హైదరాబాద్, వెలుగు: రాష్ట్రంలో డబ్ల్యూఆర్1, డబ్ల్యూఆర్2 (వైరింగ్ రెగ్యులేషన్స్) కఠినంగా అమలు చేయకపోవడంతోనే విద్యుత్ ప్రమాదాలు జరుగుతున్నాయని ఎలక్ట్రికల్ వర్కర్స్ అసోసియేషన్ ఆందోళన వ్యక్తం చేసింది. ఇటీవల షార్ట్ సర్క్యూట్లతో ప్రమాదాలు జరుగుతున్న నేపథ్యంలో ఎలక్ట్రికల్ వర్కర్స్ అసోసియేషన్ రాష్ట్ర కార్యవర్గ సమావేశం నిర్వహించింది. అసోసియేషన్ ప్రెసిడెంట్ నక్క యాదగిరి అధ్యక్షతన జరిగిన ఈ సమావేశంలో షార్ట్ సర్క్యూట్ నివారణ చర్యలపై చర్చించారు.
వైరింగ్ రెగ్యులేషన్స్ అమలు చేయకపోవడం వల్లే విద్యుత్ ప్రమాదాలు జరుగుతున్నాయని యాదగిరి అన్నారు. ఈ నేపథ్యంలో విద్యుత్ ప్రమాదాల నివారణలో ఎలక్ట్రిషియన్ల పాత్ర కీలకమని స్పష్టం చేశారు. రాష్ట్రంలోని ఎలక్ట్రిషియన్లు, వైర్‌‌మెన్, సూపర్‌‌వైజర్‌‌లు తప్పనిసరిగా ఎలక్ట్రికల్ లైసెన్స్ బోర్డు ద్వారా వైర్‌‌మెన్, సూపర్‌‌వైజర్ పర్మిట్‌‌లు పొందాలని సూచించారు. ఈ పర్మిట్‌‌లు ఉన్నవారికి ప్రభుత్వం తరఫున 15 రోజుల ట్రైయినింగ్ క్లాసులు నిర్వహించాలని కోరారు. ఇలాంటి ట్రెయినింగ్లు విద్యుత్ ప్రమాదాల నివారణకు దోహదపడుతాయన్నారు.
ప్రభుత్వ గుర్తింపు కలిగిన ఎలక్ట్రిషియన్లతోనే గృహాలు,వ్యాపార, వాణిజ్య, పరిశ్రమల్లో కరెంట్పనులు చేయించాలన్నారు. విద్యుత్ రంగంలో సురక్షిత పద్ధతులను పాటించడం, ఎలక్ట్రిషియన్లకు సరైన శిక్షణ, లైసెన్సింగ్‌‌ను ప్రోత్సహించడం వంటి చర్యలతో విద్యుత్ ప్రమాదాలను గణనీయంగా తగ్గించవచ్చని చెప్పారు. మార్కెట్‌‌లో నాసిరకం కేబుల్స్, స్విచ్‌‌లు పెరుగుతున్నాయని, వాటి వినియోం ప్రమాదాలకు కారణమవుతోందని తెలిపారు. విద్యుత్ కేబుళ్లు, స్విచ్‌ గేర్ కంపెనీలు క్వాలిటీ ప్రాడక్ట్లు అందుబాటులోకి తేవాలన్నారు. ఎలక్ట్రిషియన్లకు సరైన టెక్నికల్ పరిజ్ఞానం అందించాలని యాదగిరి సూచించారు. ఈ సమావేశంలో ఎలక్ట్రిషియన్ అసోసియేషన్ రాష్ట్ర ప్రధాన కార్యదర్శి నేమాల బెనర్జీ, రాజు మహారాజు, సత్యనారాయణ, ఆర్. శ్రీనివాస్ నేత తదితరులు పాల్గొన్నారు.
