నీళ్లలో ఈత కొట్టడం, ఆసనాలు వేయడం తెలుసు. కానీ, నడవడం గురించి ఎప్పుడైనా విన్నారా? అది కూడా తలకిందులుగా! ఇంకా చెప్పాలంటే నీళ్లలో తలకిందులుగా క్యాట్వాక్ చేయడం ఎవరైనా చూశారా? అసలు అది సాధ్యమేనా అనుకుంటున్నారా? మనందరికీ అసాధ్యం కావచ్చు. కానీ, క్రిస్టినా మకుషెంకోకు మాత్రం చాలా ఈజీ. అమెరికాలోని న్యూయార్క్లో ఉంటుందీమె. సింక్రనైజ్డ్ స్విమ్మింగ్లో నాలుగు సార్లు ప్రపంచ ఛాంపియన్.
నీళ్ల అడుగున డాన్స్ వేయడం, పర్ఫార్మ్ చేయడం క్రిస్టినాకు చాలా ఈజీ. ఆమె ఇటీవల తన ఇన్స్టాగ్రామ్ అకౌంట్లో పోస్ట్ చేసిన ఒక వీడియో బాగా వైరల్ అయింది. ఒక స్విమ్మింగ్ పూల్లో తలకిందులుగా క్యాట్వాక్ చేసుకుంటూ వెళ్లిన క్రిస్టినా, డైవ్ కొట్టి అడుగున్న ఉన్న బ్యాగ్ అందుకోవడం ఆ వీడియోలో కనిపిస్తుంది. ఆ తర్వాత దాన్ని భుజానికి తగిలించుకొని క్యాట్వాక్ చేస్తూ వెళ్తుంది. ఈ వీడియోకు ఇప్పటికి సుమారు 20లక్షల లైక్లు వచ్చాయి. అలాగే క్రిస్టినాను పొగుడుతూ బోలెడు కామెంట్లు పెడుతున్నారు నెటిజన్స్.
