- కాంగ్రెస్ సర్కార్తోనే సంక్షేమం, ప్రజాపాలన సాధ్యం: వివేక్ వెంకటస్వామి
- కాంగ్రెస్ ఎంపీ అభ్యర్థులను గెలిపించేందుకు ప్రజలు సిద్ధంగా ఉన్నారు
- కేసీఆర్ కుటుంబ అహంకార పాలనకు ప్రజలు తగిన గుణపాఠం చెప్పారని వెల్లడి
కోల్బెల్ట్/చెన్నూరు, వెలుగు: రాబోయే లోక్సభ ఎన్నికల్లో రాష్ట్రంలో 12 నుంచి 14 మంది కాంగ్రెస్ అభ్యర్థులు ఎంపీలుగా గెలుస్తారని చెన్నూరు ఎమ్మెల్యే వివేక్ వెంకటస్వామి అన్నారు. కాంగ్రెస్ సర్కారు అమలు చేస్తున్న సంక్షేమ, ప్రజాపాలనతో ప్రజలు కాంగ్రెస్ అభ్యర్థులను గెలిపించేందుకు రెడీగా ఉన్నారని చెప్పారు. పెద్దపల్లి పార్లమెంటు కాంగ్రెస్ ఎంపీ అభ్యర్థిగా అధిష్టానం గడ్డం వంశీకృష్ణను ప్రకటించిన తర్వాత తొలిసారి వివేక్ వెంకటస్వామి, వంశీకృష్ణ శనివారం మంచిర్యాల జిల్లా చెన్నూరు నియోజకవర్గంలో పర్యటించారు. ఈ సందర్భంగా వివేక్ వెంకటస్వామి మాట్లాడుతూ.. కాంగ్రెస్ అధిష్టానం పెద్దపల్లి ఎంపీ అభ్యర్థిగా వంశీకృష్ణను ప్రకటించిందని, ఆయన అభ్యర్థిత్వంపై ప్రజల్లో మంచి స్పందన ఉందన్నారు.
సీఎం రేవంత్రెడ్డి ఇచ్చిన మాట ప్రకారం ఆరు గ్యారంటీల్లో ఐదింటిని అమలు చేశారని, వందరోజుల్లో ఐదు గ్యారంటీలను ఎలా అమలు చేశారని ప్రజలు అశ్చర్యపడుతున్నారన్నారు. గత బీఆర్ఎస్ సర్కారు రాష్ట్ర ఖజానాను ఖాళీ చేసిందని, ప్రజలకు ఉపయోగపడే పనులకు ఖర్చుపెట్టకుండా నిధులను దుర్వినియోగం చేసిందని మండిపడ్డారు. ఇష్టారాజ్యంగా కాంట్రాక్టర్లకు బిల్లులు ఇచ్చి తెలంగాణను కాంట్రాక్టర్ల దందా రాజ్యంగా మార్చిందని దుయ్యబట్టారు. పదేండ్ల బీఆర్ఎస్ పాలనలో ఒక్క డబుల్ బెడ్రూంఇల్లు ఇవ్వకుండా కేసీఆర్ మాట తప్పారని, దీంతో కేసీఆర్ కుటుంబ అహంకార పాలనకు అసెంబ్లీ ఎన్నికల్లో ప్రజలు తగిన గుణపాఠం చెప్పారని పేర్కొన్నారు. కాంగ్రెస్ సర్కార్ అధికారంలోకి రావడంతో ప్రజలకు స్వాతంత్ర్యం నాటి స్వేచ్ఛ వచ్చిందని సంతోషపడుతున్నారన్నారు. సీఎం రేవంత్రెడ్డి హయాంలో ‘మా నిధులు మాకే దక్కుతున్నాయి’అని ప్రజలు ఆనందంగా ఉన్నట్లు వివేక్ పేర్కొన్నారు.
ప్రజలే నాకు టికెట్ వచ్చేలా చేశారు: వంశీకృష్ణ
పెద్దపల్లి పార్లమెంటు పరిధిలోని 7 నియోజకవర్గాల ప్రజలు కోరుకొని.. తనకు ఎంపీ టికెట్వచ్చేలా చేశారని పెద్దపల్లి కాంగ్రెస్ ఎంపీ అభ్యర్థి గడ్డం వంశీకృష్ణ అన్నారు. కాంగ్రెస్ శ్రేణులు, కాకా వెంకటస్వామి, వివేక్ వెంకటస్వామి అభిమానుల కోరిక కూడా అదేనన్నారు. ఎంపీ అభ్యర్థిగా మొదటిసారి చెన్నూరుకు రావడం ఆనందంగా ఉందన్నారు. పెద్దపల్లి పార్లమెంటుతో కాకాకు 70 ఏండ్ల అనుబంధం, వివేక్ వెంకటస్వామికి ఐదేండ్ల అనుబంధం ఉందని గుర్తుచేశారు. పదేండ్ల బీఆర్ఎస్ పాలన తర్వాత కూడా వెంకటస్వామి, వివేక్ చేసిన అభివృద్ధి మాత్రమే పెద్దపల్లి పార్లమెంటు పరిధిలో కనిపిస్తోందన్నారు. కాకా కుటుంబంతోనే అభివృద్ధి సాధ్యమని ప్రజలు తనకు ఎంపీగా పోటీ చేసే చాన్స్ ఇచ్చారన్నారు. తనకు టికెట్రావడానికి మంత్రి శ్రీధర్బాబు, ఎమ్మెల్యేలు విజయరామణరావు, అడ్లూరి లక్ష్మణ్, మక్కాన్సింగ్, ప్రేమ్సాగర్రావు, గడ్డం వినోద్, వివేక్ వెంకటస్వామి కృషిచేశారని, వారికి ధన్యవాదాలు తెలుపుతున్నట్లు వంశీకృష్ణ పేర్కొన్నారు. కాగా, శనివారం రాత్రి మంచిర్యాల జిల్లా మందమర్రి మార్కెట్ లోని ఆస్రా మజీదులో ముస్లింలకు ఎమ్మెల్యే వివేక్ వెంకటస్వామి ఇఫ్తార్ విందు ఇచ్చారు. ఈ కార్యక్రమంలో గడ్డం వంశీకృష్ణ, మాజీ ఎమ్మెల్యే నల్లాల ఓదెలు తదితరులు పాల్గొన్నారు.
వంశీకృష్ణకు ఘనస్వాగతం
పెద్దపల్లి పార్లమెంటు కాంగ్రెస్ ఎంపీ అభ్యర్థి గడ్డం వంశీకృష్ణ.. ఎమ్మెల్యే వివేక్ వెంకటస్వామితో కలిసి తొలిసారిగా చెన్నూరు నియోజకవర్గానికి రావడంతో కాంగ్రెస్ శ్రేణులు, కాకా అభిమానులు ఘనస్వాగతం పలికారు. జైపూర్ మండలం ఇందారం, జైపూర్, భీమారం మండల కేంద్రాలతో పాటు చెన్నూరు ఎమ్మెల్యే క్యాంపు ఆఫీస్లో వంశీకృష్ణ, వివేక్ను ఘనంగా సత్కరించారు. మహిళలు మంగళహారతులతో స్వాగతం పలికారు.
