మరో మూడు రోజుల్లో రాఖీ పండుగ. మరి అన్నాచెల్లెళ్లు, అక్కా తమ్ముళ్ల ప్రేమకి అద్దం పట్టే ఈ పండుగని కాస్త స్పెషల్గా చేసుకుంటే బాగుంటుంది. అదెలాగంటే.. ఎప్పటిలా మార్కెట్లో రాఖీలు కొని కట్టే బదులు ఇంట్లోనే రాఖీలు తయారు చేయొచ్చు. అది కూడా సింపుల్ స్టెప్స్లో.
మట్టితో ...
- పొడి బంకమట్టికి కొంచెం పౌడర్ అద్దాలి. దాన్ని చేత్తో చిన్నసైజు పూరీలా చేయాలి.
- అంచులు సమంగా ఉన్న గ్లాసుని దానిపై పెట్టి చందమామ ఆకారంలో కత్తిరించాలి.
- చిన్న చాకుతో పువ్వు ఆకారం వచ్చేలా దానిపై గాట్లు పెట్టాలి.
- పువ్వు రెమ్మల్ని పోలినట్టు ఉండటానికి చివర్లు చాకుతో అడ్జెస్ట్ చేయాలి.
- మట్టితో మూడు సైజుల్లో చిన్నచిన్న బాల్స్ చేసి గమ్ముతో ఆ పువ్వు మధ్యలో పెద్ద బాల్స్ నుంచి చిన్న వాటి వరకు సైజ్ల వారీగా ఒకదానిపై ఒకటి అతికించాలి. పూసల సైజుల్లో మరికొన్ని బంతులు చేయాలి.
సన్నటి కాపర్ వైర్ని..
- సన్నటి కాపర్ వైర్ని అర అంగుళం ముక్కల చొప్పున కట్ చేయాలి.
- ఒక్కో వైర్ని ఒక్కో పువ్వు రెక్కకు గుచ్చాలి.
- ఇప్పుడు పువ్వు రెమ్మల చివర్లలో వైర్ల దగ్గర గమ్ పెట్టి బంతుల్ని అతికించాలి. దానంతటికీ తెలుపు, ఆ తర్వాత నలుపు రంగులు వేయాలి.
- ఆరాక.. నచ్చిన కలర్స్ వేయాలి. నచ్చిన షేప్లో ఆరు చిన్న చిన్న మట్టి ఉండలు చేసి, రంగులు వేయాలి.
- వాటికి సూదితో రంధ్రం పెట్టి.. మధ్యలోంచి దారం తీయాలి.
- ఆ దారం మధ్యలో గమ్ముతో చిన్న అట్ట ముక్క అతికించి దాన్ని పువ్వు వెనక అతికిస్తే మట్టి రాఖీ రెడీ.
నోట్: చందమామ ఆకారం బదులు నచ్చిన షేప్లో రాఖీని చేసుకోవచ్చు. రకరకాల బొమ్మలు గీసి, రంగులు వేయొచ్చు. ప్లెయిన్గా ఉంచి కుందన్స్ అతికించినా బాగుంటుంది. రాఖీకి రెండు చివర్లలో చిన్న రంధ్రం పెట్టి దారం బయటికి తీసినా సింపుల్గా రాఖీ రెడీ అవుతుంది.
గింజలతో...
- గుప్పెడు గుమ్మడి గింజల్ని కడిగి ఆరబెట్టాలి. వాటిని మూడు వంతులు చేసి ఒక్కో భాగానికి ఒక్కో రంగు వేసి, కాసేపు పక్కనుంచాలి.
- అట్టముక్కని రాఖీ సైజులో నచ్చిన ఆకారంలో కత్తిరించాలి. దానిపై గమ్ముతో కలర్ కాంబినేషన్స్ చూసుకుంటూ రెండు లేదా మూడు వరుసల్లో గుమ్మడి గింజల్ని అతికించాలి. వాటిపై కుందన్లు అతికించాలి.
- అట్ట వెనుక భాగంలో నచ్చిన రంగు రిబ్బన్ లేదా దారాన్ని అతికిస్తే రాఖీ రెడీ అయినట్టే.
నోట్: గుమ్మడి గింజలకి బదులు పెసలు, కందులు, బియ్యం, డ్రై ఫ్రూట్స్.. ఇలా వేటితోనైనా ఈ రాఖీ తయారుచేయొచ్చు. కావాలనుకుంటే ప్లెయిన్ అట్ట ముక్కకి తెలుపు రంగు వేయాలి. ఆరాక నచ్చిన పెయింట్ వేసి దానిపైన బొమ్మలు వేయాలి. ఆ తర్వాత ఆ అట్టముక్క చివర్లలో గుమ్మడి గింజలు అతికించినా.. రాఖీ అందంగా ఉంటుంది. ఏమైనా డౌట్ ఉంటే వీటి తయారీకి సంబంధించిన వీడియోల్ని యూట్యూబ్లో చూడొచ్చు.