వాషింగ్టన్: అమెరికాలో దీపావళి రోజు సెలవు ఇవ్వాలని ప్రతిపాదిస్తూ అమెరికన్ చట్టసభ సభ్యురాలు గ్రేస్ మెంగ్ యూఎస్ కాంగ్రెస్ లో శుక్రవారం బిల్లును ప్రవేశపెట్టారు. అనంతరం ఆమె మీడియాతో మాట్లాడుతూ.. "ప్రపంచవ్యాప్తంగా బిలియన్ల మందికి దీపావళి అత్యంత ముఖ్యమైన రోజు. న్యూయార్క్ లోని క్వీన్స్ ప్రాంతంలో పలు కమ్యూనిటీలు ఈ పండగను వైభవంగా నిర్వహిస్తాయి. దీపావళిని ఫెడరల్ ప్రభుత్వ సెలవు దినంగా అధికారికంగా ప్రకటిస్తే.. ఆ కుటుంబాలు కలిసి వేడుకలు చేసుకునేందుకు వీలుంటుంది.
అంతేగాక, విభిన్న సంస్కృతులకు ప్రభుత్వం ఇచ్చే విలువను చాటుతుంది" అని పేర్కొన్నారు. ఈ బిల్లు యూఎస్ కాంగ్రెస్ లో ఆమోదం పొంది, ప్రెసిడెంట్ సంతకం చేసిన తర్వాత దీపావళిని సెలవు దినంగా ప్రకటించేందుకు అవకాశం ఉంటుంది. అది జరిగితే, అమెరికాలో ఫెడరల్ గుర్తింపు పొందిన 12వ సెలవుగా దీపావళి నిలుస్తుంది. ఈ బిల్లును అమెరికాలోని భారత సంతతి చట్టసభ సభ్యులు, పలు కమ్యూనిటీల నేతలు స్వాగతించారు. ఇదిలా ఉండగా.. దీపావళిని సెలవు దినంగా ప్రకటించాలని 2021లోనూ యూఎస్ కాంగ్రెస్లో బిల్లును ప్రవేశపెట్టారు. కానీ, పలు కారణాలతో అది ఆమోదం పొందలేదు.
