- 435 హౌస్, 35 సెనేట్ సీట్లు.. 36 మంది గవర్నర్ల ఎన్నిక
- ముందస్తు పోలింగ్‌‌లోనే 5.7 కోట్లకు పైగా ఓట్లు
- బుధవారం తెల్లవారుజాము నుంచి ఫలితాల సరళి
అమెరికాలో మిడ్టర్మ్ ఎన్నికల పోలింగ్ మంగళవారం ప్రారంభమైంది. మొత్తం 50 రాష్ట్రాల్లో ఓటర్లు పోలింగ్ కేంద్రాలకు తరలివెళ్తున్నారు. అధ్యక్షుడు డొనాల్డ్ ట్రంప్ పదవీకాలంలో మిగిలిన రెండేండ్లు అమెరికా కాంగ్రెస్ (పార్లమెంట్) ఎవరి చేతిలో ఉండాలో ఈ ఎన్నికలు తేల్చనున్నాయి. భారత కాలమానం ప్రకారం బుధవారం తెల్లవారుజాము నుంచి ఫలితాలు రావడం మొదలవుతుంది.
వాషింగ్టన్ డీసీ: అమెరికాలో మిడ్టర్మ్ ఎన్నికల పోలింగ్ మంగళవారం ప్రారంభమైంది. మొత్తం 50 రాష్ట్రాల్లో ఓటర్లు పోలింగ్ కేంద్రాలకు తరలివెళ్తున్నారు. అధ్యక్షుడు డొనాల్డ్ ట్రంప్ పదవీకాలంలో మిగిలిన చివరి రెండేండ్లు అమెరికా కాంగ్రెస్ (పార్లమెంట్) ఎవరి చేతిలో ఉండాలో ఈ ఎన్నికలు తేల్చనున్నాయి. ప్రతినిధుల సభ (హౌస్ ఆఫ్ రిప్రజెంటేటివ్స్)లోని మొత్తం 435 సీట్లకు, సెనేట్‌‌లోని 100 సీట్లలో 35 సీట్లకు ఎన్నికలు జరుగుతున్నాయి. వీటితో పాటు 36 రాష్ట్రాల్లో గవర్నర్లను, రాష్ట్ర చట్టసభల సభ్యులను ఓటర్లు ఎన్నుకోనున్నారు. దేశంలో దాదాపు 21 కోట్ల మంది రిజిస్టర్డ్ ఓటర్లు ఉన్నారు. ముందస్తు ఓటింగ్‌‌లోనే 5.7 కోట్లకు పైగా ఓట్లు పోలయ్యాయి. అమెరికాలో మంగళవారం సాయంత్రం, అంటే భారత కాలమానం ప్రకారం బుధవారం తెల్లవారుజాము నుంచి ఫలితాలు రావడం మొదలవుతుంది.
ఏ సభలో ఎవరి బలం ఎంత?
ప్రస్తుతం ప్రతినిధుల సభ, సెనేట్ రెండూ ట్రంప్‌‌కు చెందిన రిపబ్లికన్ పార్టీ ఆధీనంలోనే ఉన్నాయి. హౌస్‌‌లో మెజార్టీకి 218 సీట్లు కావాలి. ప్రస్తుతం అక్కడ రిపబ్లికన్లకు 218, డెమోక్రాట్లకు 214 సీట్లు ఉన్నాయి. సెనేట్‌‌లో రిపబ్లికన్లకు 53 సీట్లు ఉండగా, డెమోక్రాట్లకు 45, వారికి మద్దతిచ్చే ఇద్దరు స్వతంత్రులు ఉన్నారు. ఎన్నికలు జరిగే 35 సెనేట్ సీట్లలో 22 రిపబ్లికన్లవి, 13 డెమోక్రాట్లవి. కాంగ్రెస్‌‌ను చేజిక్కించుకోవాలంటే డెమోక్రాట్లు హౌస్‌‌లో అదనంగా 3, సెనేట్‌‌లో 4 సీట్లు గెలవాలి. సెనేట్‌‌లో 50–50 టై అయితే ఉపాధ్యక్షుడు వాన్స్ ఓటుతో రిపబ్లికన్లకే పట్టు ఉంటుంది.
రికార్డు స్థాయిలో ముందస్తు ఓటింగ్
ఈసారి ముందస్తు ఓటింగ్ రికార్డు స్థాయికి చేరింది. పోలింగ్ రోజు నాటికి 5.7 కోట్లకు పైగా ముందస్తు ఓట్లు పోలయ్యాయి. 47 రాష్ట్రాలు, వాషింగ్టన్ డీసీ ముందస్తు ఓటింగ్‌‌కు అవకాశం ఇవ్వగా, అన్ని రాష్ట్రాలు మెయిల్ ద్వారా ఓటు వేసే సౌకర్యం కల్పించాయి.
పోలింగ్‌‌కు అడ్డంకులు
వరదల కారణంగా ఫ్లోరిడా పోలింగ్ కేంద్రాలను వేరేచోటుకు మార్చారు. న్యూయార్క్‌‌లోని వెస్ట్‌‌చెస్టర్ కౌంటీలో బ్యాలెట్ స్కానర్లు మొరాయించినా, ప్రతి ఓటూ లెక్కిస్తామని అధికారులు చెప్పారు. కాలిఫోర్నియాలో పౌరులు కానివారికి మెయిల్ బ్యాలెట్లు ఇచ్చారంటూ ట్రంప్ ప్రభుత్వం చేసిన అత్యవసర అభ్యర్థనను సుప్రీంకోర్టు సోమవారం తిరస్కరించింది. తొలిసారి 50 రాష్ట్రాలకు వెయ్యి మంది పరిశీలకులను పంపుతున్నట్లు న్యాయశాఖ ప్రకటించింది.
ఫలితాలు ఆలస్యం కావొచ్చు
మెయిల్ బ్యాలెట్ల లెక్కింపునకు సమయం పడుతుంది. కాబట్టి.. హౌస్, సెనేట్‌‌పై ఎవరి పట్టు ఉంటుందనేది పోలింగ్ రోజు రాత్రే తేలకపోవచ్చు. ఆలస్యమైనంత మాత్రాన అక్రమాలు జరిగినట్లు కాదని అధికారులు చెబుతున్నారు.
