ఫిట్నెస్ మ్యాట్లో గేమింగ్ కూడా ఉంటే... భలే ఉంటుంది కదా! అలాంటిదే ఇప్లి(yipli) స్మార్ట్ ఫిట్నెస్ గేమింగ్ మ్యాట్. కొవిడ్–19 కొత్త వేరియెంట్లు వస్తున్న ఈరోజుల్లో ఎక్కువ మంది ఇంటి నుంచే పనిచేస్తున్నారు. దాంతో ఫిట్నెస్ అనేది ప్రయారిటీ లిస్ట్లో టాప్ ప్లేస్లోకి చేరింది. ఇప్లి గేమింగ్ మ్యాట్ తెచ్చుకుంటే జిమ్కు వెళ్లి ఎక్సర్సైజ్ చేయలేకపోతున్నాం అనే బాధ ఉండదు. చూడటానికి యోగా మ్యాట్లా ఉండే దీనిలో మోషన్ సెన్సర్ ఉంటుంది. మ్యాట్ మీద గేమ్స్ ఆడేటప్పుడు ఇందులో ఉండే సెన్సర్ 40 రకాల బాడీ మూవ్మెంట్స్ను ట్రాక్ చేస్తుంది. 182.9 సెంటీమీటర్ల పొడవు, 61 సెంటీమిటర్ల వెడల్పు ఉంటుంది. మిడ్ సైజ్ లివింగ్ రూమ్లో ఎక్కువ ప్లేస్ ఆక్రమించుకోని ఈ మ్యాట్ బరువు
ఒకటిన్నర కేజీలే
బ్లాక్ బాక్స్లా ఉండే మ్యాట్ బాక్స్కు ఎడమ పక్కన ఒక బటన్ ఉంటుంది. దాన్ని ప్రెస్ చేస్తే లైట్ వెలుగుతుంది. మ్యాట్ చార్జింగ్ను బట్టి లైట్ రంగులు మారుతుంటుంది. చార్జింగ్ 30–100 శాతం ఉంటే గ్రీన్ కలర్, 30–10 శాతం ఉంటే ఆరెంజ్,10శాతం కంటే తక్కువ చార్జింగ్ ఉంటే రెడ్ కలర్ లైట్ వెలుగుతుంది. ఈ మ్యాట్లో 1500 ఎమ్ఎహెచ్ బ్యాటరీ ఉంటుంది. చార్జింగ్కు రెండు గంటల కంటే తక్కువ టైం పడుతుంది. ఈ స్మార్ట్మ్యాట్ను ఒకసారి చార్జింగ్ చేస్తే ఆరు నుంచి ఎనిమిది గంటలు వాడుకోవచ్చు.
ఇన్స్టాల్ చేసుకోవచ్చు
ఈ మ్యాట్ మీద ఆడుకోవాలంటే ఇప్లి యాప్ను స్మార్ట్ఫోన్లో ఇన్స్టాల్ చేసుకోవాలి. అకౌంట్ క్రియేట్ చేసుకుని మ్యాట్ను యాప్తో సింక్ చేయాలి. తరువాత 16గేమ్స్ సెలక్ట్ చేసుకోవచ్చు. మ్యాట్ కోసం ప్రత్యేకంగా తయారుచేసిన ఈ గేమ్స్ను డౌన్లోడ్ చేసుకుని ఫోన్లో ఇన్స్టాల్ చేసుకోవాలి. ఈ ప్రాసెస్ చాలా సింపుల్. మ్యాట్ వాడే వాళ్ల ఇష్టాన్ని బట్టి గేమ్స్ కోసం ఫోన్ డిస్ప్లేను వాడొచ్చు(మ్యాట్తో పాటు ఇప్లి బండిల్స్ ఫోన్ స్టాండ్ వస్తుంది). లేదంటే ల్యాప్టాప్, పర్సనల్ కంప్యూటర్ స్క్రీన్కు చార్జింగ్ కేబుల్తో కనెక్ట్ చేసుకోవచ్చు. ఇవేవీ కాదంటే ఫోన్ స్ర్కీన్ను స్మార్ట్ టీవీలో టెలికాస్ట్ చేసుకోవచ్చు.
ఇందులో ఉండే ప్రతీ గేమ్ డిఫరెంట్ థీమ్తో ఉంటుంది. ఉదాహరణకు జాయ్ఫుల్ జంప్స్, మ్యాట్ బీట్స్, స్కేటర్ గేమ్స్ తీసుకుంటే... మొదటి గేమ్ రన్నింగ్, జంపింగ్ చేయిస్తుంది. రెండోది పాటకు అనుగుణంగా మ్యాట్ మీద స్టెప్స్ వేయిస్తుంది. మూడో గేమ్లో స్కిప్పింగ్ చేయిస్తుంది. అలాగే మ్యాట్ మీద ఉండే అబ్స్టకిల్స్ దాటేందుకు అడుగులు వేయడం, జంప్ చేయడం వంటివి చేయాల్సి వస్తుంది. ఈ గేమ్స్లో ఒకదానికి మరొకదానికి మధ్య ఎక్కువ గ్యాప్ ఉండదు. అందుకని త్వరగా అలసిపోయినట్టు అనిపిస్తుంది. రోజుకు 10నిమిషాలు ఈ మ్యాట్ వాడితే చాలు చాలాసేపు ఎక్సర్సైజ్ చేసిన ఫీల్ వస్తుంది.
ఇద్దరికి ఓకే..
ఈ ఫిట్నెస్ మ్యాట్ను పిల్లలు బాగా ఎంజాయ్ చేస్తారు. ఎందుకంటే గేమ్ ఆడేటప్పుడు బ్రేక్ ఎక్కువ సేపు ఉండదు. వెంటవెంటనే ఆడాలి. ఈ మ్యాట్ మీద ఇద్దరు ప్లేయర్లు కూడా ఆడొచ్చు. మల్టీప్లేయర్ల కోసం మ్యాట్ మీద బాణం గుర్తులు ఉంటాయి. ఫ్రెండ్స్, రిలేటివ్స్ ప్రొఫైల్స్ను ఇప్లి యాప్లో యాడ్ చేసుకోవచ్చు. ఎంత ఫిట్నెస్ ఆటలు అయినా స్కోర్ ఎంతో తెలుసుకోవాలి అనిపిస్తుంది కదా. అందుకు వర్చువల్ లీడర్బోర్డ్ ఉంటుంది. దానిమీద ఫిట్నెస్ స్కోర్స్ చూసుకోవచ్చు. కరోనా కేసులు పెరుగుతున్న టైంలో వర్కవుట్స్ కోసం బయట జిమ్కు వెళ్లడం ఇష్టపడని వాళ్లు ఇప్లి గేమింగ్ మ్యాట్ తెచ్చుకోవడం బెటర్. ఇప్లి కంపెనీ ఇ–స్టోర్, అమెజాన్లో స్మార్ట్ ఫిట్నెస్ మ్యాట్ అందుబాటులో ఉంది.
