- కేసీఆర్దిగిపో.. నీకు క్షణం కూడా సీఎంగా ఉండే అర్హత లేదు: అమిత్ షా
- పేపర్ల లీకేజీతో లక్షల మంది యువత బతుకులు బర్బాద్ చేసినవ్
- ప్రధాని పదవి కోసం కలలు కనుడు ఆపి..
- రాష్ట్రంలో మీ పార్టీ సంగతి చూసుకో
- జైళ్లకు, లాఠీలకు మా కార్యకర్తలు భయపడరు
- బీఆర్ఎస్ కారు స్టీరింగ్ మజ్లిస్ చేతిలో ఉంది
- పోలీస్ వ్యవస్థను కూడా పొలిటిసైజ్ చేసిండు
- అన్ని ప్రాజెక్టుల్లో అవినీతికి పాల్పడ్డరు
- రాష్ట్రంలో వచ్చేది బీజేపీ సర్కారే..
- అవినీతిపరులను జైలుకు పంపుతాం
- ముస్లిం రిజర్వేషన్లు ఎత్తేసి..
- ఎస్సీ, ఎస్టీ, బీసీలకు ఇస్తం
- దేశమంతా చూసేలా విమోచన
- దినోత్సవాన్ని పరేడ్ గ్రౌండ్లో జరుపుతం
- చేవెళ్ల సభలో కేంద్ర హోం మంత్రి ప్రకటన
హైదరాబాద్, వెలుగు: టీఎస్పీఎస్సీ పేపర్ల లీకేజీతో లక్షల మంది యువత బతుకులను కేసీఆర్ బర్బాద్ చేశారని, ఆయనకు సీఎం పదవిలో ఒక్క క్షణం కూడా ఉండే అర్హత లేదని కేంద్ర హోం మంత్రి అమిత్ షా అన్నారు. ‘‘టీఆర్ఎస్ను బీఆర్ఎస్గా మార్చి ప్రధాని పదవి కోసం కేసీఆర్ కలలు కంటున్నడు. అక్కడికి ఇక్కడికి తిరుగుతూ ఇదే చెప్తున్నడు. కానీ, ప్రధాని సీటు ఖాళీగా లేదనే విషయం ఆయన గుర్తుంచుకోవాలి. దేశం సంగతి తర్వాత.. ముందు రాష్ట్రంలో బీఆర్ఎస్ సంగతి ఏంది? ఆ పార్టీ పనైపోయింది. రాష్ట్రంలో వచ్చేది బీజేపీ సర్కారే” అని తెలిపారు. కేసీఆర్ పాలనలో రూ.లక్ష కోట్ల అవినీతి జరిగిందని, అవన్నీ కేసీఆర్ కుటుంబ సభ్యుల ఖాతాల్లోకే చేరాయని ఆరోపించారు. ఈ అవినీతి సర్కారును కూకటివేళ్లతో పెకిలించి, బీజేపీ ప్రభుత్వాన్ని ఏర్పాటు చేసేందుకు రాష్ట్ర ప్రజలు సిద్ధంగా ఉన్నారని ఆయన పేర్కొన్నారు. బీజేపీ ప్రభుత్వం ఏర్పడగానే అవినీతిపరులను జైళ్లకు పంపుతామని హెచ్చరించారు. పార్లమెంట్ప్రవాస్యోజనలో భాగంగా ఆదివారం రాత్రి రంగారెడ్డి జిల్లా చేవెళ్లలో నిర్వహించిన బీజేపీ విజయ సంకల్ప సభలో అమిత్ షా మాట్లాడారు. కేసీఆర్, బీఆర్ఎస్ ప్రభుత్వంపై తీవ్ర స్థాయిలో మండిపడ్డారు.
టెన్త్ పేపర్లు, టీఎస్పీఎస్సీ పేపర్లను లీక్ చేసి లక్షల మంది యువతీయువకుల భవిష్యత్తును కేసీఆర్ ఆగం చేశారని అమిత్ షా అన్నారు. 2 లక్షల దాకా ఉద్యోగాలు ఖాళీగా ఉంటే తొమ్మిదేండ్లు నాన్చుతూ వచ్చిన కేసీఆర్.. ఇప్పుడు ఎన్నికల టైమ్ వచ్చిందని హడావుడిగా 80వేల ఉద్యోగాల భర్తీ కోసం ప్రయత్నించి, లీకేజీలు చేసి నిరుద్యోగుల బతుకులను ప్రమాదంలోకి నెట్టారని ఆగ్రహం వ్యక్తం చేశారు. వచ్చే ఎన్నికల్లో కేసీఆర్కు గుణపాఠం చెప్పేందుకు యూత్ రెడీగా ఉన్నారని తెలిపారు. టీఎస్పీఎస్సీ పేపర్ల లీకేజీపై కేసీఆర్ ఎందుకు మాట్లాడటం లేదని ఆయన ప్రశ్నించారు. లీకేజీపై సిట్టింగ్ జడ్జితో విచారణ జరిపిస్తే వాస్తవాలు బయటకు వస్తాయన్నారు.
నీ జులుం బంజేయ్
జైళ్లకు, లాఠీ దెబ్బలకు బీజేపీ కార్యకర్తలు భ యపడబోరని అమిత్ షా తెలిపారు. ‘‘బండి సంజయ్ని కేసీఆర్ జైల్లో పెట్టిచ్చిండు.. ఎంతో మంది బీజేపీ కార్యకర్తలను జైళ్లకు పంపిండు..కేసులు పెట్టిండు. కేసీఆర్... జాగ్రత్తగా విను.. మా కార్యకర్తలు నీ బెదిరింపులకు భయపడరు.. నిన్ను గద్దె దించే వరకూ నిద్రపోరు. పోరాడుతూనే ఉంటారు. నీ జులుం బంజేయ్” అని హెచ్చరించారు. ప్రజల సమస్యలపై ప్రశ్నిస్తే అణచివేస్తున్నా రని, అసెంబ్లీకి రాకుండా ఈటల రాజేందర్ను ఇబ్బంది పెట్టాలని చూశారని తెలిపారు. రాష్ట్రంలో పోలీస్ వ్యవస్థతోపాటు అన్ని వ్యవస్థలను పొలిటిసైజ్ చేశారని, కుటుంబ పాలన సాగుతున్నదని మండిపడ్డారు.
వచ్చేది బీజేపీ సర్కారే
కేంద్ర ప్రభుత్వం అందించే సంక్షేమ పథకాలను రాష్ట్ర ప్రజలకు అందకుండా కేసీఆర్ అడ్డుపడుతున్నారని అమిత్ షా అన్నారు. నిధులను దారి మళ్లిస్తున్నారని, దుర్వినియోగం చేస్తున్నారని ఆయన ఆరోపించారు. అన్ని ప్రాజెక్టుల్లో కేసీఆర్ సర్కారు అవినీతికి పాల్పడుతున్నదని, ప్రాజెక్టులను ఏటీఎంలుగా మార్చుకున్నదని దుయ్యబట్టారు. తెలంగాణలో నేషనల్హైవేల కోసం కేంద్ర ప్రభుత్వం రూ.లక్ష కోట్లు ఖర్చు చేసిందని తెలిపారు. హైదరాబాద్ –-- బీజాపూర్ నేషనల్హైవే పనులు కేసీఆర్ భూమి సేకరించి ఇవ్వకపోవడంతో ఐదేండ్లుగా ఆలస్యమవుతున్నాయని అన్నారు. తెలంగాణలో బీజేపీ ప్రభుత్వం ఏర్పడితే కేంద్రం నుంచి మోడీ రూపాయి పంపిస్తే.. ఇక్కడి బీజేపీ ప్రభుత్వం ఇంకో 25 పైసలు కలిపి ప్రజలకు ఇస్తుందని చెప్పారు. తెలంగాణకు మోడీ మెగా టెక్స్టైల్ పార్క్ ఇచ్చారని, బొల్లారం –- ఉందానగర్ మధ్య ఎంఎంటీఎస్రెండో లైన్ పనులు ప్రారంభించామని వివరించారు. ‘‘కేసీఆర్ ఎంతనైనా చెయ్.. కానీ, మోడీ నుంచి రాష్ట్ర ప్రజలను దూరం చేయలేవ్. వచ్చే అసెంబ్లీ ఎన్నికల్లో తెలంగాణలో ఏర్పడేది బీజేపీ ప్రభుత్వమే” అని ఆయన అన్నారు. 2024లో మళ్లీ మోడీనే ప్రధాని అవుతారని, కేంద్రంలో ఫుల్ సినిమా చూసే ముందు రాష్ట్రంలో బీజేపీ ప్రభుత్వం ఏర్పడి ట్రైలర్ చూపిస్తామని కేసీఆర్కు సవాల్ చేశారు.
బసవన్నకు ప్రణామం
ప్రసంగానికి ముందు సభలో బసవేశ్వరుడి విగ్రహానికి అమిత్ షా పూలమాల వేసి నివాళులర్పించారు. ‘‘జగత్ జ్యోతి బసవన్నకు శిరస్సు వంచి ప్రణామం చేస్తున్న.. చిలుకూరు బాలాజీ, లక్ష్మీనర్సింహస్వామికి నమస్కరిస్తున్న..” అంటూ ప్రసంగం కొనసాగించారు. ఉమ్మడి ఏపీ తొలి డిప్యూటీ సీఎం కొండా వెంకట రంగారెడ్డికి, పద్మభూషణ్ అవార్డు గ్రహీత గులాం అలీ ఖాన్కు ప్రణామం చేశారు. కార్యక్రమంలో కేంద్ర మంత్రి కిషన్రెడ్డి, బీజేపీ స్టేట్ చీఫ్ బండి సంజయ్, పార్టీ రాష్ట్ర వ్యవహారాల ఇన్చార్జ్ తరుణ్చుగ్, ఓబీసీ మోర్చా జాతీయ అధ్యక్షుడు కె.లక్ష్మణ్, పార్టీ జాతీయ ఉపాధ్యక్షురాలు డీకే అరుణ, ఎమ్మెల్యే ఈటల రాజేందర్, మాజీ ఎంపీ కొండా విశ్వేశ్వర్ రెడ్డి, మాజీ మంత్రి చంద్రశేఖర్ తదితరులు పాల్గొన్నారు.
ఒవైసీ ఎజెండాను అమలు చేస్తున్నడు
రాష్ట్రంలో ఒవైసీ ఎజెండాను కేసీఆర్ అమలు చేస్తున్నారని, మజ్లిస్ చెప్పినట్లు నడుచుకుంటున్నారని అమిత్ షా దుయ్యబట్టారు. ‘‘మజ్లిస్ చేతుల్లో బీఆర్ఎస్ కారు స్టీరింగ్ ఉంది. అలాంటి కారు సర్కారు అవసరమా? కమలాన్ని గెలిపించండి.. కమలంలో మహాలక్ష్మి ఉంటుంది.. వచ్చే ఎన్నికల్లో బీజేపీకి ఓ టు వేస్తే తెలంగాణకు మహాలక్ష్మీ వైభవాన్ని తీసుకువస్తాం’’ అని తెలిపారు. రాష్ట్రంలో కేసీఆర్, ఒవైసీ సర్కారును కూకటివేళ్లతో పెకిలించాలని అన్నారు. రాష్ట్రంలో బీజేపీ ప్రభుత్వం ఏర్పడగానే ముస్లిం రిజర్వేషన్లు ఎత్తి వేసి, వాటిని ఎస్సీ, ఎస్టీ, బీసీలకు కల్పిస్తామని అమిత్ షా చెప్పారు. మజ్లిస్కు భయపడే తెలంగాణ విమోచన దినోత్సవాన్ని కేసీఆర్ అధికారికంగా నిర్వహించడం లేదని, సర్దార్వల్లబ్భాయ్ పటేల్ వల్ల నిజాం పాలన నుంచి ఈ గడ్డకు విముక్తి లభించిందని తెలిపారు. మోడీ నేతృత్వంలో రాష్ట్రంలో బీజేపీ ప్రభుత్వం ఏర్పడగానే.. దేశం మొత్తం చూసేలా పరేడ్ గ్రౌండ్లో విమోచన దినోత్సవాలను జరుపుతామని హామీ ఇచ్చారు. ‘‘యువతపై లాఠీ చార్జీ చేసినోళ్లను.. మా పార్టీ నేతలను జైళ్లో పెట్టినవాళ్లను ఉపేక్షించబోం.. బీజేపీ ప్రభుత్వం వచ్చిన తర్వాత అవినీతి పరులందరినీ జైల్లో వేస్తాం..” అని ఆయన హెచ్చరించారు. కేసీ ఆర్ సర్కార్కు దిగిపోయే టైమ్ దగ్గరపడిందని, ఈ మిగిలిన సమయాన్నైనా ప్రజల కోసం కేటాయించాలని, ఒవైసీ కోసం కాదని అమిత్ షా అన్నారు.
రాష్ట్రంలో పోలీస్వ్యవస్థతోపాటు అన్ని వ్యవస్థలను కేసీఆర్ పొలిటిసైజ్ చేసిండు. కుటుంబ, అవినీతి పాలన సాగిస్తున్నడు. ప్రజా సమస్యలపై ప్రశ్నించే వాళ్లను అణచివేస్తున్నడు. జైళ్లలో పెడ్తున్నడు. జైళ్లకు, లాఠీల దెబ్బలకు బీజేపీ కార్యకర్తలు భయపడరు. కేసీఆర్.. జాగ్రత్తగా విను. నీ అవినీతి సర్కార్ను గద్దె దించే వరకు మా కార్యకర్తలు పోరాడుతూనే ఉంటరు.
నీ జులుం బంజెయ్.
- కేంద్ర హోం మంత్రి అమిత్ షా
