న్యూఢిల్లీ: భారత అంతరిక్ష పరిశోధన సంస్థ (ఇస్రో) చేపట్టిన చంద్రయాన్ 3 మిషన్ ల్యాండర్ మాడ్యూల్(ఎల్ఎం).. జాబిల్లికి చేరువైంది. ల్యాండర్ ‘విక్రమ్’ ఈ నెల 23న సాయంత్రం 6.04 గంటలకు చంద్రుడి ఉపరితలంపై దిగే అవకాశం ఉందని ఇస్రో వెల్లడించింది. ల్యాండర్ మాడ్యూల్ కక్ష్యను విజయవంతంగా తగ్గించామని ఆదివారం ట్వీట్ చేసింది. మాడ్యూల్ సాఫ్ట్ గా ల్యాండ్ అయ్యేందుకు ఇంటర్నల్ చెకింగ్స్ చేస్తామని పేర్కొంది. అయితే, ఎల్ఎం ఈ నెల 23న సాయంత్రం 5.47 గంటలకు జాబిల్లిపై దిగవచ్చని ఇస్రో ఇంతకుముందు తెలిపింది.
ప్రస్తుతం ఆ టైమ్ ను 17 నిమిషాలు ముందుకు జరిపింది. సెకండ్, ఫైనల్ డీబూస్టింగ్తో ఎల్ఎం కక్ష్యను సైంటిస్టులు తగ్గించారు. అన్నీ అనుకున్నట్లు జరిగితే చంద్రుడి దక్షిణ ధ్రువంపై అడుగుపెట్టిన మొదటి దేశంగా ఇండియా రికార్డు సృష్టిస్తుంది. జాబిల్లి ఉపరితలంపై చంద్రయాన్ 3 ల్యాండ్ అయ్యే క్షణం కోసం దేశ ప్రజలంతా ఆసక్తిగా ఎదురుచూస్తున్నారు.
దీంతో ల్యాండింగ్ను ఈ నెల 23న సాయంత్రం 5.27 గంటల నుంచి దూరదర్శన్లో ప్రత్యక్షప్రసారం చేయనున్నారు. దీంతో పాటు ఇస్రోకు చెందిన వెబ్ సైట్, యూట్యూబ్ చానెల్, ఫేస్ బుక్ పేజీల్లోనూ చంద్రయాన్ 3 ల్యాండింగ్ దృశ్యాలను లైవ్ లో చూపుతారు. ‘‘చంద్రయాన్ 3 సాఫ్ట్ ల్యాండ్ కావాలని అందరూ కోరుకుంటున్నారు. దేశ చరిత్రలోనే ఇదో కీలకమైన ఘట్టం. ఈ మిషన్ సక్సెస్ అయితే, స్పేస్ సైన్స్ రంగంపై దేశ యువత కచ్చితంగా మరింత ఆసక్తి చూపుతుంది. దాంతోపాటు సైన్స్ అండ్ టెక్నాలజీలో దేశ సత్తా ప్రపంచానికి మరోసారి తెలుస్తుంది” అని ఇస్రో తెలిపింది.
