డిలీట్ అయిందనుకుంటే పొరపాటే
ఒకళ్లకు పంపాల్సిన మెసేజ్ ఇంకొకళ్లకు పోయింది. ఏం చేస్తారు..? ‘డిలీట్ ఫర్ ఎవ్రీ వన్’ అనే ఆప్షన్ ఉందిగా.. అదే చేస్తామన్న ఆన్సర్ చాలా మంది నుంచి వస్తుంది. కానీ, మీకో షాకింగ్ విషయం తెలుసా..? అన్ని సందర్భాల్లోనూ ఆ మెసేజ్ డిలీట్ అయిపోతుందనుకుంటే పొరపాటే. అవును, ఈ విషయాన్ని ఎఫ్ఏక్యూ పేజీలో స్పెషల్ నోట్గా వెల్లడించింది వాట్సాప్. ఏయే సందర్భాల్లో ఆ ఆప్షన్ ఫెయిలయ్యే చాన్స్ ఉందో వివరించింది.
అవతలి వాళ్లూ అప్డేట్ కావాల్సిందే
డిలీట్ ఆప్షన్ను వాడుకోవాలంటే మీతోపాటు అవతలి వాళ్ల వాట్సాప్ లేటెస్ట్ వెర్షన్ అయి ఉండాలి. ఆండ్రాయిడ్, ఐవోఎస్లైనా పంపేవాళ్లది, ఆ మెసేజ్ను రిసీవ్ చేసుకున్న వాళ్ల వాట్సాప్ లేటెస్ట్ వెర్షన్లో ఉండాలి. లేదంటే మనం డిలీట్ చేసినా, అవతలి వాళ్ల ఫోన్లో డిలీట్ అయ్యే చాన్స్ లేదు.
ఐవోఎస్ అయితే.. డిలీట్ అయినా ఉంటది
ఐఫోన్ వాడేవాళ్ల వాట్సాప్కు మెసేజ్లుగానీ, ఫొటోలు గానీ పంపితే, ఆ ఫొటోలు వాళ్లవాళ్ల ఫోన్లలో సేవ్ అయ్యే చాన్స్ ఉంటుంది. వాట్సాప్ చాట్ నుంచి ఆ ఫొటోలను డిలీట్ చేసినా, ఫొటో యాప్లోకి వెళ్లిపోయే అవకాశం ఉంటుంది. యాపిల్ సంస్థ పెట్టుకున్న ప్రైవసీ పాలసీనే కారణం.
డిలీట్ చేసేటప్పుడే అవతలోళ్లు చూసేయొచ్చు
పంపిన మెసేజ్ను డిలీట్ చేయాలనుకున్నలోపే అవతలోళ్లు దాన్ని చూసే అవకాశం లేకపోలేదు. ఆ మెసేజ్ రిసీవ్ చేసుకున్న వ్యక్తి చాట్లో ఉన్నప్పుడు మాత్రమే ఇది సాధ్యమవుతుంది.
సక్సెస్ కాకపోతే అంతే..
మనం మెసేజ్ డిలీట్ చేసినప్పుడు ఒక్కోసారి అది ఫెయిల్ అయ్యే చాన్స్ ఉంది. కానీ, మనకు నోటిఫికేషన్ కూడా రాదు. ఇలాంటి సందర్భాల్లో అవతలి వ్యక్తి మనం పంపిన మెసేజ్ను చూసే చాన్సెస్ చాలా ఎక్కువ. పంపిన మెసేజ్ను డిలీట్ చేయడానికి ఉండే టైం గంటా 8 నిమిషాల 16 సెకన్లు. ఆ లోపలే మెసేజ్ను డిలీట్ చేసేయాలి.
