తమిళ సినీ నటుడు విశాల్ తన ప్రేయసి , నటి సాయి ధన్సికతో నిశ్చితార్థం చేసుకున్నారు. అయితే ఈ వేడుకకు పెద్దగా ఎవరినీ ఆహ్వానించలేదు. కేవలం తన సన్నిహితులు, కుటుంబ సభ్యుల సమక్షంలో నిరాడంబరంగా జరిగింది. ఈ కార్యక్రమానికి సంబంధించిన ఫోటోలను స్వయంగా విశాల్ సోషల్ మీడియా వేదికగా పంచుకున్నారు. దీంతో సినీ ప్రముఖులు, అభిమానులు ఈ కొత్త జంటకు శుభాకాంక్షలు చెబుతున్నారు.
ఈ రోజు ఉదయం 11 గంటలకు విశాల్ తన 47వ పుట్టినరోజు సందర్భంగా నిర్మాణం కొనసాగుతున్న నడిగర్ సంఘం భవనానికి వెళ్లారు. అదే స్థలంలో తన ప్రేయసి, నటి సాయి ధన్షికతో నిశ్చితార్థం చేసుకున్నారు . దీనితో, విశాల్ తన వ్యక్తిగత జీవితంలో ఒక ముఖ్యమైన ఘట్టాన్ని నాడిగర్ సంగం భవనంతో ముడిపెట్టడం అభిమానులను మరింత ఆకట్టుకుంది.
నిశ్చితార్థం తర్వాత, విశాల్ తన అధికారిక X ఖాతాలో ఒక పోస్ట్ ద్వారా ఈ శుభవార్తను ప్రకటించారు. "ప్రపంచం నలుమూలల నుంచి నా పుట్టినరోజు సందర్భంగా శుభాకాంక్షలు అందించిన నా ప్రియమైన వారందరికీ ధన్యవాదాలు. నా కుటుంబ సభ్యుల సమక్షంలో ఈ రోజు సాయి ధన్షికతో నా నిశ్చితార్థం జరిగిన శుభవార్తను మీ అందరితో పంచుకోవడం చాలా ఆనందంగా ఉంది. నేను చాలా సానుకూలంగా, ఆశీర్వదించబడినట్లు భావిస్తున్నాను. ఎప్పటిలాగే మీ ఆశీస్సులు, మంచి మనసు కోరుకుంటున్నాను" అని విశాల్ రాసుకొచ్చారు.
Thank u all u darlings from every nook and corner of this universe for wishing and blessing me on my special birthday. Happy to share the good news of my #engagement that happend today with @SaiDhanshika amidst our families.feeling positive and blessed. Seeking your blessings and… pic.twitter.com/N417OT11Um
— Vishal (@VishalKOfficial) August 29, 2025
తమిళ సినీ నటుడు, నిర్మాత విశాల్ తన ప్రేమను, వివాహాన్ని నడిగర్ సంఘం భవనంతో ముడిపెట్టిన విషయం తెలిసిందే. తాను అధ్యక్షుడిగా ఉన్న ఈ భవనం నిర్మాణం పూర్తయిన తర్వాతే పెళ్లి చేసుకుంటానని గతంలో విశాల్ ప్రకటించారు. అయితే, తన వాగ్దానాన్ని నిలబెట్టుకుంటూ, భవనం పూర్తి కాకుండానే, విశాల్ నిశ్చితార్థం చేసుకోవడం అభిమానులను ఆశ్చర్యానికి గురి చేసింది.
ఈ శుభ సందర్భం తమిళ సినీ వర్గాల్లో, అభిమానులలో సంతోషాన్ని నింపింది. విశాల్ వివాహం కోసం ఆతృతగా ఎదురుచూస్తున్న అభిమానులకు ఇది ఒక ఊరటనిచ్చింది. త్వరలోనే వీరిద్దరూ వైవాహిక జీవితంలోకి అడుగుపెట్టాలని కోరుకుంటూ, ఈ కొత్త జంటకు శుభాకాంక్షలు వెల్లువెత్తుతున్నాయి.
