మన యుద్ధనౌక విక్రమాదిత్యపై తొలిసారిగా మనం సొంతంగా తయారు చేసుకున్న ఫైటర్ జెట్ తేజస్ విజయవంతంగా ల్యాండ్ అయింది. శనివారం అరేబియా సముద్రంలో ఐఎన్ఎస్ విక్రమాదిత్యపై దిగి, ఆ ఫీట్ సాధించిన తొలి స్వదేశీ ఫైటర్ జెట్గా నిలిచింది. తేలికపాటి యుద్ధ విమానం (ఎల్ సీఏ) అయిన తేజస్–ఎన్ ప్రొటోటైప్ విమానాన్ని నేవీ కోసం తయారు చేశారు. ఇప్పటివరకు గోవా సమీపంలోని టెస్టింగ్ ఫెసిలిటీలో మాత్రమే దీనిని పరీక్షించారు. ఇక్కడి టెస్టింగ్ డెక్కు, ఐఎన్ఎస్ విక్రమాదిత్య డెక్పై ల్యాండింగ్కు చాలా తేడా ఉన్నప్పటికీ, తేజస్ సక్సెస్ ఫుల్గా దిగడం విశేషం. గంటకు 244 కిలోమీటర్ల వేగంతో వచ్చిన తేజస్–ఎన్ ఫైటర్ జెట్ ఐఎన్ఎస్ విక్రమాదిత్యపై 87 మీటర్ల దూరం వెళ్లి నిలిచిపోయిందని నేవీ అధికారులు వెల్లడించారు. దీన్నే అరెస్టెడ్ ల్యాండింగ్ అంటారు. అంటే యుద్ధనౌకపై ఉండే ఓ తీగను ఫైటర్ జెట్ వెనక ఉండే హుక్స్తో పట్టుకుని, లాక్కుంటూ వెళ్తూ, వేగాన్ని తగ్గించుకుంటూ ఫైటర్ జెట్లను ఆపే పద్ధతి. అలాగే, యుద్ధనౌకపై ఒకవైపు ఎత్తుగా ఉండే భాగం గుండా ‘స్కైజంప్’ పద్ధతిలో టేకాఫ్ టెస్టులోనూ తేజస్–ఎన్ పాస్ కావాల్సి ఉందని అధికారులు తెలిపారు.
