఈ దాడి జరిగింది. దీనికి సంబంధించిన శాటిలైట్ ఫొటోలను ఉక్రెయిన్ రక్షణ శాఖ మీడియాకు విడుదల చేసింది. ఇందులో ధ్వంసమైన ట్యాంకర్ల నుంచి పొగలు వస్తున్నట్టుగా కనిపించింది. ఖార్కివ్కు 25 కిలోమీటర్ల దూరంలో ఉన్న ఈ ప్రాంతం కొంతకాలంగా రష్యా అధీనంలో ఉంది. సివర్స్కి డోనెట్స్ నదీ తీరంలో రష్యా, ఉక్రెయిన్కు తీవ్ర పోరాటం జరిగిందని, చాలా ప్రాంతాలను తిరిగి ఉక్రెయిన్ స్వాధీనం చేసుకుందని అంతర్జాతీయ మీడియా సంస్థ రాయిటర్స్ వెల్లడించింది. తమకు అమెరికా, యూరోప్ దేశాలు అందించిన ఆయుధాలు ఎంతగానో ఉపయోగపడుతున్నాయని ఉక్రెయిన్ సైనికుడు ఒకరు చెప్పారు.
ఉక్రెయిన్ను వీడిన 60 లక్షల మంది: యూఎన్
యుద్ధం వల్ల 60 లక్షల మందికిపైగా ప్రజలు ఉక్రెయిన్ను విడిచిపెట్టి పక్క దేశాలకు వెళ్లినట్టు యూఎన్ రెఫ్యూజీ ఏజెన్సీ వెల్లడించింది. ఇందులో సగానికిపైగా జనం పొరుగు దేశమైన పోలెండ్కు వెళ్లినట్టు పేర్కొంది. ఇందులో 90% మంది మహిళలు, చిన్నారులే ఉన్నట్టు తెలిపింది. మరోవైపు, రష్యాపై యుద్ధ నేరాల అభియోగాలు పెరిగిపోతున్నాయి. వేలాది మందిని ఇంటరాగేషన్ క్యాంపులకు తరలిస్తున్నారనే ఆరోపణలు కూడా రష్యాపై ఉన్నాయి. రష్యా సైనికులు సాధారణ పౌరులను చంపారని, చిత్రహింసలు పెట్టారని, అత్యాచారాలకు పాల్పడ్డారని విమర్శలు వెల్లువెత్తాయి. రష్యా సైనికులు ఇద్దరు సాధారణ పౌరులను తుపాకులతో కాల్చిచంపుతున్న ఘటనలకు సంబంధించిన వీడియోలను సీఎన్ఎన్, బీబీసీ రిలీజ్ చేశాయి. వారిని చాలా క్రూరంగా చంపినట్టుగా ఈ వీడియోల్లో స్పష్టమవుతోంది. దీనిని యుద్ధ నేరంగా దర్యాప్తు చేయాలని సీఎన్ఎన్ డిమాండ్ చేసింది. ఉక్రెయిన్లో రష్యా బలగాల ఆకృత్యాలపై విచారణ జరపాలని యూఎన్ మానవ హక్కుల మండలి 33–2 ఓట్లతో ఆమోదించింది. కాగా, రష్యా యుద్ధ నేరాలకు సంబంధించి తమకు పది వేలకు పైగా ఫిర్యాదులు అందాయని ఉక్రెయిన్ ప్రాసిక్యూటర్లు తెలిపారు.
యుద్ధ నేరాల కింద రష్యా సైనికుడి విచారణ
యుద్ధం మొదలైన తర్వాత తొలి వార్ క్రైం దర్యాప్తు శుక్రవారం మొదలైంది. ఒక రష్యన్ సైనికుడిపై యుద్ధ నేరాల కింద కీవ్లో విచారణ ప్రారంభమైంది. యుద్ధం మొదలైన వారంలో ఓ ఉక్రెయిన్ పౌరుడి మరణానికి కారణమయ్యాడన్న ఆరోపణల పై రష్యా ట్యాంక్ యూనిట్కు చెందిన 21 ఏండ్ల సైనికుడిని కోర్టులో హాజరుపరిచా రు. ఉక్రెయిన్ చట్టాల ప్రకారం అతడికి జీవిత ఖైదు విధించే అవకాశం ఉంది.
