ఆసిఫాబాద్, వెలుగు: అంకుశాపూర్ ప్రభుత్వ మెడికల్ కాలేజీలో విద్యార్థులకు అన్ని వసతులు కల్పిస్తామని రాష్ట్ర ఆరోగ్య శాఖ డైరెక్టర్ అయేషా మస్రత్ ఖానం అన్నారు. శనివారం కలెక్టర్ వెంకటేశ్ ధోత్రేతో కలిసి వైద్య కళాశాలను సందర్శించారు. తరగతి గదులను పరిశీలించి, విద్యార్థులతో మాట్లాడారు. తర్వాత ప్రిన్సిపాల్ శ్రీలక్ష్మి, అధికారులతో సమావేశమయ్యారు. కాలేజీలో ప్రొఫెసర్లు, అసిస్టెంట్ ప్రొఫెసర్లను, కాంట్రాక్ట్పద్ధతిలో ల్యాబ్ టెక్నీషియన్, ఇతర సిబ్బందిని నియమిస్తామన్నారు. ప్రభుత్వ ఆస్పత్రి, వైద్య కళాశాల, హాస్టల్భవనాల పనులు పూర్తి కావొస్తున్నాయని తెలిపారు. జిల్లా కేంద్రంలోని ప్రభుత్వ ఆస్పత్రిని సందర్శించి, డయాలసిస్ సెంటర్, ఐసీయూ గదులను పరిశీలించారు.
పేషెంట్లకు మెరుగైన వైద్యం అందించాలి
నస్పూర్, వెలుగు: పేషెంట్లకు మెరుగైన వైద్యం అందించాలని రాష్ట్ర ఆరోగ్యశాఖ డైరెక్టర్ అయేషా మస్రత్ ఖానం సూచించారు. శనివారం కలెక్టరేట్ లో కలెక్టర్ కుమార్ దీపక్, డీఎంహెచ్వో హరీశ్రాజ్, ప్రభుత్వ ఆస్పత్రి పర్యవేక్షకుడు హరిశ్చంద్రారెడ్డి, ప్రభుత్వ మెడికల్కాలేజీ ప్రిన్సిపాల్ డాక్టర్ సులేమాన్, టీజీఎం ఐడీసీ ఈఈ నరసింహారావుతో సమీక్ష నిర్వహించారు. ప్రభుత్వ ఆస్పత్రులు, వైద్య కళాశాలల్లో వసతుల కల్పనకు ప్రభుత్వం చర్యలు తీసుకుంటోందన్నారు. కలెక్టర్ పరిధిలో ఉన్న పోస్టులను భర్తీ చేయాలన్నారు. అనంతరం జిల్లా కేంద్రంలోని మాతా-శిశు సంరక్షణ కేంద్రం, మెడికల్ కాలేజీని సందర్శించారు.
