ముషీరాబాద్, వెలుగు: మైనార్టీల సంక్షేమానికి కాంగ్రెస్ పార్టీ ప్రాధాన్యతనిస్తుందని ఆ పార్టీ ముషీరాబాద్ సెగ్మెంట్ అభ్యర్థి అంజన్ కుమార్ యాదవ్ తెలిపారు. సెగ్మెంట్లోని 32 చర్చిల ప్రతినిధులతో జాన్ కెనడీ ఆధ్వర్యంలో గోల్కొండ చౌరస్తాలోని ఎంబీ చర్చిలో బుధవారం సమావేశం నిర్వహించారు. చీఫ్ గెస్టుగా హాజరైన అంజన్ కుమార్ను బిషప్స్ ఆశీర్వదించారు. అనంతరం ఆయనమాట్లాడుతూ.. దేశం కోసం రాహుల్ గాంధీ కశ్మీర్ నుంచి కన్యాకుమారి వరకు 4 వేల కి.మీ భారత్ జోడో యాత్ర చేశారన్నారు.
తెలంగాణలో కాంగ్రెస్ గెలుపు దేశ రాజకీయాలను మలుపు తిప్పుతుందన్నారు. ఈ నెల 30న జరిగే ఎన్నికల్లో హస్తం గుర్తుకు ఓటేసి తనను గెలిపించాలని ఆయన కోరారు. అనంతరం ముషీరాబాద్ సెగ్మెంట్ రెడ్డి వెల్ఫేర్ సభ్యులతో ఆయన సమావేశమయ్యారు. ఈ సందర్భంగా సీనియర్ నేత అంజిరెడ్డి మాట్లాడుతూ.. ముషీరాబాద్ లో అంజన్ కుమార్ భారీ మెజార్టీతో గెలవడం ఖాయమన్నారు. కార్యక్రమంలో ఏఐసీసీ వైస్ చైర్మన్ అనిల్ థామస్, డేనియల్ తదితరులు పాల్గొన్నారు.
