నాలుగు గంటలు ఎక్కువ పనిచేసినా గంటన్నరే ఓటీ

• ఆర్టీసీలో పనిగంటలు పెంచిన్రు ఓటీలు కోసిన్రు!
• ఉద్యోగులపై పనిభారం మోపుతున్న యాజమాన్యం
• 8 నుంచి 10 గంటలకు     పని వేళల పెంపు
• నాలుగు గంటలు ఎక్కువ పనిచేసినా గంటన్నరే ఓటీ
• ‘141’ షీట్​ బంద్​ పెట్టి అధికారులే ఓటీలేస్తున్రు
• రెండు పే స్కేల్స్​, ఐదు డీఏలు పెండింగ్​​

హైదరాబాద్​, వెలుగు: ఉద్యోగులకు పనిగంటలు పెంచి పనిభారం మోపుతున్న ఆర్టీసీ యాజమాన్యం.. ఓటీ (ఓవర్​ టైం) అలవెన్స్​లో కోత పెడుతున్నది. ఎంప్లాయీస్​ పొట్టగొడుతున్నది. ఓటీ డబ్బులు తగ్గడంతో గతంతో పోలిస్తే జీతాలు తక్కువగా వస్తున్నాయని ఉద్యోగులు వాపోతున్నారు. రెండు పే స్కేల్స్​, ఐదు డీఏలు ఇవ్వకపోగా.. రివర్స్​లో ఇలా జీతాల్లో కోత పెట్టడంపై మండిపడుతున్నారు. ఆర్టీసీలో యూనియన్లు యాక్టివ్​గా లేకపోవడం వల్ల కూడా ఉద్యోగులు ఏం చేయలేని పరిస్థితి ఏర్పడింది. 

‘141’ షీట్​ బంద్​
ఆర్టీసీలో 49 వేల మంది ఉద్యోగులు పనిచేస్తున్నారు. ఇందులో ఎక్కువ మంది డ్రైవర్లు, కండక్టర్లే ఉన్నారు. మామూలు రోజుల్లో ఎనిమిది గంటలు పనిచేయాల్సి ఉంటుంది. దానికి మించి పనిచేస్తే ఓటీలు ఇచ్చేటోళ్లు. ఉద్యోగి బేసిక్​ పేను బట్టి గంటల లెక్కన ఓటీ పైసలు వచ్చేటివి. ఓటీని ఫైనల్​ చేసేందుకు బస్సులో డ్రైవర్​ లేదా కండక్టర్​కు 141 షీట్​ ఇచ్చేవారు. అందులో ఏ రూట్​లో వెళ్లారు? ఎన్ని స్టాప్​లు ఉన్నాయి? ఎన్ని గంటలు పనిచేశారు? తదితర వివరాలు ఉండేవి. వాటిని బట్టి ఓటీ డబ్బులను ఇచ్చేటోళ్లు. టిమ్స్​(టికెట్​ ఇష్యూయింగ్​ మెషీన్లు) వచ్చాక కూడా ఈ షీట్ల విధానం కొనసాగింది. నెలాఖరున షీట్లన్నీ లెక్క తీసి.. ఓటీలు ఫైనల్​ చేసేవారు. కండక్టర్లు లేదా డ్రైవర్లు సంతకం చేసిన తర్వాతే ఓటీలు కట్టించేవారు. కానీ, కొంత కాలంగా ఆర్టీసీ యాజమాన్యం ఈ షీట్లను ఇవ్వడం మానేసింది. దీంతో ఆఫీసర్లు ఓటీని తగ్గించి వేస్తున్నారు. నాలుగు గంటలు ఎక్కువ పనిచేసినా గంట నుంచి గంటన్నరే చేసినట్టు రాస్తున్నారు. దీంతో ఉద్యోగులు నష్టపోతున్నారు.  

పని గంటలు పెంచిన్రు
కొన్ని రోజల క్రితం వరకు ఉద్యోగులకు 8 గంటల డ్యూటీలే ఉండేవి. ఈ మధ్యే వివిధ కారణాలు చెప్తూ డ్యూటీ టైమ్​ను 10 గంటలకు పెంచారు. ఆ తర్వాత అదనంగా పనిచేసిన గంటలకు మాత్రమే ఓటీ లెక్కగట్టి ఇస్తున్నారు. దాంతో పాటు లాంగ్​ రూట్​లో ఒక ట్రిప్​ వెళ్లొస్తే.. తెల్లారి సెలవు ఉండేది. ఇప్పుడు రెండు రోజుల్లో మూడు ట్రిప్పులు పూర్తిచేస్తేనే మర్నాడు సెలవు ఇస్తున్నారు. ప్రభుత్వ ఉద్యోగులకు ఇప్పటికే పీఆర్సీని అమలు చేస్తున్నా.. ఆర్టీసీ ఉద్యోగులు, కార్మికులకు మాత్రం ఇప్పటికీ పీఆర్సీ పత్తానే లేదు. సంస్థలో రెండు పీఆర్సీలు పెండింగ్​లో ఉన్నాయి. 2017, 2021 ఏప్రిల్​ ఒకటో తేదీల నుంచి పీఆర్సీలు అమలు కావాల్సి ఉంది. కానీ నాలుగేండ్లు దాటినా నేటికీ అమలు కాలేదు. ఫిట్​మెంట్​ ప్రకటించకపోవడంతో సమ్మె చేస్తామంటూ 2018 జూన్​లో ఆర్టీసీ యూనియన్లు హెచ్చరించాయి. దీంతో అప్పటి డిప్యూటీ సీఎం కడియం శ్రీహరి నేతృత్వంలోని ఏడుగురు సభ్యుల మంత్రుల కమిటీ యూనియన్​ నేతలతో చర్చించింది. 16 శాతం ఐఆర్​ను ప్రకటించింది. పీఆర్సీ మాత్రం రాలేదు. 2013 నాటి పీఆర్సీ బాండ్ల డబ్బులూ ఇంకా అందలేదు. ఇక ఐదు డీఏలూ పెండింగ్​లోనే ఉన్నాయి. జనవరి వస్తే మరో డీఏ చెల్లించాల్సి వస్తుంది. 

టిమ్స్ సక్కగ​ పనిచేస్తలేవ్​
బస్సుల్లో కండక్టర్లకు ఇచ్చే టిమ్స్​ సరిగా పనిచేయట్లేదు. రాష్ట్రమంతటా 50 నుంచి 60 శాతం వరకు మెషీన్లు పాడైపోయాయని కండక్టర్లు వాపోతున్నారు. మెషీన్ల నుంచి ప్రింట్​ కూడా సక్కగ రావడంలేదు. వచ్చిన ప్రింట్లూ క్లారిటీగా ఉండటం లేదు. కొన్ని సందర్భాల్లో టికెట్​పైన ప్రింట్​ అయిన వివరాలు సరిగ్గా కనిపించక.. చెకింగ్​ టైంలో ఇబ్బందులొస్తున్నాయని కండక్టర్లు ఆవేదన వ్యక్తం చేస్తున్నారు. 

ఉద్యోగుల కడుపు కొట్టడం సరికాదు
గతంలో 141 షీట్​లో అన్ని వివరాలుండేవి. ఇప్పుడు వాటిని బంద్​ పెట్టిన్రు. అధికారులే ఓటీలను ఇష్టమొచ్చినట్టు వేస్తున్నరు. ఓటీల్లో గంటలకొద్దీ కోతలు పెడ్తున్నరు. పని సమయాన్ని 8 గంటల నుంచి 10 గంటలకు పెంచారు. లాంగ్​ ట్రిప్​ డ్రైవర్లకు తెల్లారి హాలీడే ఇవ్వకుండా రెండ్రోజులకొకటి అడ్జస్ట్​ చేస్తున్నారు. పీఆర్సీ, డీఏలు ప్రకటించకున్నా కష్టపడి పనిచేస్తున్న ఉద్యోగుల కడుపు కొట్టడం సరికాదు.  
- హనుమంతు ముదిరాజ్, జనరల్‌ సెక్రటరీ, టీజేఎంయూ