- డెడ్‌‌‌‌‌‌‌‌బాడీతో ఆందోళనకు దిగిన బంధువులు
- నిజామాబాద్‌ జిల్లా ఏర్గట్ల మండలంలో ఘటన
బాల్కొండ, వెలుగు : ప్రేమించిన యువతి మోసం చేసిందన్న మనస్తాపంతో పురుగుల మందు తాగిన ఓ యువకుడు ట్రీట్‌‌‌‌‌‌‌‌మెంట్‌ తీసుకుంటూ చనిపోయాడు. ఈ ఘటన నిజామాబాద్‌ జిల్లా ఏర్గట్ల మండలంలో శుక్రవారం జరిగింది. మృతుడి కుటుంబ సభ్యులు, గ్రామస్తులు తెలిపిన వివరాల ప్రకారం... ఏర్గట్ల మండలం దోంచందకు చెందిన నాగిరెడ్డి శ్రీకాంత్ (29) అదే గ్రామానికి చెందిన ఓ యువతి ఆరేండ్లుగా ప్రేమించుకున్నారు.
ఉద్యోగరీత్యా లండన్‌ వెళ్లిన శ్రీకాంత్.. తాను ప్రేమించిన యువతిని పెండ్లి చేసుకోవాలన్న ఉద్దేశంతో ఇటీవల స్వగ్రామానికి వచ్చాడు. వీరి ప్రేమ విషయం యువతి కుటుంబ సభ్యులకు తెలియడంతో వారు ఒప్పుకోలేదు. ఈ క్రమంలోనే యువతికి పెండ్లి నిశ్చయమైంది. కానీ తనకు పెండ్లి ఇష్టం లేదని, ఇద్దరం కలిసి వెళ్లిపోదామని యువతి చెప్పింది. ఈ నెల 5వ తేదీ వరకు శ్రీకాంత్‌‌‌‌‌‌‌‌తో ఫోన్‌ మాట్లాడిన యువతి ఆ తర్వాత కాంటాక్ట్‌‌‌‌‌‌‌‌లోకి రాలేదు.
మోసపోయానన్న మనస్తాపంతో శ్రీకాంత్ ఈ నెల 6న పురుగుల మందు తాగాడు. గమనించిన కుటుంబ సభ్యులు వెంటనే హైదరాబాద్‌‌‌‌‌‌‌‌లోని హాస్పిటల్‌‌‌‌‌‌‌‌కు తీసుకెళ్లాడు. అక్కడ ట్రీట్‌‌‌‌‌‌‌‌మెంట్‌ తీసుకుంటూ గురువారం ఉదయం శ్రీకాంత్ చనిపోయాడు. శ్రీకాంత్ మృతికి కారణమైన వారిని చట్టపరంగా శిక్షించాలని డిమాండ్‌ చేస్తూ అతడి కుటుంబ సభ్యులు,బంధువులు శుక్రవారం ఆందోళనకు దిగారు. డెడ్‌‌‌‌‌‌‌‌బాడీతో ఏర్గట్ల పీఎస్‌‌‌‌‌‌‌‌కు చేరుకొని ధర్నా నిర్వహించారు.
డెడ్‌‌‌‌‌‌‌‌బాడీ ఉంచిన ఫ్రీజర్‌‌‌‌‌‌‌‌ను పోలీస్‌ వాహనంపై పెట్టి నిరసన తెలిపారు. యువతి మోసం చేయడం వల్లే శ్రీకాంత్ పురుగుల మందు తాగాడని ఈ నెల 6నే పోలీసులకు ఫిర్యాదు చేసినా పట్టించుకోలేదని ఆరోపించారు. విషయం తెలుసుకున్న ఆర్మూర్‌ ఏసీపీ వెంకటేశ్వర్‌‌‌‌‌‌‌‌రెడ్డి ఘటనాస్థలానికి చేరుకొని న్యాయం చేస్తామని హామీ ఇవ్వడంతో ఆందోళన విరమించారు.
