హైటెక్ యుగంలో జనాలు చిన్న దానికి కూడా కస్సుబుస్సు లాడుతున్నారు. ఇక అపార్ట్ మెంట్లలో నివసించే వారైతే వాచ్ మెన్ పై తమ జులుం ప్రదర్శిస్తుంటారు. నీళ్లు లేవని ఒకరు.. కరెంట్ లేదని మరొకరు.. ఇంకొకరు ఆవరణ శుభ్రం గా లేదని... లిఫ్ట్ పని చేయడం లేదని ఇలా.. వాచ్ మెన్ లపై విరుచుకుపడతారు. వారికి సంబంధం ఉన్నా లేకపోయినా వారిపై నోరేసుకొని ఎగబడతారు. ఇప్పుడు తాజాగా ఉత్తరప్రదేశ్ లో సరిగ్గా ఇలాంటి ఘటనే చోటు చేసుకుంది, సికందరాలోని రెయిన్ బో అపార్ట్ మెంట్ లో మధ్యలోనే ఆగిపోయిందన్న కోపంలో కిందకు వచ్చిన తర్వాత వాచ్ మెన్ ను చెడామడా తిట్టడమే కాకుండా చీపురు కూడా తిరగేసింది. వయస్సులో పెద్దాయన అని కూడా చూడకుండా నోటికి ఇష్టం వచ్చినట్టు మాట్లాడింది. ఆ మహిళ నిర్దాక్షిణ్యంగా చీపురుతో కొడుతున్న వీడియో అపార్ట్మెంట్ సీసీ కెమెరాలో రికార్డయింది. ఈ వీడియో ఇప్పుడు సోషల్ మీడియాలో తెగ హల చల్ చేస్తోంది.
@gharkekaleshh pic.twitter.com/F3pw5M4Hsr
— Arhant Shelby (@Arhantt_pvt) July 13, 2023
ఆగ్రాలోని సికందరాలో రెయిన్బో అపార్ట్మెంట్ వాచ్ మెన్ గా పనిచేస్తోన్న జగదీశ్ ప్రసాద్ తివారీ సికందరా పోలీసులకు ఇచ్చిన ఫిర్యాదు ప్రకారం.. అపార్ట్మెంట్లో C -8 ఫ్లాట్ లో నివసించే అనిల్ శర్మ భార్య అనిత లిఫ్ట్ ఆగిపోయిందన్న కారణంతో అనరాని మాటలు అంటూ తనపై చీపురుతో దాడి చేసిందని, ఒకపక్క తాను వివరణ ఇస్తున్నా కూడా వినకుండా కొట్టిందని ఆరోపించాడు. ఆమెతో పాటు వారి కుమారుడు ప్రాన్షు కూడా మాటలతో దూషించాడని తెలిపాడు. ఈ తతంగం మొత్తం అక్కడ సీసీటీవీ ఫుటేజీలో రికార్డ్ కావడంతో ప్రత్యక్ష సాక్షుల వాంగ్మూలం తోపాటు వీడియోను కూడా ఆధారాలుగా సేకరించినట్టు తెలిపారు సికందరా పోలీసులు.