- అందరూ రెండు కుటుంబాలకు చెందిన వారే
- దోషుల్లో ముగ్గురు మహిళలు
యాదాద్రి, వెలుగు : పాలోళ్ల మధ్య నాలుగు ఇంచుల గోడ పంచాయితీ ఒకరి హత్యకు దారి తీసింది. 2020లో జరిగిన ఈ హత్య కేసులో రెండు కుటుంబాలకు చెందిన ముగ్గురు మహిళలతో సహా 8 మందికి యావజ్జీవ శిక్ష పడింది. శిక్ష పడిన వారిలో తండ్రీకొడుకులు, భార్యాభర్తలున్నారు. యాదాద్రి జిల్లా రాజాపేట మండలం చల్లూరుకు చెందిన చెట్కూరి అయిలయ్య (తండ్రి మల్లయ్య), చెట్కూరి అయిలయ్య(తండ్రి నర్సయ్య), చెట్కూరి చిన్న నర్సయ్య అన్నదమ్ముల పిల్లలు. ఈ మూడు కుటుంబాలకు సంబంధించిన ఇంటి జాగ విషయంలో గొడవలు జరుగుతున్నాయి. ఈ క్రమంలో చెట్కూరి అయిలయ్య (తండ్రి నర్సయ్య) నాలుగు ఇంచులు ముందుకు జరిపి ఓ గోడ కడుతున్నాడు.
దీంతో మరో అయిలయ్య, చిన్న నర్సయ్య, అతడి కుటుంబసభ్యులు అభ్యంతరం వ్యక్తం చేశారు. ఈ క్రమంలో ఘర్షణ మొదలై ఒకరిపై ఒకరు దాడులు చేసుకున్నారు. ఏప్రిల్1,2020లో జరిగిన దాడిలో తీవ్రంగా గాయపడిన చెట్కూరి అయిలయ్య (తండ్రి నర్సయ్య) చనిపోయాడు. ఈ కేసులో నేరం నిరూపణ కావడంతో ఎనిమిది మందికి యావజ్జీవ ఖైదు విధిస్తూ జిల్లా ఫస్ట్క్లాస్అడిషనల్జడ్జి తీర్పు చెప్పారు.ఒక్కొక్కరికి రూ. 4500 చొప్పున జరిమానా విధించారు. చెట్కూరి అయిలయ్య(తండ్రి మల్లయ్య), ఆయన కుటుంబానికి చెందిన లక్ష్మి, కుమార్, చెట్కూరి చిన్న నర్సయ్యతో పాటు వారి కుటుంబానికి చెందిన యాదగిరి, స్వామి, అరుణ, లక్ష్మికి ఈ శిక్ష పడింది. తీర్పు తర్వాత శిక్ష పడిన 8 మందిని భువనగిరి ఏరియా దవాఖానలో వైద్య పరీక్షలు నిర్వహించి జైలుకు తరలించారు.
